Cricket

Entertainment

News

Football

ایشیا کپ کے سپر فور مرحلے میں پاکستان اور بھارت کے درمیان دوسرا اہم میچ کل کھیلا جائے گا، اور اس مقابلے کے لیے بھی متنازع ریفری اینڈی پائیکرافٹ کو مقرر کر دیا گیا ہے۔اینڈی پائی کرافٹ کے ہاتھ ملانے کے تنازع کے بعد ایک بار پھر پاک بھارت ٹیمیں ایشیا کپ میں آمنے سامنے ہوں گی، وہی ٹیمیں، وہی میدان اور وہی میچ ریفری۔ کل دبئی میں سپر فور مرحلے کے اہم معرکے میں روایتی حریف ٹکرائیں گے۔کرک انفو کی رپورٹ کے مطابق 14 ستمبر کے گروپ میچ میں اینڈی پائی کرافٹ اس وقت تنازع کا حصہ بنے جب پاکستان کے کپتان سلمان آغا اور بھارتی کپتان کے درمیان ہاتھ نہ ملانے کا معاملہ سامنے آیا۔ بعد ازاں پاکستانی ٹیم مینجمنٹ نے انکشاف کیا کہ میچ ریفری نے خود کپتان کو ایسا کرنے کا مشورہ دیا تھا۔پاکستان کرکٹ بورڈ نے اس رویے پر شدید احتجاج کرتے ہوئے آئی سی سی سے اینڈی پائی کرافٹ کو مزید ذمہ داریاں نہ دینے کا مطالبہ کیا اور بائیکاٹ کی دھمکی تک دے دی۔ تاہم بعد میں ریفری نے پاکستانی کپتان سے معافی مانگی جس کے بعد معاملہ ختم ہوگیا اور وہ متحدہ عرب امارات کے خلاف میچ میں بھی فرائض سرانجام دیتے رہے۔اب ایک بار پھر پاکستان اور بھارت کے درمیان کل دبئی میں کھیلے جانے والے سپر فور کے بڑے میچ میں اینڈی پائی کرافٹ ہی ریفری ہوں گے، جس سے شائقین کرکٹ کی دلچسپی اور بڑھ گئی ہے۔کرکٹ شائقین کی نظریں کل دبئی کے اس بڑے ٹاکرے پر جمی ہیں جہاں دونوں ٹیمیں ایک بار پھر تاریخ دہرانے کو تیار ہیں۔

ایشیا کپ،متنازع ریفری اینڈی پائی کرافٹ پھر سے پاک بھارت میچ کے ریفری مقرر

پاکستان اور بھارت کے درمیان سپر فور مرحلے کا اہم میچ کل دبئی میں کھیلا جائے گا

امریکا میں روزگار حاصل کرنے کے خواہشمند افراد کے لیے ایک بری خبر سامنے آئی ہے۔ امریکی صدر ڈونلڈ ٹرمپ نے ایچ ون بی ورکر ویزا کی سالانہ فیس میں ریکارڈ اضافہ کرتے ہوئے اسے ایک لاکھ ڈالر مقرر کر دیا ہے۔ اس اقدام کو امیگریشن کو محدود کرنے کی نئی پالیسی کا حصہ قرار دیا جارہا ہے۔غیر ملکی میڈیا کے مطابق صدر ٹرمپ نے اس حکم نامے پر باضابطہ دستخط کر دیے ہیں جس کے بعد ویزا حاصل کرنے کے خواہش مند امیدواروں اور کمپنیوں کو بھاری رقم ادا کرنا ہوگی۔ حکام کا کہنا ہے کہ بعض کیسز میں کمپنیوں پر اس سے بھی زیادہ مالی بوجھ پڑ سکتا ہے۔ماہرین کا کہنا ہے کہ سب سے زیادہ نقصان امریکی ٹیکنالوجی انڈسٹری کو ہوگا، کیونکہ یہی کمپنیاں بڑی تعداد میں بھارت اور چین سے ماہرین بھرتی کرتی ہیں۔ ایچ ون بی ویزے کی نئی پالیسی 21 ستمبر 2025 سے نافذالعمل ہوگی، ویزا فیس میں اضافے سے بھارتی طلبااور ٹیک کمپنیاں بھی زیادہ متاثر ہوں گی۔رپورٹ میں بتایا گیا ہے کہ ماضی میں ایچ ون بی ویزا کی فیس صرف چند سو ڈالر سے شروع ہو کر مخصوص مراحل میں چند ہزار ڈالر تک جا سکتی تھی، لیکن اب مقررہ ایک لاکھ ڈالر کی فیس نے امیدواروں اور آجر دونوں کے لیے مشکلات کھڑی کر دی ہیں۔اس کے علاوہ صدر ٹرمپ نے امیر افراد کے لیے گولڈن ویزا پروگرام کا اعلان بھی کر دیا ہے۔ نئے ایگزیکٹو آرڈر کے تحت انفرادی طور پر گولڈن ویزا حاصل کرنے کے لیے دس لاکھ ڈالر ادا کرنا ہوں گے، جبکہ کسی کمپنی کی جانب سے درخواست دینے کی صورت میں یہ رقم بیس لاکھ ڈالر ہوگی۔ یہ فنڈز امریکی محکمہ تجارت کو عطیہ کیے جائیں گے، جو انہیں تجارتی مواقع کی بہتری پر خرچ کرے گا۔تجزیہ کاروں کے مطابق یہ اقدام نہ صرف ہنر مند افراد کے امریکا آنے کے خوابوں پر کاری ضرب ہے بلکہ امریکی آئی ٹی اور ٹیکنالوجی سیکٹر کے لیے بھی بڑا دھچکا ثابت ہوگا، کیونکہ مہنگی فیس کے باعث عالمی سطح پر بھرتیوں میں نمایاں کمی آسکتی ہے۔ماہرین کے بقول، یہ پالیسی طویل المدتی طور پر امریکا کی معیشت اور ٹیکنالوجی انڈسٹری کے لیے بھی نقصان دہ ثابت ہوسکتی ہے۔

امریکا میں ایچ ون بی ویزا فیس میں ریکارڈ اضافہ، امیدواروں اور کمپنیوں پر بھاری بوجھ

صدر ٹرمپ کے نئے حکم نامے کے تحت ویزا فیس ایک لاکھ ڈالر مقرر، ٹیکنالوجی سیکٹر سب سے زیادہ متاثر ہوگا

ایشیا کپ کے سب سے بڑے معرکے سے قبل ایک حیران کن فیصلہ سامنے آیا ہے، پاکستان کرکٹ ٹیم نے بھارت کے خلاف سپر فور مرحلے کے ہائی وولٹیج میچ سے پہلے اپنی طے شدہ پریس کانفرنس اچانک منسوخ کر دی، جس نے شائقین کو مزید تجسس میں ڈال دیا ہے۔میڈیارپورٹس کے مطابق دبئی انٹرنیشنل اسٹیڈیم میں اتوار، 21 ستمبر کو ہونے والے پاک بھارت سپر فور میچ سے قبل پاکستان کرکٹ ٹیم کی پری میچ پریس کانفرنس اچانک منسوخ کر دی گئی۔ یہ پریس کانفرنس پاکستانی وقت کے مطابق شام 7 بجے ہونا طے تھی لیکن آخری لمحات میں ٹیم مینجمنٹ نے اسے ملتوی کر دیا۔ایشین کرکٹ کونسل (اے سی سی) نے بھی اس فیصلے کی باضابطہ تصدیق کر دی ہے تاہم کانفرنس کی منسوخی کی کوئی وجہ بیان نہیں کی گئی۔ یہ دوسری بار ہے کہ ایشیا کپ 2025 کے دوران پاکستانی ٹیم نے پری میچ میڈیا بریفنگ سے گریز کیا ہے، اس سے قبل متحدہ عرب امارات کے خلاف میچ سے پہلے بھی پریس کانفرنس نہیں کی گئی تھی۔کرکٹ ماہرین اور حلقوں کے مطابق یہ فیصلہ غیر معمولی ہے کیونکہ پریس کانفرنس کو ہمیشہ ایک اہم موقع سمجھا جاتا ہے جہاں کھلاڑی اور کپتان میچ سے متعلق اپنے خیالات اور حکمت عملی سے آگاہ کرتے ہیں۔ خاص طور پر بھارت کے ساتھ گزشتہ میچ کے بعد سامنے آنے والے "ہینڈ شیک تنازع" کے تناظر میں اس فیصلے کو مزید اہمیت دی جا رہی ہے۔دوسری جانب پاکستان ٹیم مینجمنٹ کا کہنا ہے کہ کھلاڑی اپنی بھرپور تیاریوں میں مصروف ہیں۔ ٹیم کا مورال بلند رکھنے کے لیے ایک موٹیویشنل اسپیکر کی خدمات بھی حاصل کی گئی ہیں اور میچ سے قبل کھلاڑیوں کی کارکردگی بہتر بنانے پر مکمل توجہ دی جا رہی ہے۔

ایشیاکپ،پاک بھارت ٹاکرے سے قبل پاکستان ٹیم کی پری میچ پریس کانفرنس منسوخ

پاک بھارت مقابلےکا دباؤ کم کرنے کیلئے پی سی بی کا بڑا فیصلہ، ٹیم کیلئے موٹیویشنل اسپیکر کی خدمات حاصل کرلیں

فیڈرل بورڈ آف ریونیو (ایف بی آر) نے سوشل میڈیا پر اپنی دولت، پرتعیش گھروں، قیمتی گاڑیوں اور زیورات کی نمائش کرنے والوں کے خلاف کریک ڈاؤن کا فیصلہ کر لیا ہے۔ نجی ٹی وی کی رپورٹ کے مطابق ایف بی آر نے ایسے ایک لاکھ سے زائد امیر افراد کا ڈیٹا جمع کر لیا ہے جو سوشل میڈیا پر شاہانہ زندگی کا اظہار تو کرتے ہیں مگر ان کی آمدن اور اخراجات ٹیکس گوشواروں سے مطابقت نہیں رکھتے۔حکام کا کہنا ہے کہ شادیوں میں ہزاروں ڈالر کے سوٹ پہننے والے اور لاکھوں روپے کے اخراجات کرنے والے بھی کارروائی کی زد میں آئیں گے۔ ایف بی آر گزشتہ سال جمع کرائے گئے ٹیکس ریٹرنز کا اس سال سے موازنہ کرے گا اور کم از کم 80 فیصد ریٹرنز کا آڈٹ کیا جائے گا۔ذرائع کے مطابق ایسے افراد جو اپنی آمدن میں اضافہ ظاہر نہیں کرتے مگر شاہانہ طرزِ زندگی اختیار کیے ہوئے ہیں، ان کے خلاف سخت ایکشن ہوگا۔ ایف بی آر نے واضح کیا ہے کہ جو شہری فوری طور پر اپنے گوشوارے اپ ڈیٹ کر لیں گے اور مکمل معلومات فراہم کریں گے، ان کے خلاف کارروائی فی الحال مؤخر کر دی جائے گی، تاہم ہدایات کو نظر انداز کرنے والے افراد قانونی گرفت میں آئیں گے۔یہ اقدام نان فائلرز اور ٹیکس چوری کرنے والوں کے خلاف جاری مہم کا حصہ ہے تاکہ قومی خزانے کو بہتر کیا جا سکے اور ٹیکس کے دائرے کو مزید وسعت دی جا سکے۔

ایف بی آرنے سوشل میڈیا پر دولت کی نمائش کرنے والوں کیخلاف کارروائی کا فیصلہ کرلیا

ایف بی آر نے شاہانہ لائف اسٹائل رکھنے والےایک لاکھ امیر افراد کا ڈیٹا جمع کر لیا، آمدنی و اخراجات کا جائزہ لیا جا رہاہے

ایک اوریورپی ملک پرتگال نے بھی فلسطین کو بطورریاست تسلیم کرنے کااعلان کردیا۔غیر ملکی میڈیا رپورٹس کے مطابق پرتگالی وزارتِ خارجہ نے تصدیق کی ہے کہ بروز اتوار 21 ستمبر کو فلسطین کو ریاست تسلیم کرنے کا باضابطہ اعلان کیا جائے گا۔ اس اعلان سے قبل پرتگال کے وزیر خارجہ نے اپنے برطانیہ کے دورے کے دوران کہا تھا کہ ان کا ملک فلسطینی ریاست کو تسلیم کرنے پر سنجیدگی سے غور کر رہا ہے۔بین الاقوامی تجزیہ کاروں کا کہنا ہے کہ پرتگال کا یہ فیصلہ اس وقت سامنے آیا ہے جب دنیا کے کئی ممالک اقوامِ متحدہ کی جنرل اسمبلی کے اجلاس کے موقع پر فلسطین کی حمایت میں اپنے مؤقف کو مزید واضح کرنے کی تیاری کر رہے ہیں۔پرتگال سے پہلے فرانس، برطانیہ، آسٹریلیا اور کینیڈا سمیت کئی ممالک فلسطین کو ریاست تسلیم کر چکے ہیں۔ ماہرین کے مطابق پرتگال کا اقدام نہ صرف یورپ میں فلسطین کی حمایت کو مزید تقویت دے گا بلکہ اسرائیل-فلسطین تنازعے میں دو ریاستی حل کے بیانیے کو بھی عالمی سطح پر نئی توانائی ملے گی۔پرتگال کا یہ فیصلہ واضح کرتا ہے کہ دنیا اب فلسطینی ریاست کے وجود کو نظرانداز نہیں کر سکتی۔ اگر عالمی برادری متحد ہو کر دو ریاستی حل کی حمایت جاری رکھے تو مشرقِ وسطیٰ میں دیرپا امن کی ایک نئی راہ ہموار ہو سکتی ہے۔

پرتگال کا بڑا فیصلہ، فلسطین کو بطور ریاست تسلیم کرنے کا اعلان کردیا

کل بروزاتوار21 ستمبر کو فلسطین کو ریاست تسلیم کرنے کا باضابطہ اعلان کریں گے، وزارت خارجہ پرتگال

سکھر کے علاقے صالح پٹ میں انسانیت کو شرما دینے والا واقعہ پیش آیا جہاں ایک بااثر وڈیرے نے کھیت میں پانی پینے کے لیے گھسنے پر مزدور غلام مصطفیٰ کی اونٹنی کو بدترین تشدد کا نشانہ بنایا۔میڈیارپورٹس کے مطابق وڈیرے نے غصے میں آکر اونٹنی کو ٹریکٹر سے باندھ کر گھسیٹا، لاٹھیاں برسائیں اور اس کی ٹانگ توڑ ڈالی۔ زخمی جانور کو مقامی اسپتال پہنچایا گیا لیکن ڈاکٹروں نے علاج سے انکار کر دیا۔واقعے کی خبر سامنے آنے پر وزیراعلیٰ سندھ مراد علی شاہ نے نوٹس لیتے ہوئے میئر سکھر اور چیئرمین ڈسٹرکٹ کونسل سے فوری رپورٹ طلب کر لی۔ انہوں نے واضح کیا کہ جانور کے ساتھ ایسے وحشیانہ سلوک کو برداشت نہیں کیا جا سکتا۔ بعدازاں ابتدائی طبی امداد کے بعد زخمی اونٹنی کو مزید علاج کے لیے کراچی منتقل کر دیا گیا۔پولیس نے اونٹنی کے مالک کی شکایت پر مقدمہ درج کر لیا ہے۔ پولیس ترجمان کے مطابق تین ملزمان میں سے ایک کو گرفتار کر لیا گیا ہے جبکہ دیگر کی تلاش جاری ہے۔یاد رہے کہ گزشتہ سال بھی سانگھڑ میں ایک بااثر شخص نے زمین پر گھسنے والے اونٹ کی ٹانگ کاٹ دی تھی جس پر ملک بھر میں شدید غم و غصہ دیکھنے میں آیا تھا۔یہ واقعہ اس بات کا ثبوت ہے کہ جانوروں پر بڑھتے ہوئے مظالم معاشرتی بے حسی اور قانون کے کمزور نفاذ کی عکاسی کرتے ہیں۔ اگر سخت قانونی اقدامات نہ کیے گئے تو ایسے لرزہ خیز واقعات مستقبل میں بھی سامنے آتے رہیں گے۔

سکھر میں سفاکیت کی انتہا، بااثر وڈیرے نے اونٹنی کو بہیمانہ تشدد کا نشانہ بنا ڈالا

کھیت میں گھسنےپر اونٹنی کی ٹانگ توڑ دی گئی،وزیراعلیٰ سندھ کا سخت نوٹس،زخمی اونٹنی کو مزید علاج کیلئے کراچی منتقل کردیا گیا

افغانستان میں طالبان حکومت نے 8 ماہ سے قید معمر برطانوی جوڑے 80سالہ پیٹر رینالڈز اور ان کی اہلیہ76سالہ باربی رینالڈز کو رہا کر دیا،جوڑے کی رہائی قطر کی کامیاب ثالثی کے بعد عمل میں آئی، رہائی کے بعد جوڑے کو دوحہ منتقل کردیا گیا ہے۔ برطانوی میڈیا کے مطابق، دونوں کو رواں سال فروری میں بامیان میں بغیر اطلاع ایک طیارہ استعمال کرنے پر گرفتار کیا گیا تھا۔ دورانِ حراست انہیں چار بار عدالت میں بھی پیش کیا گیا اور ان کی صحت کے حوالے سے شدید تشویش پائی جاتی رہی۔کابل میں قطری سفارتخانے نے رینالڈز جوڑے کو طبی سہولیات، ادویات اور اہلِ خانہ سے رابطے کی سہولت فراہم کی۔ برطانوی حکومت نے اس رہائی کا خیرمقدم کرتے ہوئے قطر کی سفارتی کوششوں کو بھرپور سراہا ہے۔قطر روانگی سے قبل باربی رینالڈز نے میڈیا سے مختصرگفتگو کرتے ہوئے کہا کہ اگر ممکن ہوا تو ہم دوبارہ افغانستان واپس آئیں گے، کیونکہ ہم خود کو افغان سمجھتے ہیں۔ فی الحال سب سے بڑی خواہش اپنے بچوں اور خاندان سے ملنے کی ہے۔ باربی اور پیٹر رینالڈز گزشتہ 18 برس سے افغانستان میں مقیم تھے اور ایک فلاحی ادارہ چلا رہے تھے، جسے طالبان کے اقتدار سنبھالنے کے بعد باضابطہ طور پر کام کی اجازت دی گئی تھی۔افغان وزارتِ خارجہ نے تصدیق کی کہ جوڑے نے افغان قوانین کی خلاف ورزی کی تھی، تاہم مزید تفصیلات نہیں بتائیں۔یہ واقعہ اس حقیقت کی عکاسی کرتا ہے کہ سفارتکاری اور پسِ پردہ رابطے کس طرح سب سے پیچیدہ تنازعات اور انسانی بحرانوں کو حل کر سکتے ہیں۔ قطر نے ایک بار پھر ثابت کیا ہے کہ وہ خطے میں محض ثالث ہی نہیں بلکہ انسانیت کی امید کا ایک اہم ستون بن چکا ہے۔

قطر کی ثالثی کام کرگئی، افغان طالبان نے 8 ماہ بعد برطانوی معمر جوڑے کو رہا کر دیا

80 سالہ پیٹر اور 76 سالہ باربی رینالڈز کوفروری میں گرفتار کیا گیا تھا، رہائی کے بعد دوحہ منتقل

لندن فنڈریزنگ کنسرٹ’ٹوگیدر فار فلسطین‘لندن کے ویمبلے ایرینا میں منعقدہ بڑے فنڈریزنگ کنسرٹ’ٹوگیدر فار فلسطین‘ کے دوران برطانوی اداکار بینڈکٹ کمبربیچ نے معروف فلسطینی شاعر محمود درویش کی نظمOn This Land There Are Reasons to Liveپڑھ کر حاضرین کو اشکبار کردیا۔اس کنسرٹ میں شہریوں نے دل کھول کر عطیات دیے اور 2 ملین ڈالر جمع ہوئے جو فلسطینی امدادی اور فلاحی تنظیموں کو دیے جائیں گے۔تقریب میں 69 فنکاروں اور مقررین نے شرکت کی۔ عالمی شہرت یافتہ گلوکاروں کی پرفارمنسز کے ساتھ فلسطینی فنکار سما عبد الہادی، سینٹ لیوانٹ اور ایلیانا نے بھی دل جیت لیے۔تقریب کی تشہیر میں رِض احمد، بلی آئلش، کلین مرفی اور جاویئر بارڈم سمیت کئی عالمی ستاروں نے حصہ لیا۔ خطاب کرنے والوں میں فلورنس پیو، نکولا کاگلن، مہدی حسن، ایرک کانٹونا اور یو این ایلچی فرانچیسکا البانیز شامل تھے۔مقررین نے فلسطینی عوام کی تکالیف پر خاموش رہنے والی عالمی شخصیات کو تنقید کا نشانہ بنایا، جبکہ بلی آئلش، کلین مرفی اور واخین فینکس نے ویڈیو پیغامات کے ذریعے جنگ بندی کا مطالبہ کیا۔

برطانوی اداکار نے جذباتی انداز میں فلسطین کیلئے نظم پڑھ کر حاضرین کو اشکبار کردیا

کنسرٹ میں شہریوں نے دل کھول کر عطیات دیئے اور 2 ملین ڈالر اکٹھے ہوئے جو فلسطینی امدادی اور فلاحی تنظیموں کو دی جائیں گی

بالی ووڈ کے معروف گلوکار زوبین گارگ سنگاپور میں اسکوبا ڈائیونگ کرنے کے دوران چل بسے۔بھارتی میڈیا رپورٹس کے مطابق ان کی عمر 52 برس تھی۔زوبین گرگ کو بالی ووڈ فلم گینگسٹر کے مقبول گانے’یا علی‘ سے غیر معمولی شہرت ملی، یہ گانا آج بھی مداحوں کے دلوں میں زندہ ہے۔ ان کی اچانک موت نے شوبز انڈسٹری اور چاہنے والوں کو صدمے میں ڈال دیا ہے۔میڈیا رپورٹس کے مطابق زوبین گرگ سنگاپور میں منعقدہ نارتھ ایسٹ انڈیا فیسٹیول میں شرکت کے لیے موجود تھے، جہاں وہ 20 اور 21 ستمبر کو پرفارم کرنے والے تھے۔ اسی دوران اسکوبا ڈائیونگ کرتے وقت انہیں سانس لینے میں دشواری پیش آئی۔ریسکیو ٹیم نے فوری طور پر انہیں پانی سے نکالا اور سی پی آر دے کر اسپتال منتقل کیا، تاہم دوپہر ڈھائی بجے کے قریب وہ جانبر نہ ہو سکے۔زوبین گرگ نے ہندی، بنگالی اور آسام کی زبانوں میں بھی گانے گائے۔ بالی ووڈ میں ان کا سفر فلم گینگسٹر کے ہٹ گانے ’یا علی‘ سے شروع ہوا، جبکہ فلم کرش 3 کے گانے’دل تو ہی بتا‘ سمیت کئی سپر ہٹ نغمے بھی ان کے کریئر کا حصہ رہے۔

بالی ووڈ کے معروف گلوکار زوبین گرگ اسکوبا ڈائیونگ کے دوران چل بسے

’یا علی‘ سے شہرت پانے والے 52 سالہ گلوکار کی موت نے شوبز انڈسٹری اور مداحوں کو صدمے میں ڈال دیا

صدر مملکت آصف علی زرداری نے پاکستانی اور چینی کمپنیوں کے درمیان تین مفاہمت کی یاداشتوں (ایم او یوز) پر دستخط کی تقریب میں شرکت کی۔ ایوان صدر کے پریس ونگ سے جمعہ کو جاری بیان کے مطابق پہلی مفاہمت کی یاداشت لویانگ ماڈرن بائیو ٹیکنالوجیز اور حکومتِ سندھ کے درمیان طے پائی۔صوبائی وزیر ناصر شاہ نے سندھ حکومت کی نمائندگی کی جس کا محور پاکستان کی لائیو سٹاک صنعت کو جدید بنانا ہے۔ دوسری مفاہمت کی یاداشتِ بیجنگ ایشین افریقہ لونگیو اور اے ایس ایم سروسز کے درمیان طے پائی، جو پاکستان میں ایک جدید ٹیکسٹائل انڈسٹریل پارک کی تشہیر اور تعمیر سے متعلق ہے۔تیسری مفاہمت کی یاداشتِ سیچوان چوانکساؤ فائر ٹرکس مینوفیکچرنگ کمپنی اور اے ایس ایم سروسز کے درمیان طے پائی، جو پاکستان کے لیے فائر ٹرکس اور جدید ایمرجنسی آلات کی فراہمی، تقسیم، فروخت اور بعد از فروخت خدمات میں تعاون کا فریم ورک طے کرتی ہے۔ تقریب سے خطاب کرتے ہوئے صدر مملکت آصف علی زرداری نے کہا کہ یہ مفاہمت کی یاداشتیں پاکستان اور چین کے درمیان ان شعبوں میں تعاون کے نئے دروازے کھولیں گی جو براہِ راست پاکستان کی معاشی ترقی اور عوامی بہبود کے لئے معاون ہیں۔ انہوں نے کہا کہ لائیو سٹاک انڈسٹری کو جدید بنانے سے خوراک کے تحفظ میں بہتری آئے گی اور دیہی علاقوں میں روزگار کے مواقع پیدا ہوں گے، ٹیکسٹائل پارک سے صنعتی ترقی اور برآمدات کو فروغ ملے گا، جبکہ فائر ٹرکس اور ایمرجنسی آلات پر شراکت داری سے پاکستان کی آفات کے ردعمل اور کمیونٹیز کے تحفظ کی صلاحیت مضبوط ہوگی۔تقریب میں سینیٹر سلیم مانڈوی والا، چین میں پاکستان کے سفیر اور پاکستان میں چین کے سفیر بھی موجود تھے۔

پاکستان اور چین کے درمیان صنعتی تعاون کی 3 مفاہمتی یادداشتوں پر دستخط

صدر آصف زرداری کے دورہ چین میں صنعتی، زرعی اور عوامی تحفظ کے شعبوں میں تعاون بڑھانے پر اتفاق

ترجمان دفتر خارجہ شفقت علی خان نے کہا ہے کہ پاکستان اور سعودی عرب کے درمیان طے پانے والا تاریخی دفاعی معاہدہ کسی تیسرے ملک کے خلاف نہیں بلکہ خطے میں امن و استحکام کے فروغ کیلئے ہے۔ہفتہ وار پریس بریفنگ میں ترجمان نے بتایا کہ وزیراعظم شہباز شریف نے 17 ستمبر کو سعودی فرمانروا کی دعوت پر سعودی عرب کا دورہ کیا، جہاں ان کا شاندار استقبال کیا گیا۔ اس موقع پر اعلیٰ سطحی سرکاری مذاکرات ہوئے جن میں دونوں ممالک کے وفود نے شرکت کی۔انہوں نے کہا کہ پاکستان اور سعودی عرب کے تعلقات ہمیشہ بھائی چارے اور تعاون کی بنیاد پر استوار رہے ہیں، پاکستانی عوام کو حرمین شریفین سے خصوصی عقیدت ہے۔ 1960 کی دہائی سے دفاعی تعاون دونوں ممالک کے تعلقات کا بنیادی ستون رہا ہے، اور موجودہ قیادت ان روابط کو مزید نئی بلندیوں تک لے جانے کے لیے پرعزم ہے۔ترجمان نے مزید کہا کہ وزیراعظم پاکستان اور سعودی ولی عہد نے اسٹریٹجک دفاعی معاہدے پر دستخط کیے ہیں جو دونوں ممالک کے درمیان دفاعی تعاون کو بڑھانے اور مشترکہ سلامتی کو یقینی بنانے کی عکاسی کرتا ہے۔ اس معاہدے کے تحت کسی ایک ملک پر جارحیت کو دونوں پر حملہ تصور کیا جائے گا۔ان کے مطابق یہ معاہدہ دہائیوں پر محیط شراکت داری کو باضابطہ شکل دیتا ہے اور خالصتاً دفاعی نوعیت کا ہے، جس کا مقصد خطے میں امن و سلامتی کو فروغ دینا ہے۔انہوں نے بتایا کہ دوحا میں اسلامی سربراہی اجلاس ہوا جس میں 50 سے زائد ممالک نے شرکت کی۔ اجلاس میں اسرائیلی جارحیت پر غور کیا گیا اور مشترکہ اعلامیہ منظور کیا گیا، جس میں حملوں کو غیر قانونی اور بلااشتعال قرار دیا گیا۔ پاکستانی وزیر خارجہ نے اجلاس میں اسرائیلی جارحیت کی شدید مذمت کی اور قطر کے ثالثی کردار کو سراہا۔ ساتھ ہی پاکستان نے انسانی حقوق کونسل جنیوا میں بھی معاملہ اٹھاتے ہوئے فوری بحث کا مطالبہ کیا۔

پاک سعودی معاہدہ خالصتاً دفاعی نوعیت کا ہے، کسی تیسرے ملک کیخلاف نہیں ہے، دفتر خارجہ

حالیہ معاہدہ دونوں ممالک کے درمیان مشترکہ سلامتی کو یقینی بناتا ہے، ترجمان شفقت علی خان

پاکستان کی سیکیورٹی اور خطے کی بدلتی صورتحال پر پاک فوج کے اہم انکشافات سامنے آئے ہیں۔ ڈی جی آئی ایس پی آر لیفٹیننٹ جنرل احمد شریف چوہدری نے ایک غیرملکی جریدے کو انٹرویو دیتے ہوئے افغان مہاجرین، دہشتگردی اور بھارتی مداخلت پر کھل کر بات کی۔پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ مستند شواہد موجود ہیں کہ غیرقانونی افغان باشندے ملک میں دہشتگردی اور سنگین جرائم میں ملوث ہیں۔ ان کاکہناتھا کہ امریکی انخلا کے بعد افغانستان میں چھوڑے گئے اسلحہ و گولہ بارود کو دہشتگرد کارروائیوں میں استعمال کیا جا رہا ہے، اور خود امریکا بھی اس پر تشویش ظاہر کر چکا ہے۔جرمن جریدے کو انٹرویو میں ان کا کہنا تھا کہ پاکستان کی ریاست ہر طرح کے غیرریاستی عناصر کو مسترد کرتی ہے، کسی جیش یا مسلح گروہ کو ملک میں برداشت نہیں کیا جا سکتا، اور جہاد کا اعلان صرف ریاست کا حق ہے۔انہوں نے کہا کہ پاکستان نے گزشتہ 40 برس تک لاکھوں افغان مہاجرین کو پناہ دی، لیکن اب ان کی باعزت واپسی کے لیے مربوط اقدامات کیے جا رہے ہیں۔ پاکستان نے انسانی بنیادوں پر انخلا کی ڈیڈ لائن میں کئی بار توسیع بھی کی، تاہم وہ بنیادی وجوہات، یعنی خانہ جنگی اور غیرملکی مداخلت، جن کی وجہ سے مہاجرین پاکستان آئے تھے، اب ختم ہو چکی ہیں۔لیفٹیننٹ جنرل احمد شریف نے بھارت پر بھی کڑی تنقید کی اور کہا کہ بھارت کے اندر بڑھتی ہوئی انتہا پسندی کے نتیجے میں پرتشدد واقعات جنم لے رہے ہیں۔ بھارتی حکومت اپنے اندرونی مسائل کو بیرونی رنگ اور بیرونی معاملات کو اندرونی مسئلہ بنا کر پیش کرتی ہے، جبکہ شواہد موجود ہیں کہ بھارتی ریاستی ادارے، حتیٰ کہ حاضر سروس افسران تک، پاکستان میں دہشتگرد کارروائیوں میں ملوث پائے گئے ہیں۔انہوں نے کہا کہ پاکستان بارہا عالمی سطح پر بھارتی دہشتگردی کے ثبوت پیش کر چکا ہے، اور یہ وقت ہے کہ عالمی برادری مسئلہ کشمیر کے حل کے لیے اپنا کردار ادا کرے۔ ان کے مطابق بھارتی فوج اور ادارے انتہا پسند نظریات کے زیرِ اثر ہیں، جس سے خطے میں امن کو سنگین خطرات لاحق ہیں۔ڈی جی آئی ایس پی آر نے اس بات پر بھی زور دیا کہ پاکستان نے دہشتگردی کے خلاف جنگ میں سب سے آگے رہ کر بے مثال قربانیاں دیں، اور دنیا کو بارہا یاد دلایا کہ اس معرکے میں پاکستان نے فرنٹ لائن اسٹیٹ کا کردار ادا کیا ہے۔

افغان شہری اور بھارتی فوجی پاکستان میں دہشت گردی میں ملوث ہیں، ترجمان پاک فوج

لیفٹیننٹ جنرل احمد شریف چوہدری کا جرمن جریدے کو انٹرویو، دہشتگردی، افغان مہاجرین اور بھارتی پالیسیوں پر واضح مؤقف

اقوام متحدہ کی سلامتی کونسل میں امریکا نے ایک بار پھر غزہ جنگ بندی کی قرارداد ویٹو کر دی۔ میڈیا رپورٹس کے مطابق سلامتی کونسل کے 15 میں سے 14 ارکان نے قرارداد کے حق میں ووٹ دیا، تاہم امریکا نے چھٹی بار اس قرارداد کو مسترد کیا۔پیش کی گئی قرارداد میں غزہ میں فوری، غیر مشروط اور مستقل جنگ بندی کا مطالبہ کیا گیا تھا اور اسرائیل پر زور دیا گیا تھا کہ وہ فلسطینی عوام تک امداد کی ترسیل پر عائد پابندیاں ختم کرے۔یہ قرارداد سلامتی کونسل کے 10 غیر مستقل رکن ممالک نے پیش کی تھی جن میں پاکستان بھی شامل تھا۔واضح رہے کہ امریکا کا یہ اقدام ایسے موقع پر سامنے آیا ہے جب غزہ میں انسانی بحران شدت اختیار کر چکا ہے اور دنیا بھر میں جنگ بندی کے لیے دباؤ بڑھتا جا رہا ہے۔پاکستان سمیت کئی ممالک نے امریکی رویے پر مایوسی کا اظہار کیا ہے۔امریکا کا بار بار ویٹو دراصل عالمی ضمیر پر ایک سوالیہ نشان ہے۔

سلامتی کونسل میں امریکا نے ایک بار پھر غزہ جنگ بندی کی قرارداد ویٹو کردی

سلامتی کونسل کے 15 میں سے 14 ارکان کی حمایت کے باوجود امریکا نے قرارداد مسترد کردی

امریکا نے بھارت ایک اور جھٹکا دے دیا،امریکا نے ایران کی چاہ بہار بندرگاہ پر عائد پابندیوں سے بھارت کو دیا گیا استثنا ختم کرنے کا اعلان کر دیا ہےجس کے نتیجے میں اس منصوبے میں براہِ راست شریک بھارت کو بڑے خطرات لاحق ہو گئے ہیں۔ امریکی محکمہ خارجہ کے مطابق 2018 میں افغانستان کی تعمیرِ نو اور علاقائی تجارت کے فروغ کے لیے دی گئی یہ رعایت 29 ستمبر 2025 سے ختم ہو جائے گی۔ اس تاریخ کے بعد بندرگاہ کو آپریٹ کرنے والے ادارے یا افراد براہِ راست امریکی پابندیوں کی زد میں آئیں گے۔چاہ بہار بندرگاہ، جو ایران کے جنوب مشرقی ساحل پر واقع ہے، بھارت کے لیے اسٹریٹیجک گیٹ وے سمجھی جاتی ہے۔ بھارت نے 2016 میں ایران سے معاہدہ کر کے اس منصوبے میں بھاری سرمایہ کاری شروع کی اور مئی 2025 میں ایک ٹرمینل چلانے کے لیے 10 سالہ معاہدہ بھی کیا۔ اس منصوبے کو پاکستان کی گوادر بندرگاہ کا متبادل قرار دیا جاتا رہا ہے تاکہ بھارت افغانستان اور وسط ایشیا تک تجارتی رسائی حاصل کر سکے۔تاہم نئی امریکی پابندیاں نہ صرف بھارت کے اربوں ڈالر کی سرمایہ کاری کو خطرے میں ڈال رہی ہیں بلکہ اس کی خطے میں بنائی گئی اسٹریٹیجک حکمتِ عملی کو بھی سخت دھچکا پہنچا سکتی ہیں۔ بھارتی میڈیا نے اس پیش رفت کو “تجارتی منصوبوں کے لیے خطرے کی گھنٹی” قرار دیا ہے۔امریکا کے اس فیصلے نے واضح کر دیا ہے کہ خطے کی اسٹریٹیجک بساط پر بھارت کی خواہشات اور منصوبے اب واشنگٹن کی پالیسی کے رحم و کرم پر ہیں۔

امریکا نے بھارت کو ایک اور جھٹکا دیدیا، چاہ بہاربندرگاہ پر پابندیوں سے استثنیٰ ختم

بھارت کے منصوبے خطرے میں،29 ستمبر سے بھارتی کمپنیوں پر پابندیوں کا اطلاق ہوگا

ڈونلڈ ٹرمپ نے ایک اہم اعلان کرتے ہوئے کہا ہے کہ امریکا افغانستان سے بگرام ایئربیس کا کنٹرول دوبارہ حاصل کرنے جا رہا ہے،ہم نے طالبان کو بگرام ایئربیس مفت میں دے دیا لیکن اب ہم اسے واپس لینے کی کوشش کر رہے ہیں۔برطانوی وزیراعظم کیئر اسٹارمر کے ہمراہ پریس کانفرنس میں امریکی صدر ٹرمپ نے کہا کہ ہم اسے واپس لینے کی کوشش کر رہے ہیں کیونکہ انہیں ہم سے چیزیں درکار ہیں، اور ہم وہ بیس واپس چاہتے ہیں۔ٹرمپ نے کہا کہ بگرام ایئربیس امریکی فوج کے لیے اسٹریٹیجک اہمیت رکھتا ہے کیونکہ یہ چین کے اُس علاقے سے محض ایک گھنٹے کی مسافت پر ہے جہاں جوہری ہتھیار تیار کیے جاتے ہیں۔ٹرمپ نےکہا کہ یہ شاید ایک بریکنگ نیوز ہو لیکن ہم اس ائیر بیس کو واپس لینے کی کوشش کررہے ہیں۔امریکی صدرٹرمپ کی جانب سے بگرام ائیر بیس کا ذکرکرتے ہی برطانوی  وزیر اعظم کے چہرے کے تاثرات تبدیل ہوگئے اور وہ حیرت سے صدر ٹرمپ کو دیکھنے لگے۔ٹرمپ نے سابق صدر جو بائیڈن پر تنقید کرتے ہوئے کہا کہ امریکی انخلا کے وقت ہم نے یہ بیس بغیر کسی قیمت کے چھوڑ دیا جو ایک بڑی غلطی تھی۔یہ پہلا موقع ہے کہ طالبان کے ساتھ بگرام کے معاملے پر کسی قسم کے خفیہ مذاکرات کے اشارے سامنے آئے ہیں۔ یاد رہے کہ طالبان 2021 میں امریکی انخلا کے بعد سے بگرام ایئربیس پر قابض ہیں، جو افغانستان میں امریکا کا سب سے بڑا فوجی اڈہ تھا۔اگر امریکا واقعی بگرام واپس لینے کی پالیسی پر عمل کرتا ہے تو یہ نہ صرف طالبان کے ساتھ تعلقات کو ایک نئی سمت دے گا بلکہ خطے میں چین اور روس کے لیے بھی ایک بڑا اسٹریٹیجک پیغام ہوگا۔

امریکی صدر ٹرمپ کا بگرام ایئربیس واپس لینے کا اعلان، برطانوی وزیراعظم حیران

بگرام ایئربیس چین کے جوہری ہتھیاروں کے مرکز سے صرف ایک گھنٹے کی دوری پر واقع ہے،ٹرمپ کاانکشاف

جمیعت علما اسلام کے سربراہ مولانا فضل الرحمان نے پاکستان اور سعودی عرب کے درمیان طے پانے والے اسٹریٹیجک دفاعی معاہدے کا خیرمقدم کیا اور کہا کہ اب دونوں ممالک کو اپنی صلاحیت کے مطابق اسلامی دنیا کی قیادت کے لیے آگے بڑھنا چاہیے۔فضل الرحمان کاکہناتھا کہ پاکستان اور سعودی عرب کے درمیان ہونے والا دفاعی معاہدہ خوش آئند ہے، یہ معاہدہ اسلامی دنیا میں دونوں ممالک کے قیادت کے کردار کو مزید مضبوط بنائے گا۔سندھ امن مارچ کے اختتام پر کراچی میں جلسے کے شرکا سے خطاب کرتے ہوئے ان کا کہنا تھا کہ مسلم ممالک کو موجودہ حالات میں اتحاد کا مظاہرہ کرنا ہوگا۔ انہوں نے کہا کہ فلسطین پر قبضے کی سازشوں کے مقابلے میں ایک جاندار اور واضح مؤقف اپنانا وقت کی ضرورت ہے، جمعیت علما اسلام ہر حال میں فلسطینی عوام کے ساتھ کھڑی ہے۔مولانا فضل الرحمان نے کہا کہ دوحہ میں ہونے والی اسلامی سربراہی کانفرنس نہایت مثبت اور بروقت اقدام ہے، یہ اجلاس اسلامی بلاک کی تشکیل کی طرف عملی قدم ہے، لہٰذا اس کی حوصلہ شکنی کے بجائے حمایت کی جانی چاہیے۔جے یو آئی سربراہ نے مزید کہا کہ جب بھی فلسطین، کشمیر، برما یا دیگر مسلم اقوام کے حقوق کا معاملہ آیا تو پاکستان اور سعودی عرب دونوں اس میں قیادت کے اہل ہیں اور انہیں اپنی صلاحیت کے مطابق اسلامی دنیا کی رہنمائی کرنی چاہیے۔ان کا مزید کہنا تھا کہ جمعیت علما اسلام صرف پاکستان ہی نہیں بلکہ پوری امت مسلمہ کی ترجمان جماعت ہے۔ ہم نے ہر صوبے میں عوام کے حقوق کی بات کی ہے۔ خیبرپختونخوا میں امن کی صورتحال تشویشناک ہے اور بلوچستان میں بدامنی کا راج ہے۔فضل الرحمان نے واضح کیا کہ ہم اسلام آباد کا رخ نہیں کرنا چاہتے لیکن حکومت کا رویہ عوام کو مجبور کر رہا ہے۔

سعودی عرب اور پاکستان کے درمیان دفاعی معاہدہ خوش آئند ہے ، مولانا فضل الرحمن

مولانا فضل الرحمان کا دفاعی معاہدے کا خیرمقدم، سعودی اور پاکستان کو اسلامی دنیا کی قیادت سنبھالنے کی تجویز

ٹی ٹوئنٹی ایشیا کپ کے 11 ویں میچ میں سری لنکا نے افغانستان کو 6 وکٹوں سے شکست دے کرٹورنامنٹ سے باہر کردیا اور سپرفور مرحلے کیلئے کوالیفائی کرلیا ،سری لنکا نے افغانستان کا 170 رنز کا ہدف 4 وکٹوں کے نقصان پر 19 ویں اوور میں حاصل کرلیا۔ابوظبی میں کھیلے گئے میچ میںافغانستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 8 وکٹوں کے نقصان پر 169 رنز بنائے۔ محمد نبی نے صرف 22 گیندوں پر 60 رنز کی شاندار اننگز کھیلی، جس میں 6 چھکے اور 3 چوکے شامل تھے۔ ابراہیم زادران اور راشد خان نے 24،24 رنز بنائے جبکہ صدیق اللہ نے 18 اور رحمان اللہ گرباز نے 14 رنز کا اضافہ کیا۔ سری لنکا کی جانب سے نوان تھوشارا نے 4 کھلاڑیوں کو پویلین کی راہ دکھائی۔جواب میں سری لنکا نے ہدف با آسانی 19ویں اوور میں 4 وکٹوں کے نقصان پر حاصل کر لیا۔ کوشل مینڈس 74 رنز بنا کر ناقابل شکست رہے جبکہ کمندو مینڈس نے 26 رنز کا سہارا دیا۔ کوشل پریرا نے 28 اور اسالنکا نے 17 رنز کی اننگز کھیلی۔اس فتح کے ساتھ ہی افغانستان کا ایونٹ میں سفر ختم ہوگیا جبکہ گروپ بی سے سری لنکا اور بنگلادیش نے سپر فور مرحلے کیلئے کوالیفائی کرلیا۔گروپ بی میں سری لنکا مسلسل 3 میچز میں کامیابی کے ساتھ 6 پوائنٹس حاصل کرکے پہلی پوزیشن پر ہے جبکہ بنگلادیش کے 4 پوائنٹس ہیں۔

ایشیاکپ،سری لنکا نے افغانستان کو 6وکٹوں سےہرا کر ٹورنامنٹ سے باہر کردیا

کوشل مینڈس کی ناقابل شکست 74 رنز کی اننگز نے سری لنکا کو فتح دلادی، افغانستان کا ایشیا کپ میں سفر ختم

امریکا اور برطانیہ نے ایک بڑے ٹیکنالوجی شراکت داری معاہدے پر دستخط کیے ہیں جسے "ٹیک پراسپرٹی ڈیل" کا نام دیا گیا ہے۔ اس معاہدے کا مقصد دونوں ممالک کے درمیان سائنس و ٹیکنالوجی کے شعبوں میں تعاون کو نئی بلندیوں تک لے جانا ہے۔ معاہدے پر دستخط امریکی صدر ڈونلڈ ٹرمپ اور برطانوی وزیراعظم کیئر اسٹارمر نے چیکرز میں ملاقات کے دوران کیے۔معاہدے کے تحت مصنوعی ذہانت (AI)، کوانٹم کمپیوٹنگ، ایٹمی توانائی اور ڈیجیٹل فنانس جیسے شعبوں میں مشترکہ منصوبے شروع کیے جائیں گے۔ دونوں ممالک تحقیق و ترقی کو فروغ دینے، توانائی کی خودکفالت میں اضافہ کرنے اور ماہرین کے درمیان براہِ راست تعاون بڑھانے پر متفق ہوئے ہیں۔برطانوی حکومت کے مطابق، امریکی کمپنیاں برطانیہ میں اربوں پاؤنڈ کی سرمایہ کاری کریں گی۔ اس سرمایہ کاری میں ڈیٹا سینٹرز، سپر کمپیوٹرز اور ایٹمی ری ایکٹرز کے منصوبے شامل ہیں۔ معاہدے کے تحت برطانیہ روسی ایٹمی ایندھن پر انحصار ختم کرنے اور اپنی سپلائی چین کو محفوظ بنانے کے لیے بھی اقدامات کرے گا۔امریکی صدر ڈونلڈ ٹرمپ نے کہا کہ یہ معاہدہ نجی شعبے میں سرمایہ کاری کی نئی لہر پیدا کر رہا ہے اور برطانیہ بھر میں بڑے منصوبے حقیقت کا روپ دھار رہے ہیں۔ ان کا کہنا تھا کہ امریکا اور برطانیہ کے تعلقات ایک قیمتی وراثت ہیں اور یہ شراکت داری دونوں ممالک کے لیے بے پناہ مواقع لے کر آئے گی۔وزیراعظم کیئر اسٹارمر نے اس معاہدے کو برطانیہ کی تاریخ کا سب سے بڑا سرمایہ کاری پیکج قرار دیا۔ ان کے مطابق یہ شراکت داری اٹلانٹک کے دونوں کناروں پر اربوں ڈالر کی آمد و رفت اور ہزاروں نئی ملازمتوں کا سبب بنے گی۔ انہوں نے کہا کہ یہ معاہدہ ٹیکنالوجی، توانائی اور دفاع جیسے شعبوں میں برطانیہ اور امریکا کو عالمی رہنما کے طور پر مزید مضبوط کرے گا۔ماہرین کا کہنا ہے کہ "ٹیک پراسپرٹی ڈیل" نہ صرف دونوں معیشتوں کے لیے فائدہ مند ثابت ہوگی بلکہ دنیا بھر میں ٹیکنالوجی کے نئے رجحانات متعارف کرانے کا ذریعہ بھی بنے گی۔

امریکا اور برطانیہ کا’ٹیک پراسپرٹی ڈیل‘ تاریخی ٹیکنالوجی شراکت داری معاہدہ

مصنوعی ذہانت، توانائی اور کوانٹم کمپیوٹنگ میں اربوں ڈالر کی سرمایہ کاری، ہزاروں نئی ملازمتوں کے مواقع

ٹوکیو میں جاری ورلڈ ایتھلیٹکس چیمپئن شپ میں پاکستان کے اولمپک گولڈ میڈلسٹ ارشد ندیم اور بھارت کے دفاعی چیمپئن نیرج چوپڑا میڈل حاصل کرنے میں ناکام ہوگئے۔فائنل راؤنڈ میں ارشد ندیم نے پہلی کوشش میں 82.73 میٹر اور تیسری کوشش میں 83.75 میٹر کی تھرو کی، تاہم دو مرتبہ فاول ہونے کے باعث وہ ٹاپ 8 میں جگہ نہ بنا سکے اور ابتدائی مرحلے ہی میں میڈل ریس سے باہر ہوگئے۔ ارشد ندیم نے مسلسل فاول تھروز کے بعد کوچ سلمان بٹ سے مشورہ بھی کیا مگر قسمت ان کا ساتھ نہ دے سکی۔بھارت کے نیرج چوپڑا نے 83.65 اور 84.03 میٹر کی تھرو کی، لیکن باقی کوششوں میں ناکامی نے انہیں بھی پوزیشن سے باہر کردیا۔ایونٹ میں ٹرینیڈاڈ کے اولمپک ہیرو کیشورن والکوٹ نے شاندار کارکردگی دکھاتے ہوئے سونے کا تمغہ اپنے نام کیا، گریناڈا کے اینڈرسن پیٹرز نے چاندی اور امریکہ کے کرٹس تھامسن نے کانسی جیتا۔جرمنی کے جولین ویبر نے 86.11 میٹر کی تھرو کی، لیکن بھارت کے نوجوان ایتھلیٹ سچن یادوو نے پہلی ہی کوشش میں اپنے کیریئر کی بہترین 86.27 میٹر کی تھرو کرکے سب کو حیران کردیا۔گزشتہ روز کھیلے گئے کوالیفائنگ راؤنڈ میں ارشد ندیم نے ابتدائی دو کمزور تھروز کے بعد تیسری کوشش میں 85.28 میٹر کی تھرو کرتے ہوئے فائنل کے لیے کوالیفائی کیا تھا۔خیال رہے کہ ارشد ندیم انجری کے باعث اس سے قبل ورلڈ ایتھلیٹکس سلور ٹور اور ڈائمنڈ لیگ میں شرکت نہیں کر سکے تھے۔ رواں سال جون میں انہوں نے پنڈلی کی سرجری کرائی اور بعد ازاں لندن میں ری ہیب مکمل کرنے کے بعد وطن واپس آکر چیمپئن شپ کی تیاری کی تھی۔

ورلڈ ایتھلیٹکس چمپئن شپ، ارشد ندیم اور نیرج چوپڑا میڈل کی دوڑ سے باہر ہوگئے

دفاعی چیمپئن کی حیثیت سے ٹورنامنٹ میں حصہ لینے والے بھارت کے نیرج چوپڑا بھی میڈل کی دوڑ سے باہر

پاکستان اور سعودی عرب کے درمیان ہونے والے اسٹریٹجک باہمی دفاعی معاہدے پر بھارت تشویش کا شکار، ردعمل بھی سامنے آ گیا ہے۔ بھارت نے کہا ہے کہ پاکستان اور سعودی عرب کے درمیان بڑھتے ہوئے تعلقات اور اس پیش رفت (دفاعی معاہدے) کے بارے میں اطلاعات تھیں اور اُن پر غور بھی کیا جا رہا تھا۔بھارتی وزارتِ خارجہ نے یہ بیان پاکستان اور سعودی عرب کے درمیان طے پانے والے اہم سٹریٹجک باہمی دفاعی معاہدے پر ردِعمل دیتے ہوئے جاری کیا ہے کہ معاہدے کا مکمل جائزہ لیں گے۔بھارتی وزارتِ خارجہ کے ترجمان رندھیر جیسوال نے کہا کہ ہمیں پاکستان اور سعودی عرب کے درمیان دفاعی معاملات میں تعاون اور سلامتی سے متعلق سٹرٹیجک باہمی دفاعی معاہدے پر دستخط سے متعلق اطلاعات ملی ہیں۔انہوں نے کہا کہ ہم اس معاہدے کے اثرات کا مطالعہ کریں گے تاکہ یہ دیکھا جا سکے کہ یہ ہماری قومی سلامتی، خطے اور عالمی استحکام پر کس طرح اثرانداز ہوگا، حکومت قومی مفادات کے تحفظ اور ہر سطح پر جامع سلامتی کو یقینی بنانے کے لیے پرعزم ہے۔واضح رہے کہ پاکستان اور سعودی عرب نے دفاعی معاملات میں تعاون اور سلامتی سے متعلق اس معاہدے پر دستخط کیے ہیں جس کے تحت کسی ایک ملک کے خلاف بیرونی جارحیت کو دونوں ملکوں کے خلاف جارحیت تصور کیا جائے گا۔پاکستان اور سعودی عرب کے مابین دفاعی شراکت داری سے متعلق اس معاہدے کا اعلان ایک ایسے وقت میں ہوا ہے جب اسرائیل کی جانب سے قطر کے دارالحکومت دوحہ میں ہونے والے حملے کے بعد سے عرب ممالک میں تشویش پائی جاتی ہے۔

پاکستان،سعودی عرب دفاعی معاہدےنے نئی دہلی کو پریشان کردیا

کھسیانی بلی کھمبا نوچے،پاکستان اور سعودی عرب کی قربت پر بھارت کی جھنجھلاہٹ نمایاں

عمران خان نے چیف جسٹس آف پاکستان یحییٰ آفریدی کو خط لکھ دیا، سابق وزیراعظم کا کہنا ہے کہ اپنے حلف کی پاسداری کریں اور جرات مندانہ فیصلے کریں، آپ کے دلیرانہ فیصلے قوم کی تقدیر کی کتاب میں لکھے جائیں گے۔چیف جسٹس آف پاکستان یحییٰ آفریدی کو لکھے گئے خط میں عمران خان نے کہا ہے کہ انصاف کے دروازے مجھ پر اورمیری اہلیہ پر بند ہیں،سات سو بَہتتر دنوں سے تنہائی کی قید میں ہوں، کمرہ نو بائے گیارہ کا پنجرہ بنا دیا گیا۔عمران خان کااپنے خط میں کہنا ہے کہ 300 سے زائد سیاسی مقدمات قائم کیے گئے، پاکستان کی تاریخ میں ایسی مثال نہیں، بُشریٰ بی بی کی صحت بگڑ رہی ہے لیکن ڈاکٹر کو معائنہ کی اجازت نہیں دی جاتی،وہ علاج سے محروم، ٹی وی، کتابوں، یا باہر کی دنیا سے رابطے سے دور ہیں، نہ ہی اُنہیں علاج کی سہولت دی گئی ہے، پاکستانی قانون خواتین کو ضمانت کیلئے خصوصی رعایت دیتا ہے لیکن بُشریٰ بی بی کے کیس میں یہ اصول معطل کر دیا گیا، صرف اس لیے کہ وہ میری بیوی ہیں، وہ اُنہیں توڑنا چاہتے ہیں لیکن اُنہیں اس طاقت کا اندازہ نہیں جو اُن کے ایمان سے اُنہیں ملتی ہے۔عمران خان کے خط میں مزیدکہا گیا ہے کہ اہلخانہ اور وکلا سے ملاقات کرائی جاتی ہے نہ ہی بیٹوں سے فون پر بات کرنے کا بنیادی حق دیا جا رہا ہے، یہ قید نہیں بلکہ سوچا سمجھا نفسیاتی تشدد ہے تاکہ عوام کا حوصلہ توڑا جا سکے،اُنہوں نے کہا کہ ہزاروں کارکنان اور حامی اب بھی جیلوں میں بند ہیں جبکہ بھانجے حسن نیازی کو فوجی حکام نے حراست میں لے کر اذیت دی اوردس سال قید کی سزا سنائی گئی، بہنوں اور بھانجوں کو بھی ناحق مقدمات اور قید کا سامنا ہے۔عمران خان نے خط میں مؤقف اپنایا کہ جب قانون کی حکمرانی دفن ہو جائے تو قومیں اندرونی زوال کا شکار ہو جاتی ہیں۔، انصاف ذوالفقار بھٹو کیس کی طرح 44 سال بعد نہیں بلکہ وقت پر ملنا چاہئے۔خط میں چیف جسٹس سے اپیل کی گئی کہ بیٹوں سے فون پر بات کرنے کی اجازت دی جائے اوربُشریٰ بی بی کو علاج کے لیے ڈاکٹر تک فوری رسائی فراہم کی جائے۔عمران خان نے کہا کہ پاکستان کے عوام سپریم کورٹ کو انصاف کی آخری پناہ گاہ سمجھتے ہیں اور عدلیہ کی خودمختاری بحال ہونی چاہئے۔عمران خان نے کہا کہ  آج پاکستان فیصلہ کن موڑ پر کھڑا ہے، میں آپ سے گزارش کرتا ہوں کہ آپ اپنے حلف کو پورا کریں اور ثابت کریں کہ پاکستان کی سپریم کورٹ اب بھی انصاف کی آخری پناہ گاہ ہے، سپریم کورٹ بنیادی حقوق کی ضامن ہے، عدلیہ کی آزادی کو بحال کریں، امید ہے آپ حلف کی پاسداری کرتے ہوئے انصاف فراہم کریں گے۔خیال رہےکہ عمران خان کا یہ خط اُن کی بہنیں لے کرسپریم کورٹ پہنچ گئیں۔ سپریم کورٹ کے باہر میڈیا سے گفتگو کرتے ہوئے علیمہ خان نے کہا کہ عمران خان نے چیف جسٹس یحییٰ آفریدی کو خط لکھا ہے۔انہوں نے بتایا کہ بانی پی ٹی آئی کا خط چیف جسٹس کو دینے کے لیے یہاں آئے ہیں۔

انصاف کے دروازے بندہیں، میرا کمرہ پنجرہ بنا دیا گیا، عمران خان نے چیف جسٹس کو خط لکھ دیا

ذوالفقاربھٹو کیس کی طرح 44 سال بعد نہیں بلکہ وقت پر انصاف ملنا چاہیئے، عدلیہ کی آزادی بحال کریں،سابق وزیراعظم

Sri Lanka defeats Hong Kong in Group B clash, as Pathum Nissanka guides his team towards the win with a gritty knock.

Sri Lanka Beats Hong Kong in the Dubai Clash

Pathum Nissanka once again proved to be the main man for Sri Lanka, as he guided his team to a stunning win against Hong Kong. The 8th match of the ACC Men&#39;s T20 Asia Cup 2025 was a thriller, as Hong Kong put on a spirited show in the defense of a decent total.

Sri Lanka opted to bowl first after winning the toss in Dubai. Their decision proved right, as Hong Kong batters didn&rsquo;t find much momentum at the start. The inexperienced opening pair of Hong Kong played cautiously, making sure not to give free wickets to the attacking Sri Lankan bowlers. They scored 42 in the Powerplay while losing just one wicket.

The Hong Kong team decided to keep wickets in hand, hence they didn&rsquo;t try loose shots during the middle overs. However, this strategy also didn&rsquo;t allow them to score big runs during the middle overs, as the Sri Lankan team kept continuous pressure on them.

Anshy Rath found himself struggling throughout the innings, as he made 48 off 46 deliveries. He tried to anchor the innings alongside Nizakat, but failed to convert the start by giving his wicket to Dushmantha Chameera.

Nizakat Khan provided some late fireworks to the Hong Kong team. He played a spirited knock and made a valiant 52 by smacking 4 fours and 2 sixes. Due to his formidable hitting, Hong Kong managed to put on a respectable total of 149 on the scoreboard.

When Sri Lanka came out to chase the target, they found it hard to play freely against Hong Kong bowlers. Kusal Mendis looked completely out of form, as Hong Kong bowlers kept pressure on him from the start. He fell cheaply to Ayush Shukla after making just 11 runs.

Kamil Mishara, who was the star of the last match, also didn&rsquo;t find a strong footing in the middle. He also made just 19 runs and got out to Aizaz Khan at deep midwicket. After that, things became difficult for the Sri Lankan team, as scoring runs against attacking Hong Kong bowlers became hard from both ends.

This was the time when the match became tense, as Hong Kong tried to pull off an unexpected upset. However, the classy hand of Nissanka was still middling the ball nicely, as he was taking the game deep. He played a gritty innings of 68, smashing 6 fours and 2 sixes.

The match then went into the penultimate over, making things complex for both teams. Wanindu Hasaranga kept his nerve and showcased all his experience while hitting the winning runs for Sri Lanka. He made 20 runs off 9 balls, giving Sri Lanka the much-needed thrust in the business end of the innings.

Sri Lanka won the match by four wickets, but they got a reality check that even associate teams can come up with the goods on any given day.

Nissanka Guides Sri Lanka to Win in a Thriller Against Hong Kong

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan