Cricket

Entertainment

News

Football

ایشیا کپ 2025 کے دوسرے میچ میں بھارت نے یواے ای کوباآسانی 9 وکٹوں سے شکست دے کر ایونٹ میں شاندار فاتحانہ آغاز کیا۔دبئی میں کھیلے گئے اس میچ میں بھارتی کپتان سوریا کمار یادیو نے ٹاس جیت کر پہلے فیلڈنگ کا فیصلہ کیا۔ یو اے ای کی ٹیم بھارتی بولرز کے سامنے زیادہ دیر نہ ٹھہر سکی اور صرف 13 اعشاریہ 1 اوورز میں 57 رنز بنا کر پویلین لوٹ گئی۔ اوپنر علیشان 22 اور کپتان وسیم 19 رنز کے ساتھ نمایاں رہے جبکہ باقی بیٹر ڈبل فیگر میں داخل نہ ہوسکے۔بھارت کی جانب سے اسپنر کلدیپ یادیو نے شاندار بولنگ کا مظاہرہ کرتے ہوئے 4 وکٹیں حاصل کیں جبکہ شیوام دوبے نے 3 کھلاڑیوں کو آؤٹ کیا۔بھارت نے یواے ای کی جانب سے دیا گیا58 رنز کا ہدف پانچویں اوورز میں ایک وکٹ کے نقصان پرباآسانی حاصل کرلیا۔ ابھیشیک شرما 30 رنز بنا کر آؤٹ ہوئے، جبکہ شبمن گل 20 اور کپتان سوریا کمار یادیو 7 رنز کے ساتھ ناقابل شکست رہے۔یو اے ای کی جانب سے جنید صدیقی نے ایک وکٹ حاصل کی۔واضح رہے کہ بھارت اور یو اے ای گروپ اے میں شامل ہیں، جبکہ ایونٹ کا سب سے بڑا مقابلہ پاکستان اور بھارت کے درمیان 14 ستمبر کو دبئی میں کھیلا جائے گا۔یاد رہے گزشتہ روز ایشیا کپ کے افتتاحی میچ میں افغانستان نے ہانگ کانگ کو 94 رنز سے شکست دی تھی۔

ٹی20 ایشیا کپ، بھارت نے یو اے ای کوباآسانی 9 وکٹوں سے شکست دے دی

دبئی میں کھیلے گئے میچ میں یو اے ای کی پوری ٹیم صرف 57 رنز پر ڈھیر، بھارت نے ہدف پانچویں اوورز میں حاصل کرلیا

پاکستان نے قطر پر اسرائیلی جارحیت کی شدید مذمت کرتے ہوئے اقوام متحدہ کی سلامتی کونسل کا ہنگامی اجلاس بلانے کا مطالبہ کردیا۔نائب وزیراعظم و وزیر خارجہ اسحاق ڈار نےسماجی رابطے کی ویب سائٹس ایکس پراپنے بیان میں کہا کہ اسرائیل کی قطر کے خلاف بلاشتعال اور غیرقانونی جارحیت کے پیش نظر پاکستان نے الجزائر اور صومالیہ کے ساتھ مل کر اقوام متحدہ کی سلامتی کونسل کا ہنگامی اجلاس طلب کرنے کی درخواست کی ہے۔ انہوں نے کہا کہ یہ معاملہ نہایت سنگین نوعیت کا ہے اور سلامتی کونسل کو فوری طور پر اس پر غور کرنا چاہیے۔اسحاق ڈار نے قطر کی حکومت اور عوام کے ساتھ پاکستان کی مکمل یکجہتی اور غیر متزلزل حمایت کا اعادہ کیا۔یاد رہے کہ وزیراعظم شہباز شریف نے گزشتہ روز امیرِ قطر سے ٹیلیفونک رابطے میں اسرائیلی جارحیت کی مذمت کرتے ہوئے کہا تھا کہ پاکستان ہر سطح پر قطر کے ساتھ کھڑا رہے گا اور اسے تنہا نہیں چھوڑے گا۔

پاکستان نے قطر پر اسرائیلی جارحیت کیخلاف سلامتی کونسل کا ہنگامی اجلاس بلانے کا مطالبہ کردیا

یہ معاملہ نہایت سنگین نوعیت کا ہے اور سلامتی کونسل کو فوری طور پر اس پر غور کرنا چاہیے،نائب وزیراعظم اسحاق ڈار

وزیر اعظم شہباز شریف نے ملک میں ماحولیاتی اور زرعی ایمرجنسی لگانے کا اعلان کر دیا اور کہا کہ وفاق اپنا کردار ادا کرے گا، صوبے بھی اپنا حصہ ڈالیں، سیلاب متاثرین کی بحالی کیلئے ریلیف آپریشن جاری ہے، دعا ہے سندھ میں سیلاب سے زیادہ نقصان نہ ہو۔وزیر اعظم شہباز شریف نے وفاقی کابینہ کے اجلاس میں گفتگو کرتے ہوئے کہا کہ سیلاب نے پورے ملک میں بڑی تباہی مچائی ہے، تقریباً ایک ہزار پاکستانی سیلاب کی نذر ہو چکے ہیں، وفاق اور صوبائی حکومتیں مل کر اس بحران سے نمٹنے کیلئے اپنا کردار ادا کریں،شہباز شریف نے یہ اعتراف بھی کیا کہ سیلاب نے ملک کے کئی حصوں میں تباہی مچا دی ہے، خاص طور پر پنجاب میں فصلیں زیرِ آب ہیں اور سیلاب اب سندھ میں داخل ہو رہا ہے، موسمیاتی تبدیلیوں سے پاکستان اکیلا نہیں نمٹ سکتا۔پنجاب میں ہزاروں ایکڑ فصلیں زیر آب ہیں، اللہ کرے سیلاب سے سندھ میں نقصانات کم ہوں، فصلوں کے نقصانات کا تخمینہ لگایا جائے اور کابینہ میں اس پر غور کیا جائے۔وزیراعظم نے کہا کہ آج کابینہ مشاورت کے بعد ماحولیاتی اور زرعی ایمرجنسی کا اعلان کررہے ہیں اور ساتھ ہی احسن اقبال کی سربراہی میں ایک کمیٹی تشکیل دی جارہی ہے، جس میں متعلقہ وزرا اور سیکریٹریز ہوں گے، تاکہ اس پر کام شروع کیا جاسکے۔انہوں نے کہا کہ جہاں وفاق اس میں اپنا حصہ ڈال رہا ہے، وہی صوبوں کو بھی اس میں اپنا حصہ ڈالنا ہوگا، یہ ملکر ہی ہم اس نقصان کا ازالہ کرسکتے ہیں۔شہباز شریف نے چین میں دوطرفہ اقتصادی اقدامات کی تعریف کی اور کہا کہ میرا حالیہ دورئہ چین بہت کامیاب رہااور اس کے لئے تمام کابینہ کے ارکان، ڈپٹی پرائم منسٹرز اور فارن سیکریٹری کے تعاون کو سراہا۔شہباز شریف نے پاک فوج کے میجر عدنان اسلم کو خراج تحسین پیش کیا جنہوں نے گزشتہ روز ایف سی لائن بنوں میں دہشتگردوں سے لڑتے ہوئے جام شہادت نوش کی تھی۔شہبازشریف نے مزید کہاکہ ہم افواج پاکستان کی قربانیوں کی بدولت آزاد فضا میں سانس لے رہے ہیں لیکن سوشل میڈیا پر کچھ لوگ اداروں اور شہدا کی تضحیک کررہے ہیں جس کی جتنی مذمت کی جائے کم ہے اور ملک کیخلاف پروپیگنڈا کرنے والے فتنے کا مکمل خاتمہ کرنا ہمارا اولین فرض ہے۔شہباز شریف نے کہا کہ ہمارے بہادر میجر عدنان اسلم بنوں میں دہشتگردوں کا مقابلہ کرتےہوئے شہید ہوئے، گزشتہ روز جی ایچ کیو میں ان کی نماز جنازہ میں کل ہم شریک ہوئے، سپہ سالار فیلڈ مارشل سید عاصم منیر بھی موجود تھے۔ان کا کہنا تھا کہ نماز جنازہ کے دوران ہماری شہید کے خاندان کے افراد سے ملاقات ہوئی، ان کے والد نے کہا کہ میرے بیٹے نے شہادت دی ہے جس پر مجھے بہت فخر ہے، ان کے سسر بھی وہاں موجود تھے انہوں نے کہا کہ میرے داماد نے ہمارا سر فخر سے بلند کردیا۔وزیراعظم نے این ڈی ایم اے کو کراچی اور سندھ کے دیگر علاقوں میں سیلاب کے پیش نظر امدادی کارروائیوں کے لیے صوبائی حکومت اور سندھ ڈیزاسٹر مینجمنٹ اتھارٹی سے مکمل تعاون کرنے کی ہدایت کر دی۔وزیراعظم نے کراچی میں متحرک امدادی کارروائیوں پر ریسکیوڈبل ون ڈبل ٹو، پاک فوج اور رینجرز کی پذیرائی کی جبکہ انہوں نے گڈاب ندی میں شہریوں کے ڈوبنے پر اظہار افسوس کیا۔انہوں نے متعلقہ اداروں کو سیلاب میں لاپتہ افراد کو جلد از جلد تلاش کرنے کی ہدایت کر دی۔وزیراعظم کا کہنا تھا کہ عوام کو سیلابی صورتحال سے آگاہ کرنے کے لیے اگاہی مہم کو مزید متحرک کیا جائے تاکہ زیادہ سے زیادہ شہری سیلاب سے بچ سکیں۔شہبازشریف نے مزید کہا کہ کل اسرائیل نے قطر پر سفاکانہ حملہ کیا، اسرائیل نے کل پھر جارحیت کی جس کی جتنی مذمت کی جائے کم ہے، فلسطین میں بچوں، بزرگوں اور خواتین کا قتل عام جاری ہے، کل امیر قطر سے خود بات کی، انہوں نے پاکستان کا شکریہ ادا کیا۔

وزیراعظم شہبازشریف کا ملک میں زرعی اور موسمیاتی ایمرجنسی نافذ کرنے کا اعلان

ہزاروں ایکڑ پر فصلیں زیر آب ہیں، دعا ہے سندھ میں سیلاب سے کم نقصانات ہوں،کابینہ اجلاس سے خطاب

اسلام آباد کی مقامی عدالت نے وزیراعلیٰ خیبر پختونخوا علی امین گنڈاپور کے وارنٹ گرفتاری جاری کردیے،شراب و اسلحہ برآمدگی کیس میں اسلام آباد کی عدالت نے وزیر اعلیٰ خیبر پختونخوا علی امین گنڈاپور کو گرفتار کر کے 17 ستمبر کو عدالت میں پیش کرنے کی ہدایت کر دی۔ڈسٹرکٹ اینڈ سیشن کورٹس میں وزیر اعلیٰ خیبر پختونخوا علی امین گنڈا پور کے خلاف شراب اور اسلحہ برآمدگی کیس کی سماعت ہوئی جوڈیشل مجسٹریٹ مبشر حسن چشتی نے ڈسٹرکٹ اینڈ سیشن کورٹس اسلام آباد میں وزیر اعلیٰ خیبرپختونخوا علی امین گنڈا پور کے خلاف شراب و اسلحہ برآمدگی کیس کی سماعت کی جس میں جوڈیشل مجسٹریٹ مبشر حسن چشتی نے گنڈا پور کے وارنٹ گرفتاری جاری کیے۔ عدالت نے حکم دیا کہ علی امین گنڈا پور کو گرفتار کر کے 17 ستمبر کو عدالت میں پیش کیا جائے۔دوران سماعت عدالت میں ابتدائی طور پرعلی امین گنڈا پور کی جانب سے کوئی عدالت میں پیش نہ ہوا،بعدازاں علیٰ امین گنڈا پور کے شراب و اسلحہ برآمدگی کیس میں وارنٹ گرفتاری جاری ہونے کے بعد ان کے وکیل راجہ ظہور الحسن عدالت میں پیش ہوئے اور جج سے مکالمہ کرتے ہوئے موقف اپنایا کہ سر آپ نے وارنٹ گرفتاری جاری کردیئے۔جج مبشر حسن چشتی نے جواب دیا کہ آپ ملزم پیش کریں میں وارنٹ منسوخ کردوں گا جس پر وکیل راجہ ظہور الحسن نے کہا کہ سر اب تو میڈیا پر چل گیا ہے، ملزم کی سُبکی تو ہو گئی، اس پر معزز جج بولے میں میڈیا کو کیا کہہ سکتا ہوں؟ آپکا کوئی جونیئر بھی آکر تاریخ لے لیتا تو میں کیس رکھ لیتا۔عدالت نے گنڈا پور کے وکیل کی استدعا مسترد کرتے ہوئے وارنٹ گرفتاری برقرار رکھنے کا حکم دیا۔ کیس کی آئندہ سماعت 17 ستمبر مقرر کی گئی ہے۔ یہ مقدمہ تھانہ بارہ کہو میں درج کیا گیا تھا، جس میں وزیر اعلیٰ خیبر پختونخوا علی امین گنڈا پور کو نامزد کیا گیا ہے۔

شراب و اسلحہ برآمدگی کیس، علی امین گنڈا پور کے وارنٹ گرفتاری جاری

وزیراعلیٰ خیبر پختونخواعلی امین گنڈا پور کو گرفتار کر کے 17 ستمبر کو عدالت میں پیش کیا جائے،عدالت

قطر کے وزیراعظم شیخ محمد بن عبدالرحمٰن الثانی نے کہا کہ دوحہ پر اسرائیل کے حملے ریاستی دہشتگردی ہیں جس کا بھرپور جواب دیں گے۔دوحہ میں پریس کانفرنس سے خطاب کرتے ہوئے قطری وزیراعظم نے کہا کہ اسرائیل کا حملہ نہ صرف غیرقانونی اور اشتعال انگیز تھا بلکہ اس کا مقصد غزہ جنگ بندی کی کوششوں کو سبوتاژ کرنا ہے۔انہوں نے کہا کہ واقعے کا وقت اس اجلاس کے ساتھ جڑا تھا جس میں حماس کی مذاکراتی ٹیم امریکی تجاویز پر غور کر رہی تھی۔شیخ محمد نے اعلان کیا کہ قطر اسرائیل کے خلاف قانونی کارروائی کی تیاری کر رہا ہے اور بین الاقوامی سطح پر جوابدہی کے لیے ایک قانونی ٹیم تشکیل دے دی گئی ہے۔ انہوں نے کہا کہ ہم ایک فیصلہ کن موڑ پر کھڑے ہیں اب صرف بیانات نہیں بلکہ عملی اقدامات کا وقت ہے۔اُنہوں نے مزید کہا کہ اسرائیلی وزیراعظم خطے کو جان بوجھ کر افراتفری کی طرف دھکیل رہے ہیں، جبکہ اسرائیلی جارحیت پورے مشرق وسطیٰ کے امن کو خطرے میں ڈال رہی ہے۔قطری وزیراعظم نے اس تاثر کو مسترد کیا کہ قطر نے غزہ جنگ بندی میں ثالثی کا کردار معطل کر دیا ہے۔ ان کا کہنا تھا کہ ہماری ثالثی کی کوششیں جاری ہیں اور کوئی بھی ہمیں اس راستے سے روک نہیں سکتا۔امریکی کردار پر بات کرتے ہوئے انہوں نے واضح کیا کہ امریکا کی جانب سے حملے کی پیشگی اطلاع دیے جانے کی خبروں میں کوئی صداقت نہیں، کیونکہ حملے کے 10 منٹ بعد امریکی حکام نے رابطہ کیا، تاہم ڈرون ریڈار پر نہ آنے کے باعث قطر اسے روکنے میں ناکام رہا۔واضح رہے کہ اسرائیل نے قطر کے دارالحکومت دوحہ پر فضائی حملہ کرکے فلسطین کی مزاحمتی تنظیم حماس کی مرکزی قیادت کو نشانہ بنایا تھا۔

دوحہ پر اسرائیلی حملہ ریاستی دہشت گردی، بھرپور جواب دیا جائے گا،قطر کا دو ٹوک اعلان

امریکا کی جانب سے حملے کی پیشگی اطلاع دیے جانے کی خبروں میں کوئی صداقت نہیں،قطری وزیراعظم

افراتفری کے شکار ملک نیپال میں فوج نے مختلف علاقوں میں پوزیشن سنبھال لی۔پرتشدد مظاہروں اور جلاؤ گھیراؤ کے نتیجے میں حالات سنگین ہو گئے ہیں۔ مظاہرین نے سابق وزیراعظم جھالا ناتھ کھنل کے گھر کو آگ لگا دی، جس کے باعث ان کی اہلیہ جاں بحق ہو گئیں۔غیر ملکی میڈیا کے مطابق سیکیورٹی فورسز اور مظاہرین کے درمیان جھڑپوں میں اب تک 22 افراد ہلاک اور 500 سے زائد زخمی ہو چکے ہیں۔ حکومت کی جانب سے کرفیو کے نفاذ کے باوجود مظاہرین سڑکوں پر موجود ہیں۔دارالحکومت کھٹمنڈو اور دیگر شہروں میں سیاسی رہنماؤں کے گھروں کو بھی نشانہ بنایا گیا۔ سابق وزرائے اعظم پشپا کمل دہل (پراچندا)، شیر بہادر دیوبا اور دیگر رہنماؤں کی رہائش گاہوں پر حملے ہوئے جبکہ لالیت پور جیل سے تمام 1500 قیدی فرار کر گئے۔دوسری جانب فوج نے مختلف علاقوں میں تعیناتی کے بعد حالات پر قابو پانے کی کوششیں تیز کر دی ہیں۔ نیپالی آرمی چیف جنرل اشوک راج نے ویڈیو بیان میں مظاہرین کو مذاکرات کی دعوت دیتے ہوئے کہا کہ فوج قومی اتحاد اور ملکی سلامتی کے تحفظ کے لیے پرعزم ہے۔ انہوں نے مزید کہا کہ مظاہروں میں جانی اور مالی نقصان ہو چکا ہے، مظاہرین تحمل کا مظاہرہ کریں اور قومی یکجہتی و امن و امان کا قیام سب کی مشترکہ ذمہ داری ہے۔واضح رہے کہ نیپال میں نوجوان کرپشن کے خلاف سڑکوں پر نکل آئے تھے، جب حکومت نے سوشل میڈیا سائٹس سمیت 26 ویب سائٹس پر پابندی عائد کی تھی۔ تاہم مظاہروں کے دباؤ کے بعد حکومت نے یہ پابندی ختم کر دی۔نیپال ماضی میں بھی سیاسی عدم استحکام اور حکومتوں کی بار بار تبدیلی کا شکار رہا ہے۔ کرپشن، غربت اور نوجوانوں میں بڑھتی بے چینی نے حالیہ احتجاج کو ایک بڑے بحران میں بدل دیا ہے۔ ماہرین کا کہنا ہے کہ اگر حالات پر قابو نہ پایا گیا تو نیپال خانہ جنگی جیسے خطرناک مرحلے میں داخل ہو سکتا ہے، جس کے اثرات پورے خطے پر پڑیں گے۔

پرتشدد مظاہرے،نیپال میں فوج نے مختلف علاقوں میں پوزیشن سنبھال لی،کھٹمنڈو ایئرپورٹ مکمل بند

لالیت پور کی جیل سے تمام 1500قیدی فرارہوگئے ، متعدد سیاسی رہنمائوں کے گھروں پر بھی حملے،املاک کو نقصان پہنچا

ملک بھر کے بجلی صارفین کے لیے بڑی خوشخبری، نیشنل الیکٹرک پاور ریگولیٹری اتھارٹی (نیپرا) نے بجلی 1 روپیہ 78 پیسے فی یونٹ سستی کرنے کا اعلان کرتے ہوئے نوٹیفکیشن جاری کر دیا۔نیپرا کے مطابق یہ کمی ماہانہ فیول کاسٹ ایڈجسٹمنٹ کی مد میں کی گئی ہے جو جولائی کے لیے لاگو ہوگی۔ اس فیصلے سے صارفین کو ایک ماہ کے لیے ریلیف ملے گا اور یہ سہولت کراچی سمیت پورے ملک کے بجلی صارفین کو حاصل ہوگی۔نوٹیفکیشن کے تحت ڈسکوز اور کے الیکٹرک کے صارفین اس کمی سے فائدہ اٹھا سکیں گے تاہم لائف لائن کنزیومرز، پری پیڈ صارفین اور الیکٹرک وہیکل چارجنگ اسٹیشنز اس ریلیف سے مستفید نہیں ہوں گے۔نیپرا نے وضاحت کی کہ یہ رعایت ستمبر کے بلوں میں شامل ہوگی، جس سے ملک بھر کے لاکھوں صارفین کو وقتی ریلیف ملنے کی توقع ہے۔

بجلی صارفین کے لیے خوشخبری، نیپرا نے فی یونٹ 1 روپیہ 78 پیسے سستی کر دی

کراچی سمیت ملک بھر کے صارفین کو ایک ماہ کے لیے ریلیف، ستمبر کے بلوں میں کمی شامل ہوگی

کراچی میں گزشتہ دو روز کے دوران وقفے وقفے سے ہونے والی مسلسل بارشوں نے شہرِقائد کو شدید متاثر کیا۔ تھڈو ڈیم کے بھرنے اور لٹھ ندی میں طغیانی کے بعد ملیر اور لیاری ندیاں بپھر گئیں، جس سے پانی اطراف کی آبادیوں میں داخل ہو گیا اور کئی علاقے سیلابی صورتِ حال سے دوچار ہیں۔سیلابی ریلے کے باعث ملیر، ایم نائن موٹروے، سہراب گوٹھ، خمیسو گوٹھ، نیو کراچی، سرجانی، مچھر کالونی اور سعدی ٹاؤن سمیت درجنوں علاقے متاثر ہوئے۔ مختلف سوسائٹیاں ڈوب گئیں جبکہ مساجد سے حفاظتی اعلانات شروع کر دیے گئے۔ ایوب گوٹھ، لاسی گوٹھ، حسن منان کالونی اور عیسیٰ نگری میں گھروں کے اندر پانی بھر گیا اور شہری پھنس گئے۔تھڈو ڈیم کے اوور فلو ہونے کے بعد سپر ہائی وے اور اس سے متصل آبادیوں میں پانی داخل ہو گیا۔ نیشنل ہائی وے، گلشن حدید لنک روڈ اور جمالی پل سمیت کئی مقامات پر ندی کا پانی سڑکوں پر آ گیا، جس سے کراچی اور حیدرآباد کا زمینی رابطہ منقطع ہو گیا۔ موٹروے پولیس نے تصدیق کی کہ ایم 9 کا بڑا حصہ زیرِ آب ہے اور پانی موٹروے کی دیوار سے ٹکرا رہا ہے۔ صورتحال پر قابو پانے کے لیے کرش بیریئر ہٹا کر پانی کے بہاؤ کو موڑنے کی کوشش کی جا رہی ہے۔وزیراعلیٰ سندھ کی ہدایت پر کمشنر کراچی نے ریسکیو اور امدادی ٹیموں کو متحرک کر دیا ہے، جبکہ پاک فوج اور رینجرز کے دستے بھی متاثرہ علاقوں میں پہنچ گئے ہیں۔ کشتیوں اور ریسکیو وہیکلز کی مدد سے لوگوں کو محفوظ مقامات پر منتقل کیا جا رہا ہے۔ حسن منان کالونی اور سعدی ٹاؤن میں پھنسے شہریوں کو نکالا گیا، جبکہ بعض مقامات پر گاڑیاں پانی میں بہہ جانے کی اطلاعات بھی ملی ہیں۔میئر کراچی مرتضیٰ وہاب نے رات بھر مختلف علاقوں کا دورہ کیا اور بتایا کہ چیف سیکرٹری کے ذریعے پاک فوج سےمدد طلب کی گئی ہے۔ ضلعی انتظامیہ اور ریسکیو اداروں نے شہر میں رین ایمرجنسی نافذ کر دی ہے۔محکمہ موسمیات کے مطابق گزشتہ 24 گھنٹوں کے دوران سب سے زیادہ بارش سرجانی ٹاؤن میں 129.6 ملی میٹر ریکارڈ کی گئی، نارتھ کراچی میں 72.2 ملی میٹر، کورنگی میں 70.5 ملی میٹر اور ڈی ایچ اے فیز ٹو میں 70 ملی میٹر بارش ہوئی، جبکہ سب سے کم بارش جناح ٹرمینل پر 29 ملی میٹر ریکارڈ کی گئی۔شدید بارشوں اور سیلابی صورتحال کے پیش نظر کمشنر کراچی نے آج شہر کے تمام تعلیمی ادارے بند رکھنے کا اعلان کیا ہے، جبکہ شہریوں کو غیر ضروری سفر سے گریز کرنے کی ہدایت کی گئی ہے۔

کراچی میں بارش، لیاری، ملیر ندیاں بپھر گئیں، پانی آبادیوں میں داخل، موٹر وے اور تعلیمی ادارے بند، ریسکیو کیلیے فوج طلب

صورت حال کے باعث زمینی رابطے منقطع ہوگئے، سوسائٹیوں میں مساجد سے اعلانات کیے گئے۔

ابوظہبی میں کھیلے گئے ٹی20 ایشیا کپ 2025ء کے افتتاحی میچ میں افغانستان نے شاندار کارکردگی کا مظاہرہ کرتے ہوئے ہانگ کانگ کو 94 رنز سے باآسانی شکست دے دی۔ افغانستان کی جانب سے دیے گئے 189 رنز کے تعاقب میں ہانگ کانگ کی ٹیم 9 وکٹوں کے نقصان پر 94 رنز بناسکی۔افغانستان کی بیٹنگ لائن نے ابتدا سے ہی جارحانہ انداز اپنایا، صدیق اللّٰہ اٹل نے ناقابلِ شکست 73 رنز بنائے جبکہ عظمت اللّٰہ عمر زئی نے صرف 21 گیندوں پر 53 رنز کی دھواں دار اننگز کھیل کر میچ کا رخ افغان ٹیم کے حق میں موڑ دیا۔ افغانستان نے مقررہ 20 اوورز میں 6 وکٹ کے نقصان پر 188 رنز اسکور کیے۔ہدف کے تعاقب میں ہانگ کانگ کی پوری ٹیم دباؤ کا شکار نظر آئی اور صرف 94 رنز تک محدود رہی۔ بابر حیات نے 39 رنز بنا کر مزاحمت کی کوشش کی لیکن افغان بولرز کے سامنے زیادہ دیر نہ ٹھہر سکے۔ فضل حق فاروقی اور گلبدین نائب نے دو، دو وکٹیں حاصل کیں جبکہ راشد خان، نور احمد اور عظمت اللّٰہ عمر زئی نے ایک، ایک شکار کیا۔افغان آل راؤنڈر عظمت اللّٰہ عمر زئی کو بیٹنگ اور بولنگ میں شاندار پرفارمنس پر میچ کا بہترین کھلاڑی قرار دیا گیا۔ایونٹ میں پاکستان، بھارت، سری لنکا، افغانستان، بنگلادیش، عمان، یو اے ای اور ہانگ کانگ کی ٹیمیں ایکشن میں ہوں گی۔ سب سے زیادہ انتظار کیا جانے والا میچ پاکستان اور بھارت کے درمیان 14 ستمبر کو کھیلا جائے گا

ٹی20 ایشیا کپ،افغانستان نے ہانگ کانگ کو 94 رنز سے شکست دیدی

افغانستان کی جانب سے دیے گئے 189 رنز کے تعاقب میں ہانگ کانگ کی ٹیم 9 وکٹوں کے نقصان پر 94 رنز بناسکی

اسرائیل کی جانب سے قطر کے دارالحکومت دوحہ میں فضائی حملے کے بعد عالمی سطح پر شدید ردعمل سامنے آیا ہے۔ اسرائیل نے الزام لگایا کہ یہ حملہ حماس کے رہنماؤں کو نشانہ بنانے کے لیے کیا گیا، تاہم حماس نے دعویٰ کیا کہ ان کا کوئی رہنما شہید نہیں ہوا۔اقوام متحدہ کے سیکرٹری جنرل انتونیو گوتریس نے اس حملے کو "قطر کی خودمختاری اور بین الاقوامی قوانین کی کھلی خلاف ورزی" قرار دیا اور خطے میں امن کے لیے خطرناک پیش رفت سے خبردار کیا۔قطر نے سخت ردعمل دیتے ہوئے کہا کہ "یہ بزدلانہ اور مجرمانہ اقدام خطے کی سلامتی سے کھیلنے کے مترادف ہے،" اور عالمی برادری سے فوری کارروائی کا مطالبہ کیا۔سعودی عرب اور متحدہ عرب امارات نے بھی اسرائیلی اقدام کو "بین الاقوامی قانون کی صریح خلاف ورزی" قرار دیتے ہوئے اسے خطے میں امن کے لیے سنگین خطرہ قرار دیا۔ترکی نے بیان جاری کرتے ہوئے کہا کہ یہ حملہ "ریاستی دہشتگردی" کی بدترین مثال ہے اور امن مذاکرات کو نقصان پہنچانے کی دانستہ کوشش ہے۔ایران نے اسرائیل کے اقدام کو "غیر قانونی اور اشتعال انگیز" قرار دیا اور کہا کہ یہ عمل مشرق وسطیٰ میں عدم استحکام کو بڑھا سکتا ہے۔اسی طرح لبنان اور عرب لیگ نے بھی قطر کے حق میں اظہارِ یکجہتی کیا اور اسرائیل کے خلاف فوری عالمی اقدامات کا مطالبہ کیا۔بین الاقوامی سطح پر بھی یہ معاملہ تشویش کا باعث بنا۔ پوپ لیو نے کہا کہ "یہ حملے خطے کی صورتحال کو نہایت سنگین مرحلے میں داخل کر رہے ہیں۔دوسری جانب وزیراعظم شہباز شریف نے قطری دارالحکومت دوحہ میں اسرائیلی حملوں کی شدید الفاظ میں مذمت کرتے ہوئے اسے قطر کی  خود مختاری، علاقائی سالمیت کی اور عالمی قوانین کی کھلم کھلا خلاف ورزی اور خطرناک اشتعال انگیزی قرار دیا ہے۔وزیراعظم شہباز شریف نے امیرِ قطر شیخ تمیم بن حمد الثانی سے ٹیلیفونک رابطہ کیا اور دوحہ میں اسرائیلی بمباری کی شدید مذمت کی۔وزیراعظم نے اسرائیلی حملے میں قیمتی جانوں کے ضیاع اور املاک کے نقصان پر افسوس کا اظہار کرتے ہوئے امیرِ قطر اور عوام سے گہری ہمدردی اور یکجہتی کا اظہار کیا۔وزیراعظم نے کہا کہ اسرائیلی حملہ قطر کی خودمختاری اور سالمیت کی کھلی خلاف ورزی ہے، اسرائیل کے مذموم عزائم خطے کے امن و استحکام کے لیے سنگین خطرہ ہیں۔انہوں نے امیر قطر کو یقین دہانی کرائی کہ پاکستان اسرائیلی جارحیت کے خلاف قطر کے ساتھ چٹان کی طرح کھڑا ہے، اس نازک وقت میں امتِ مسلمہ کو اتحاد پر زور دیا۔امیر قطر نے پاکستان کی حمایت پر تشکر کا اظہار کیا، پاکستان اور قطر کے رہنماؤں نے علاقائی امن و سلامتی کے لیے رابطے میں رہنے پر اتفاق کیا۔

دوحہ پر اسرائیلی حملے پر عالمی برادری برہم، پاکستان سمیت مسلم ممالک اور اقوام متحدہ کی شدید مذمت

اقوام متحدہ، ترکی، سعودی عرب، ایران سمیت عالمی برادری نے حملے کوخودمختاری کی صریح خلاف ورزی قرار دیا

اسرائیل نے ایک بار پھر عالمی قوانین کی دھجیاں اُڑاتے ہوئے قطر کے دارلحکومت دوحہ میں فضائی حملہ کرتے ہوئے حماس کے رہنماوں کو شہید کر دیا جس کی اسرائیلی فوج کی جانب سے تصدیق بھی کر دی گئی جبکہ حماس نے رد عمل جاری کرتے ہوئے کہاہے کہ ان کا کوئی رہنما شہید نہیں ہوا۔رپورٹس کے مطابق اسرائیل نے قطر میں فضائی حملہ کر کے سینئر رہنما خلیل الحیہ کو نشانہ بنانے کا دعویٰ کیا ہے۔اسرائیلی فورسز نے دوحہ کے علاقے قطارہ میں فضائی حملہ کرکے فلسطین کی مزاحمتی تنظیم حماس کے سینیئر رہنما خلیل الحیہ اور ظہیر جبرین کو شہید کردیا۔تل ابیب سے جاری بیان میں اسرائیلی فوج نے دعویٰ کیا ہے کہ دوحہ میں دھماکے کے ذریعے حماس کے سینئر رہنماؤں کو نشانہ بنایا گیا ہے جبکہ حماس نے کہا ہے کہ اجلاس میں موجود حماس کے رہنما اسرائیلی حملے میں محفوظ رہے۔الجزیرہ کے مطابق اسرائیل نے جنگی طیاروں کے ذریعے دوحہ میں حماس کے مذاکراتی وفد کو اجلاس کے دوران نشانہ بنایا ، حماس کے اجلاس میں صدرٹرمپ کی جنگ بندی تجاویز پر غور کیا جا رہا تھا۔ اسرائیلی حملے میں فلسیطینی رہنما ازھر جبار ین شہید ہو گئے ہیں۔عرب میڈیا کے مطابق اسرائیلی حملے میں حماس رہنما خلیل الحیہ شہید بھی شہید ہو گئے ہیں جبکہ اسرائیلی فوج نے دوحہ پر فضائی حملے کی تصدیق بھی کر دی ہے حملے کے وقت حماس کے 5 رہنما اجلاس میں شریک تھے۔اسرائیلی میڈیا نے دعویٰ کیا ہے کہ دوحہ میں حماس رہنماؤں پر حملے سے قبل امریکہ کو آگاہ کر دیا گیا تھا۔عالمی میڈیا کے مطابق اسرائیل نے دوحہ میں جن حماس رہنماؤں کو نشانہ بنایا ان میں خالد مشعل خلیل الحیہ ، ظاہر جبارین، محمد درویش، حسام بدران، طاہر النونو اور موسیٰ ابو مرزوق شامل ہیں ۔دوسری جانب دوحہ میں اسرائیلی فضائی حملے کے بعد قطر کا سخت ردعمل آگیا،قطر نے اسرائیلی حملوں کی مذمت کردی ۔ قطر نے بیا ن میں کہا ہے کہ اسرائیلی حملہ  تمام بین الاقوامی قانون کی صریح خلاف ورزی ہے، قطر اس حملے کی سخت ترین الفاظ میں مذمت کرتا ہے، حماس کے سیاسی بیورو کے ارکان کی رہائشی عمارتوں پر حملہ کیا گیا،  یہ مجرمانہ حملہ عالمی قوانین اور اصولوں کی کھلی خلاف ورزی ہے، حملہ قطری عوام اور مقیم غیرملکیوں کی سلامتی کےلیے سنگین خطرہ ہے، قطر اسرائیل کے اس غیرذمہ دارانہ رویے اور خطے کی سلامتی سے کھیلنے کے عمل کو ہرگز برداشت نہیں کرے گا،  قطر کی سلامتی اور خودمختاری کو نشانہ بنانے والی کوئی کارروائی قابل قبول نہیں، اسرائیلی حملے کی اعلیٰ سطح پر تحقیقات جاری ہیں۔ دوسری جانب حماس نے دوحہ میں اسرائیلی حملے پر رد عمل جاری کرتے ہوئے کہاہے کہ اسرائیلی حملے میں کوئی بھی حماس رکن شہید نہیں ہوا، ملاقات میں شریک ممبران اسرائیل کے قاتلانہ حملے سے بچ گئے، رہنما خلیل الحیہ حملے میں بال بال بچ گئے ہیں ۔دوسری جانب اقوام متحدہ کے سیکرٹری جنرل انتونیو گوتریس نے بھی اس حملے کو "قطر کی سرحدی سالمیت کی صریح خلاف ورزی" قرار دیا۔ مزید برآں، سعودی عرب، ترکی، مصر، اور متحدہ عرب امارات نے ردعمل میں اسرائیل کی شدت پسندی کو سنگین قرار دیا، جبکہ پوپ لیو نے اسے "بہت شدید" صورتحال قرار دیا۔

اسرائیل کا قطر پر فضائی حملہ، حماس کے رہنما نشانے پر، عالمی برادری نے مذمت کر دی

اسرائیل نے جنگی طیاروں کے ذریعے دوحہ میں حماس کے مذاکراتی وفد کو اجلاس کے دوران نشانہ بنایا، الجزیرہ

نیپال میں کرپشن مخالف مظاہرے خانہ جنگی کی شکل اختیار کر گئے۔ دارالحکومت کٹھمنڈو سمیت مختلف شہروں میں مشتعل مظاہرین نے پارلیمنٹ کی عمارت، سپریم کورٹ، وزیراعظم اور وزرا کی رہائش گاہوں کو آگ لگا دی، جبکہ کئی سرکاری عمارتوں اور سیاسی دفاتر پر دھاوا بولا گیا۔جھڑپوں کے دوران پولیس اور عوام کے درمیان شدید تصادم ہوا جس میں 21 افراد ہلاک اور 250 سے زائد زخمی ہوگئے، جن میں پولیس اہلکار بھی شامل ہیں۔صورتحال اس وقت مزید ڈرامائی ہوگئی جب مشتعل ہجوم نے وزیر توانائی دیپک کھڑکا کے گھر میں گھس کر تجوری توڑ دی اور لاکھوں کی رقم سڑکوں پر لٹا دی، جس کی ویڈیو دیکھتے ہی دیکھتے سوشل میڈیا پر وائرل ہوگئی۔ اسی طرح سابق وزیراعظم شیر بہادر دیوبا اور دیگر اہم شخصیات کے گھروں کو بھی نشانہ بنایا گیا۔مظاہرین نے کرفیو کی پروا کیے بغیر پارلیمنٹ پر قبضہ جما لیا اور حکومتی دفاتر میں توڑ پھوڑ کی۔ نیپالی کانگریس پارٹی کے مرکزی دفتر کی کھڑکیاں پتھراؤ سے چکناچور ہوگئیں۔دوسری جانب مستعفی وزیراعظم کے پی شرما اولی کی مبینہ طور پر ملک سے فرار ہونے کی ویڈیو بھی سامنے آگئی، جس میں انہیں ہیلی کاپٹر کے ذریعے دبئی روانہ ہوتے دیکھا جا رہا ہے۔یاد رہے کہ گزشتہ ہفتے حکومت نے فیس بک، انسٹاگرام اور یوٹیوب سمیت متعدد سوشل میڈیا پلیٹ فارمز پر پابندی عائد کی تھی، جس کے خلاف عوامی غصہ پھٹ پڑا۔ احتجاج کے دباؤ پر وزیراعظم اور تین وزرا مستعفی ہو چکے ہیں، مگر عوام بدستور کرپشن کے خلاف بڑے پیمانے پر احتجاج جاری رکھے ہوئے ہیں۔

نیپال میں خانہ جنگی جیسے حالات، پارلیمان، سپریم کورٹ اور وزیراعظم کی رہائش گاہ نذرِ آتش

مشتعل عوام نے پارلیمنٹ پر قبضہ کر لیا، وزیر توانائی کے گھر سے تجوری لوٹ کر پیسے لٹا دیے،ویڈیووائرل

چیئرمین پاکستان پیپلزپارٹی بلاول بھٹو زرداری نے کہا ہے کہ حکومت سندھ سیلاب سے نمٹنے کی مکمل تیاری کر چکی ہے، وفاقی حکومت سیلاب زدگان کی بینظر انکم سپورٹ پروگرام کے ذریعے فوری مالی مدد کرے اور ملک بھر میں زرعی ایمرجنسی نافذ کی جائے۔ بلاول بھٹو زرداری کاکہناتھا کہ پیپلزپارٹی ملک میں نئے ڈیموں کی تعمیر کی حمایت کرتی ہے، تاہم کسی ایسے متنازع ڈیم کے حق میں نہیں ہوں گے جس پر اتفاق رائے نہ ہو۔سکھر بیراج کے دورے کے موقع پر میڈیا سے گفتگو کرتے ہوئے بلاول بھٹو نے کہا کہ پنجاب میں سیلاب کی صورتِ حال زیادہ خطرناک ہے، ملتان، قصور اور جلال پور پیر والا شدید متاثر ہیں، ہزاروں لوگ بے گھر اور ان کے جانور ہلاک ہوئے ہیں۔انہوں نے کہا کہ پنجاب کے عوام دو ہفتے سے امداد کے منتظر ہیں جبکہ سندھ میں سیلابی صورتِ حال سے نمٹنے کی تیاری مکمل ہے۔بلاول بھٹو زرداری نے کہا کہ سیلاب سے گلگت بلتستان، خیبر پختونخوا اور پنجاب سمیت ملک بھر میں بہت نقصان ہوا ہے، پنجاب میں ریلیف کیمپوں میں لوگ موجود ہیں اور آبی ریلے آگے بڑھ رہے ہیں۔انہوں نے کہا کہ وفاقی حکومت کو سیلاب زدہ اضلاع میں بےنظیر انکم سپورٹ کے ذریعے مالی امداد فراہم کرنی چاہیے تھی مگر ایسا اب تک نہیں کیا گیا، وفاق سے مطالبہ ہے کہ بے نظیر انکم سپورٹ پروگرام کے ذریعے متاثرین تک امداد پہنچائی جائے۔بلاول بھٹو نے کچے کے رہائشیوں سے فوری نقل مکانی کی اپیل کرتے ہوئے کہا کہ اچانک کوئی بھی حادثہ ہوسکتا ہے۔ ان کا کہنا تھا کہ سیلاب کے باعث کسان شدید مشکلات میں ہیں، لہٰذا ملک میں زرعی ایمرجنسی نافذ کی جائے تاکہ مستقبل میں فوڈ سکیورٹی کے مسائل نہ بڑھیں۔چیئرمین پیپلزپارٹی نے مزید کہا کہ موسمیاتی تبدیلی کے بعد سب کو پالیسیوں پر نظرثانی کرنا ہوگی۔ صوبے قانون کی حکمرانی اور عوامی مفاد میں مل کر کام کریں، جبکہ دیامر بھاشا ڈیم کے نام پر چندہ مانگنے والے یہ نہ بھولیں کہ اس ڈیم کی بنیاد پیپلزپارٹی نے رکھی تھی۔

سیلاب متاثرین کو فوری امداد، ملک بھر میں زرعی ایمرجنسی نافذ کی جائے،بلاول بھٹو کامطالبہ

پیپلزپارٹی نئے ڈیموں کی حامی مگر متنازع منصوبوں کی مخالف ہے،بلاول کی سکھر میں پریس کانفرنس

نیپال میں سوشل میڈیا پر پابندی لگانا حکومت کے لیے مہنگا ثابت ہوا، ملک بھر میں کرپشن مخالف مظاہرے شدت اختیار کرنے کے بعد وزیراعظم کے پی شرما اولی اپنے عہدے سے مستعفی ہوگئے۔وزیراعظم کے معاون پرکاش سلول نے خبر کی تصدیق کرتے ہوئے بتایا کہ "وزیراعظم نے اپنے عہدے سے استعفیٰ دے دیا ہے۔" یہ فیصلہ اس وقت سامنے آیا جب دارالحکومت کٹھمنڈو سمیت مختلف شہروں میں مظاہرین نے غیر معینہ کرفیو توڑ کر احتجاج کیا اور کئی مقامات پر پولیس سے جھڑپیں ہوئیں۔حکومت کی جانب سے 26 بڑے سوشل میڈیا پلیٹ فارمز، جن میں فیس بک، انسٹاگرام اور یوٹیوب شامل ہیں، پر پابندی عائد کی گئی تھی جسے عوام نے آزادیٔ اظہار پر حملہ قرار دیا۔ احتجاج شدت اختیار کرنے پر پولیس نے مظاہرین کو منتشر کرنے کے لیے آنسو گیس، ربڑ کی گولیاں اور لاٹھی چارج کا استعمال کیا، جس کے نتیجے میں 19 افراد ہلاک اور 100 سے زائد زخمی ہوگئے۔ صورتحال اس وقت مزید بگڑ گئی جب مشتعل ہجوم نے وزیراعظم اولی اور صدر رام چندر پاوڈل کی رہائش گاہوں سمیت سابق وزرائے اعظم پشپا کمل دہال (پرچنڈا) اور شیر بہادر دیوبا کے گھروں پر حملے کیے اور کئی مقامات کو آگ لگا دی۔ مقامی میڈیا کے مطابق بعض وزرا کو فوجی ہیلی کاپٹروں کے ذریعے محفوظ مقامات پر منتقل کیا گیا، جب کہ پارلیمنٹ ہاؤس کو بھی نقصان پہنچا۔نیپال میں جاری احتجاجی مظاہروں کے دوران نوجوانوں نے پارلیمنٹ پر قبضہ جمالیا، کئی سرکاری عمارتوں کو آگ لگادی اور حکومت کے خاتمے پر جشن منایا۔ پرتشدد مظاہروں کے بعد حکومت نے سوشل میڈیا پر عائد پابندی ختم کر دی۔ وزیراعظم اولی نے اپنے آخری خطاب میں کہا کہ نیپال کے مسائل کا حل پرامن مذاکرات میں ہے، تشدد کسی کے بھی مفاد میں نہیں۔"سیاسی تجزیہ کاروں کا کہنا ہے کہ یہ بحران نیپال میں کرپشن، بے روزگاری اور سیاسی عدم استحکام کے خلاف عوامی غصے کی علامت ہے، جس نے حکومت کو گرا دیا۔ اولی کے استعفے کے بعد اب نیپال میں نئے سیاسی بحران کے امکانات بڑھ گئے ہیں اور مختلف جماعتیں آئندہ کا لائحہ عمل طے کرنے میں مصروف ہیں۔نیپال میں یہ بحران اس بات کا واضح پیغام ہے کہ عوامی آواز کو دبانے کے بجائے سننے اور مسائل کا حل مکالمے سے تلاش کرنے کی ضرورت ہے، ورنہ ایک چنگاری پورے نظام کو جلا سکتی ہے۔

سوشل میڈیا پابندی مہنگی پڑ گئی، پرتشدد مظاہروں کے بعدنیپال کے وزیراعظم مستعفی

پرتشدد مظاہروں میں 19 افراد ہلاک، درجنوں زخمی ہوئے تھے، وزرا کو ہیلی کاپٹروں کے ذریعے منتقل کیا گیا

کراچی کے علاقےنیو کراچی میں گارمنٹس فیکٹری میں خوفناک آگ بھڑک اٹھی، آگ بجھانے کے دوران 3 منزلہ عمارت زور دار دھماکے سے گر گئی، جس کے نتیجے میں 5 فائر فائٹرز زخمی ہوگئے۔ریسکیو حکام کے مطابق نیو کراچی سیکٹر 8 اے میں گارمنٹس فیکٹری میں آگ بھڑک اٹھی، واقعے کی اطلاع ملتے ہی محکمہ فائر بریگیڈ کی 2 گاڑیاں موقع پر پہنچ گئیں تاہم آگ کی شدت میں اضافے کے بعد مزید گاڑیوں کو طلب کیا گیا۔محکمہ فائر بریگیڈ اور ریسکیو ڈبل ون ڈبل ٹو کے اہلکار 14 فائر ٹینڈرز، باؤزر اور اسنارکل آگ پر قابو پانے کی کوششوں میں مصروف تھے کہ اس دوران زور دار دھماکے کے بعد عمارت منہدم ہوگئی جس کے ملبے کی زد میں آ کر 5 فائر فائٹر زخمی ہوگئے جن میں 2 کی حالت تشویشناک ہے، جبکہ عمارت کے ملبے تلے مزید افراد کے دبے ہونے کا خدشہ ہے۔ریسکیو ذرائع نے بتایا کہ آگ نے فیکٹری سے متصل زیر تعمیر عمارت کی شٹرنگ کو بھی لپیٹ میں لے لیا، تاہم ریسکیو ٹیموں نے بروقت کارروائی کرتے ہوئے اس پر قابو پا لیا۔ عمارت کے گرنے سے برابر والی بلڈنگ کو بھی معمولی نقصان پہنچا ہے۔حکام کے مطابق فیکٹری کی عمارت میں آگ لگنے سے اس کی بنیادیں کمزور ہوگئیں جس کے باعث دھماکے کے ساتھ عمارت منہدم ہوئی۔کراچی میں آتشزدگی کے بڑھتے واقعات شہریوں اور انتظامیہ کے لیے خطرے کی گھنٹی ہیں، ماہرین کا کہنا ہے کہ فیکٹریوں میں حفاظتی اقدامات نہ ہونے کے باعث ہر سال قیمتی جانیں اور املاک ضائع ہو رہی ہیں۔

نیو کراچی میں گارمنٹس فیکٹری میں خوفناک آتشزدگی، 3 منزلہ عمارت دھماکے سے منہدم

ریسکیو آپریشن کے دوران عمارت گرنے سے 5 فائر فائٹر زخمی، 2 کی حالت نازک، ملبے تلے مزید افراد دبے ہونے کا خدشہ

ایشیا کپ 2025 کا انتظار ختم ہوگیا۔ متحدہ عرب امارات میں ایونٹ کی شاندار ٹرافی کی رونمائی کر دی گئی جس میں تمام شریک ٹیموں کے کپتانوں نے شرکت کی۔ تقریب میں ایشین کرکٹ کونسل کے صدر محسن نقوی نے ٹرافی کی نقاب کشائی کی، جبکہ میڈیا سینٹر پر بھی خوب گہما گہمی دیکھنے کو ملی۔تقریب کا سب سے یادگار لمحہ پاکستان کے کپتان سلمان علی آغا اور بھارتی کپتان سوریا کمار یادیو کی مصافحہ اور نظروں کا تبادلہ رہا جو فوری طور پر میڈیا کا فوکس بن گیا۔ پریس کانفرنس کے دوران کپتانوں نے صحافیوں کے سوالات کے جواب دیے، ان کی باڈی لینگویج اور مسکراہٹوں نے محفل کا رنگ مزید بڑھا دیا۔پاکستانی کپتان سلمان علی آغا نے کہا کہ ٹیم بھرپور تیاری کے ساتھ ایشیا کپ میں حصہ لے رہی ہے، ہمیں یو اے ای کی کنڈیشنز کا تجربہ ہے اور ہم پورے اعتماد کے ساتھ میدان میں اتریں گے۔ انہوں نے پاک بھارت میچ پر کہا کہ کوئی خاص ہدایت نہیں ملی، بس اپنی گیم پر فوکس رکھیں گے کیونکہ ٹی ٹوئنٹی فارمیٹ میں کوئی بھی ٹیم فیورٹ نہیں ہوتی۔بھارتی کپتان سوریا کمار یادیو نے بھی جوش و جذبے کا اظہار کرتے ہوئے کہا کہ ایشیا کپ ہمارے لیے بڑا موقع ہے، افغانستان سمیت سب ٹیمیں مضبوط ہیں اور اس فارمیٹ میں کچھ بھی ہو سکتا ہے۔افغانستان کے کپتان راشد خان نے کہا کہ ہماری نظریں سخت محنت پر ہیں، ہم کئی بار بدقسمتی کا شکار رہے لیکن اس بار پورا زور لگائیں گے۔ سیمی فائنل یا فائنل کی سوچنے کے بجائے ہر میچ کو جیتنا ہدف ہے۔میزبان یو اے ای کے کپتان محمد وسیم نے کہا کہ بڑے کھلاڑیوں کے ساتھ کھیلنے کا تجربہ کام آئے گا، ایشیا کپ کے لیے بہت محنت کی ہے اور چاہیں گے کہ ہر میچ میں بہترین پرفارم کریں۔عمان کے کپتان نے پہلی بار ایشیا کپ کھیلنے کو تاریخی لمحہ قرار دیا جبکہ بنگلہ دیشی کپتان نے کہا کہ پچھلی فتوحات نے ٹیم کو اعتماد دیا ہے اور ایشیا کپ میں اچھی کارکردگی دکھا کر آگے بڑھنے کی کوشش کریں گے۔کرکٹ ماہرین کے مطابق ایشیا کپ 2025 کا یہ ایڈیشن دبئی میں شائقین کے لیے ایک نیا جوش اور جنون لے کر آیا ہے جہاں ہر میچ کرکٹ کا تہوار ثابت ہوگا۔ایشیا کپ 2025 کے آغاز سے قبل ہی دبئی میں موجود یہ ماحول اس بات کا عندیہ دے رہا ہے کہ اس بار ٹورنامنٹ میں کرکٹ کے ساتھ ساتھ جذبات اور جوش و خروش بھی عروج پر ہوگا۔

انتظار کی گھڑیاں ختم، ایشیا کپ 2025 کی شاندار ٹرافی کی رونمائی کر دی گئی

دبئی میں ہونے والی تقریب میں تمام ٹیموں کے کپتان شریک، پاکستان اور بھارت کے کپتانوں کی ملاقات مرکزِ نگاہ رہی

بالی ووڈ اداکارہ ارمیلا مٹونڈکر نے ایک بار پھر مداحوں کو حیران کر دیا۔ اپنی بلاک بسٹر فلم رنگیلا کے مشہور گانے ’’رنگیلا رے‘‘ پر 30 سال بعد رقص کرتے ہوئے ان کی ویڈیو وائرل ہوگئی ہے۔ارمیلا نے یہ ویڈیو اپنے آفیشل انسٹاگرام پر شیئر کی، جس میں وہ آسمانی اور سفید رنگ کے خوبصورت لباس میں اسی گانے پر ڈانس کرتی نظر آ رہی ہیں۔ یہ ویڈیو دیکھتے ہی دیکھتے سوشل میڈیا پر وائرل ہوگئی۔1995 میں ریلیز ہونے والی رنگیلا، رام گوپال ورما کی ہدایت کاری میں بننے والی ایک بڑی کامیابی تھی، اور اس کا گانا ’’رنگیلا رے‘‘ آج بھی فلمی موسیقی کا یادگار حصہ سمجھا جاتا ہے۔ویڈیو کے کمنٹس سیکشن میں مداحوں نے اداکارہ کی فٹنس اور خوبصورتی کی تعریف کرتے ہوئے کہا کہ لگتا ہی نہیں وہ 51 برس کی ہیں۔ کئی مداحوں نے لکھا کہ ارمیلا نے وقت کو جیسے مات دے دی ہو۔ارمیلا کی یہ پرفارمنس اس بات کا ثبوت ہے کہ اصل فن کبھی پرانا نہیں ہوتا، بلکہ وقت کے ساتھ اور بھی نکھر جاتا ہے۔

ارمیلا کی’رنگیلا رے‘ پر ڈانس کی ویڈیو وائرل، 51 سالہ اداکارہ کی فٹنس پر مداحوں کے تبصرے

بالی ووڈ اداکارہ ارمیلا نے یہ ویڈیو اپنے آفیشل انسٹاگرام پر شیئر کی، جس میں وہ ڈانس کرتی نظر آ رہی ہیں

فرانس کے وزیراعظم فرانسوا بیرو کو پارلیمنٹ سے اعتماد کا ووٹ نہ مل سکا۔فرانس میں وزیرِاعظم فرانسوا بایرو کی حکومت صرف 9 ماہ بعد ہی ختم ہو گئی،فرانس کی پارلیمنٹ نے وزیراعظم فرانسوا بیرو اور ان کی اقلیتی حکومت کو اعتماد کی ووٹ میں شکست دے کر برطرف کر دیا۔ یہ فیصلے نے یورو زون کی دوسری بڑی معیشت میں سیاسی بحران کو مزید بڑھا دیا۔فرانسوا بیرو نے نو ماہ قبل یہ عہدہ سنبھالا تھا اور اپنی حکومت کے دوران قرض کم کرنے کے منصوبے پیش کیے۔ اس منصوبے میں تقریباً 44 ارب یورو (52 ارب ڈالر) کی مالی بچت شامل تھی۔پارلیمنٹ میں ہونے والی ووٹنگ میں 364 ارکان نے حکومت کے خلاف ووٹ دیا، جبکہ 194 ارکان نے حمایت کی۔ اسپیکر یا ایل براؤن-پیویٹ نے کہا کہ آئین کے آرٹیکل 50 کے تحت وزیراعظم اپنی حکومت کا استعفیٰ جمع کرائیں گے۔فرانسوا بیرو صدر ایمانوئل مکرون کے دور حکومت کے دوران چھٹے وزیراعظم ہیں اور 2022 کے بعد پانچویں وزیراعظم ہیں۔ ان کی برطرفی کے بعد صدر مکرون کو داخلی سطح پر نیا چیلنج درپیش ہے، جبکہ وہ یوکرین جنگ پر سفارتی کوششیں بھی کر رہے ہیں۔صدرمیکرون پر اپوزیشن کی طرف سے پارلیمنٹ تحلیل کرنے اور استعفیٰ دینے کے مطالبات بھی سامنے آئے، لیکن انہوں نے اعلان کیا ہے کہ آئندہ چند دنوں میں نئے وزیراعظم کی تقرری کریں گے۔ماہرین کے مطابق حکومت کی تبدیلی اور سیاسی بحران یورو زون کی معیشت پر منفی اثر ڈال سکتا ہے، کیونکہ فرانس اس خطے کی دوسری بڑی معیشت ہے اور اس کا استحکام پورے یورپی مالیاتی نظام کے لیے اہم ہے۔

فرانس کے وزیراعظم فرانسوا بیرو پارلیمنٹ سے برطرف، سیاسی بحران شدت اختیار کر گیا

پارلیمنٹ میں ہونے والی ووٹنگ میں 364 ارکان نے حکومت کیخلاف ووٹ دیا، جبکہ 194 ارکان نے حمایت کی

اسرائیلی وزیراعظم بنیامین نیتن یاہو نے فلسطینیوں کو فوری طور پر غزہ خالی کرنے کی دھمکی دیتے ہوئے کہا ہے کہ غزہ کے لوگ فوری طور پر نکل جائیں۔ نیتن یاہو نےسماجی رابطے کی ویب سائٹ ایکس پراپنے ایک ویڈیو پیغام میں غزہ کے شہریوں کو دھمکی دیتے ہوئے کہا ہے کہ وہ فوری طور پر علاقے کو خالی کر دیں، کیونکہ اسرائیلی فوج آنے والے دنوں میں بڑے پیمانے پر آپریشن کرنے والی ہے۔نیتن یاہو کے مطابق گزشتہ دو روز میں 50 بلند و بالا عمارتوں کو تباہ کیا جا چکا ہے اور یہ کارروائیاں صرف ابتدائی مرحلہ ہیں۔ ان کا کہنا تھا کہ غزہ شہر میں زمینی آپریشن کو مزید شدت دی جائے گی جبکہ فضائی حملوں میں بھی اضافہ ہوگا۔دوسری جانب اسرائیلی وزیرِ دفاع اسرائیل کاتز نے اپنے بیان میں کہا کہ غزہ کے آسمانوں پر طوفان آنے والا ہے اور دہشت گردوں کے ٹاورز زمین بوس ہو جائیں گے۔" ان کا کہنا تھا کہ یہ حماس کے جنگجوؤں کے لیے آخری وارننگ ہے یرغمالیوں کو رہا کرو ورنہ غزہ کا مکمل صفایا کر دیا جائے گا۔عالمی ماہرین کا کہنا ہے کہ اسرائیلی قیادت کے سخت بیانات خطے میں مزید انسانی المیہ جنم دے سکتے ہیں۔

اسرائیلی وزیراعظم نیتن یاہو کی فلسطینیوں کو فوری طور پر غزہ خالی کرنے کی دھمکی

دو دن میں 50 بلند عمارتیں گرا دی ہیں، یہ صرف آغاز ہے مزید فضائی و زمینی کارروائی ہوگی،اسرائیلی وزیراعظم

سندھ پر اثر انداز مون سون سسٹم ڈیپ ڈپریشن میں تبدیل ہو گیا۔ماہرین موسمیات نے کراچی میں آج موسلا دھار بارش کی پیش گوئی کرتے ہوئے اربن فلڈنگ کے خطرے سے خبردار کیا ہے۔محکمہ موسمیات کے مطابق آج شہر میں بارش کے 4 سے 6 اسپیل متوقع ہیں، جن میں بعض مقامات پر 100 ملی میٹر سے زائد بارش ہو سکتی ہے۔یہ موسمی نظام بھارت کی جانب سے سندھ میں داخل ہو رہا ہے جس کا راستہ غیر واضح ہے، اسی وجہ سے بارش کی شدت مختلف علاقوں میں مختلف رہنے کا امکان ہے۔شدید بارشوں کے باعث اربن فلڈنگ کے خدشات ظاہر کیے گئے ہیں۔ گزشتہ روز بارش کے بعد ملیر ندی میں برسوں بعد سیلابی صورتحال پیدا ہو گئی۔ اسی صورتحال کے پیشِ نظر جناح سندھ میڈیکل یونیورسٹی نے تمام امتحانات ملتوی کر دیے ہیں اور ورک فرام ہوم پالیسی نافذ کرتے ہوئے کلاسز آن لائن لینے کا اعلان کیا ہے۔ یونیورسٹی انتظامیہ کے مطابق یہ فیصلہ طلباء اور اسٹاف کی حفاظت کو مدنظر رکھتے ہوئے کیا گیا۔شہرِقائدمیں گزشتہ روز سے ہلکی اور تیز بارش کا سلسلہ وقفے وقفے سے جاری ہے جس کے باعث نشیبی علاقوں میں پانی جمع ہو گیا ہے۔ محکمہ موسمیات اور ضلعی انتظامیہ نے شہریوں سے اپیل کی ہے کہ وہ غیر ضروری سفر سے اجتناب کریں، بجلی کے کھمبوں اور ننگی تاروں سے دور رہیں اور گہرے پانی والے علاقوں میں جانے سے گریز کریں۔ شہریوں کو ہدایت کی گئی ہے کہ ہنگامی صورتحال میں فوری طور پر ریسکیو اداروں سے رابطہ کریں۔دوسری جانب میئر کراچی بیرسٹر مرتضیٰ وہاب نے کراچی کے شہریوں سے اپیل کی ہے کہ اگر زیادہ بارش ہو تو فوری طور پر اپنے دفاتر، فیکٹریوں یا گھروں سے باہر نہ نکلیں۔میڈیا سے گفتگو میں میئر کراچی نے کہا کہ بارش کے دوران مختلف مقامات پر رش بڑھ جانے سے افراتفری کی کیفیت پیدا ہوجاتی ہے۔

کراچی میں آج موسلا دھار بارش کی پیش گوئی، 100 ملی میٹر سے زائد بارش کا امکان

آج شہر میں بارش کے 4 سے 6 اسپیل متوقع ہیں، جن میں بعض مقامات پر 100 ملی میٹر سے زائد بارش ہو سکتی ہے

پی سی بی نے اعلان کیا ہے کہ پاکستان اور سری لنکا کے درمیان تین میچوں پر مشتمل ون ڈے سیریز رواں سال نومبر میں راولپنڈی کرکٹ اسٹیڈیم میں کھیلی جائے گی۔سیریز کا آغاز 11 نومبر 2025 کو پہلے ون ڈے سے ہوگا، دوسرا میچ 13 نومبر کو اور تیسرا ون ڈے 15 نومبر کو کھیلا جائے گا۔ یہ پاکستان میں سری لنکا کی پہلی دو طرفہ ون ڈے سیریز ہوگی جو 2019 کے بعد کھیلی جا رہی ہے۔یاد رہے کہ 2019 کی ون ڈے سیریز میں سرفراز احمد کی قیادت میں پاکستان نے 0-2 سے کامیابی حاصل کی تھی، جبکہ پہلا میچ بارش کی نذر ہوگیا تھا۔ سری لنکن ٹیم نے آخری بار 2023 کے ایشیا کپ کے دوران پاکستان کا دورہ کیا تھا، جہاں لاہور میں افغانستان کے خلاف میچ کھیلا تھا۔اس سیریز کے بعد سری لنکا پاکستان میں ایک اور ایونٹ میں بھی حصہ لے گا۔ 17 سے 29 نومبر تک پاکستان، سری لنکا اور افغانستان کے درمیان ٹی ٹوئنٹی ٹرائی سیریز ہوگی، جس کا فائنل لاہور کے قذافی اسٹیڈیم میں شیڈول ہے۔پاکستان کے شائقینِ کرکٹ اب ایک بار پھر ہوم گراؤنڈ پر انٹرنیشنل کرکٹ کے بھرپور انعقاد کے منتظر ہیں۔

پاکستان اور سری لنکا کے درمیان ون ڈے سیریز کا اعلان، میچز راولپنڈی میں ہوں گے

سیریز کا آغاز 11 نومبر 2025 کو پہلے ون ڈے سے ہوگا، دوسرا میچ 13 نومبر کو اور تیسرا ون ڈے 15 نومبر کو کھیلا جائے گا

Newcastle United have just confirmed the signing of Malick Thiaw, the 24 year old German defender from AC Milan

Newcastle Snaps Up German Defender Malick Thiaw from AC Milan

Newcastle United have just confirmed the signing of Malick Thiaw, the 24 year old German defender from AC Milan. He is the third big signing for the club this summer window.

The transfer fee is understood to be around &pound;34.6 million, though with bonuses and add-ons, the figure could climb to roughly &euro;40 million. Both clubs signed off on the deal earlier this week, and Thiaw will wear the No. 12 shirt for the Magpies.

Thiaw spent the past three seasons in Italy, making 85 appearances in all competitions for Milan. In that time, he helped the club lift the Supercoppa Italiana and even grabbed a memorable goal in the Champions League against Real Madrid.

Capped three times by Germany, Thiaw is known for his ability to slot into several defensive roles. While naturally a centre-back, he can also fill in at right-back or sit in front of the defence as a holding midfielder&mdash;qualities that will give Eddie Howe greater flexibility in his squad.

Speaking about the move, Howe said: &ldquo;We&rsquo;re really pleased to have Malick on board. He&rsquo;s a player I&rsquo;ve admired for a long time and somebody who will add real quality to our defensive options.&rdquo;

Thanks to his youthful age, experience in one of the top teams in the league, and adaptability, Thiaw will be playing a key role as Newcastle prepare for another season in the Champions League. Newcastle want to improve the core squad and this signing is a great way for them to stay ahead of the competition in the long run.

Newcastle Snaps Up German Defender Malick Thiaw from AC Milan

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan