Cricket

Entertainment

Football

لاہور(این این آئی)پاکستان ریلویز نے مسافروں کی سہولت کیلئے جدید ٹیکنالوجی کی حامل بزنس ٹرین متعارف کروانے کا فیصلہ کیا ہے۔وزیر اعظم شہباز شریف جدید ٹرین کا افتتاح 19 جولائی کو لاہور اسٹیشن پر کریں گے۔ریلوے حکام کے مطابق کراچی اور لاہور کے درمیان پہلے سے چلنے والی پاک بزنس ٹرین کو اَپ گریڈ کیا گیا ہے، جو 28 نئی ڈیجیٹل چائنیز کوچز پر مشتمل ہوں گی۔جدید بزنس ٹرین میں مسافروں کی سہولت کے لیے مفت وائی فائی اور بین الاقوامی معیار کے مطابق تیار کردہ ڈائننگ کار شامل ہوگی۔ٹرین کے کرایہ میں اضافہ کیا جائے گا یا نہیں اس حوالے سے ریلوے حکام کی جانب سے تاحال کوئی معلومات فراہم نہیں کی گئی۔واضح رہے کہ پاکستان ریلویز اپنے نظام کو بھی جدید کر رہی ہے، اس حوالے سے ٹکٹوں کی آن لائن بکنگ اور لائیو ٹریکنگ ایپ کو مزید اپ گریڈ کر رہی ہے۔اسی طرح، لاہور ریلوے اسٹیشن پر مسافروں کی سہولت کے لیے ایسکلیٹرز (برقی سیڑھیاں) نصب کر دی گئی ہیں۔ وزیر ریلوے نے 40 ریلوے اسٹیشنوں پر مفت وائی فائی کی سہولت بطور پائلٹ پراجیکٹ فراہم کرنے کا اعلان بھی کر رکھا ہے۔

پاکستان ریلوے نے جدید ترین بزنس ٹرین متعارف کروانے کا اعلان کردیا

وزیر اعظم شہباز شریف جدید ٹرین کا افتتاح 19 جولائی کو لاہور اسٹیشن پر کریں گے

بانی پی ٹی آئی عمران خان نے پارٹی قیادت کو ہدایت کی ہے کہ ذاتی اختلافات ختم کریں اور سارا فوکس تحریک پر رکھیں۔عمران خان کاکہناہے کہ لاہور اجلاس کے حوالے سے پارٹی کے اندر اختلافات پیدا کرنے کی دانستہ کوشش کی جا رہی ہے، اس وقت ذاتی اختلافات کو ختم کر کے ساری توجہ تحریک پر مرکوز رکھنے کی ضرورت ہے۔ جو اختلافات پیدا کرے گا میں اسے خود دیکھ لوں گا۔یہ بات ان کی ہمشیرہ علیمہ خان نے عمران خان سے اڈیالہ جیل میں ملاقات کے بعد میڈیا سے گفتگو کرتے ہوئے کہی۔ ان کے ہمراہ عظمیٰ خان اور نورین خان بھی موجود تھیں۔علیمہ خان نے کہا کہ بانی نے دو پیغامات دئیے ہیں اور کہا ہے ان کے ساتھ اور بشری بی بی کے ساتھ ظلم ہورہا ہے میرے ٹی وی اور اخبارات بند کیے ہوئے ہیں، سپرنٹنڈنٹ جیل اور کرنل صاحب نے انسانی حقوق ختم کیے ہوئے ہیں میرے ساتھ ہوئے سلوک کا حساب ہونا چاہیے، یہ سب ایک شخص کے کہنے پر کیا جارہا ہے۔علیمہ خان کے مطابق عمران خان نے کہا کہ لاہور اجلاس کو لے کر پارٹی میں اختلاف جان بوجھ کر پیدا کیا جارہا ہے، ذاتی اختلافات ختم کریں اور سارا فوکس تحریک پر رکھیں، تین سو پارلیمینٹیرینز لاہور مل کے جانے پر خوشی ہوئی، جو اختلاف پیدا کرے گا پارٹی میں اس کو میں خود دیکھ لوں گا، ہم جیلوں میں بیٹھے ہیں آپ اختلافات پیدا کررہے ہیں۔علیمہ خان نے کہا کہ ہم یہاں دو سال سے جیل آرہے ہیں، ہماری فیملی پارٹی کے فیصلوں کے ساتھ کھڑی ہے، ہماری فیملی چاہتی ہے بانی کے پیغامات پر عمل درآمد ہو، ہمیں اب راستہ بنانا ہے بانی کی رہائی کا سپرنٹنڈنٹ جیل بانی کے ساتھ غیر انسانی سلوک ختم کریں۔علیمہ خان نے مزید کہاکہ ان کی فیملی گزشتہ 2 سال سے جیلوں کے چکر لگا رہی ہے اور وہ پارٹی کے ہر فیصلے کے ساتھ کھڑی ہے۔ ’اب وقت ہے کہ عمران خان کے دیے گئے پیغامات پر عملدرآمد کیا جائے اور ان کی رہائی کے لیے راہ ہموار کی جائے۔علیمہ خان نے کہا کہ بانی کا مطلب یہ ہے کہ پارلیمینٹیرینز کو فیصلہ کرنا ہے سیاست میں رہنا ہے کہ نہیں، مذاکرات کس بات پر کرنے ہیں بانی کے کیسز سنیں بات ختم ہوجائے گی۔اس موقع پر اپوزیشن لیڈر پنجاب اسمبلی ملک احمد خان بھچر نے کہا کہ لاہور میں پانچ اگست تک ہماری تحریک چلتی رہے گی،26 ارکان اسمبلی کے حوالے سے اسپیکر صاحب سے میٹنگ ہوئی ہے، اپوزیشن کو احتجاج سے نہیں روکا جاسکتا۔سیکرٹری جنرل پی ٹی آئی سلمان اکرم راجہ کا کہنا تھا کہ بانی کی واضح ہدایات ہیں ہم نے لاہور اجلاس سے متعلق میڈیا پر مزید بات کرنی ہے، پیسے کی وجہ سے پارٹی کسی کو ٹکٹ نہیں دے گی، ہم سب نے اب ملکر اکٹھے چلنا ہے۔

ذاتی اختلافات ختم کرو، تحریک پر فوکس کرو،عمران خان کی پارٹی قیادت کو دو ٹوک ہدایت

ہم جیل میں بیٹھے ہیں، آپ اختلافات پیدا کر رہے ہیں؟ اختلاف پیدا کرنے والے کو میں خود دیکھ لوں گا، عمران خان

لاہور اور گردونواح میں شدید بارشوں نے تباہی مچا دی، جس کے نتیجے میں مختلف حادثات میں 10 افراد جان کی بازی ہار گئے۔ پنجاب کے دیگر علاقوں میں بھی افسوسناک واقعات پیش آئے۔ٹھوکر نیاز بیگ کے قریب مریدوال گاؤں میں ایک مکان کی چھت گرنے سے 5 افراد جاں بحق جبکہ دو زخمی ہو گئے، جنہیں فوری طور پر جناح اسپتال منتقل کر دیا گیا۔ کوٹ جمال پورہ اور دیگر مقامات پر بھی چھتیں گرنے کے واقعات میں متعدد اموات ہوئیں۔ہربنس پورہ کے برف خانہ اسٹاپ پر افسوسناک واقعہ پیش آیا، جہاں دو کم عمر بچے بجلی کا کرنٹ لگنے سے جاں بحق ہو گئے۔ اسی طرح بہاولنگر میں بجلی کا کھمبا گرنے سے ایک بچہ جان سے گیا۔اوکاڑہ، پاکپتن اور منچن آباد میں بھی چھتیں گرنے کے واقعات رپورٹ ہوئے جن میں بچوں سمیت کم از کم 6 افراد جان کی بازی ہار گئے۔ ان تمام سانحات نے بارش کی شدت اور حکومتی نظام کی کمزوریوں کو عیاں کر دیا ہے۔لاہور اور گردونواح میں رات بھر وقفے وقفے سے موسلا دھار بارش سے متعدد شاہراہیں تالاب کا منظر پیش کرنے لگیں۔واسا لاہور کی جانب سے جاری کردہ اعداد و شمار کے مطابق شہر میں سب سے زیادہ بارش 171 ملی میٹر پانی والا تالاب کے علاقے میں ریکارڈ کی گئی۔ دیگر علاقوں میں بھی بارش کا سلسلہ شدید رہا، فرخ آباد میں 157، اقبال ٹاؤن میں 169، مغلپورہ 135، تاجپورہ 167، اور اپر مال میں 162 ملی میٹر بارش ریکارڈ کی گئی۔ایم ڈی واسا غفران احمد کے مطابق، نکاسی آب کے عمل کو مسلسل مانیٹر کیا جا رہا ہے، تاہم کئی اہم شاہراہیں تاحال زیرِ آب ہیں اور شہریوں کو شدید مشکلات کا سامنا ہے۔

مون سون کا زوردارا سپیل، لاہور میں مختلف حادثات میں 10 افراد جاں بحق

لاہور اور گردونواح میں رات بھر وقفے وقفے سےموسلا دھار بارش سے متعدد شاہراہیں تالاب کا منظر پیش کرنے لگیں

حکومت نے پیٹرولیم مصنوعات کی قیمتوں میں ایک بار پھربڑا اضافہ کردیا،وزارت خزانہ کی جانب سے جاری نوٹی فکیشن کے مطابق پیٹرول کی قیمت میں 5 روپے 36 پیسے فی لیٹر اور ہائی اسپیڈ ڈیزل کی قیمت میں 11 روپے 37 پیسے فی لیٹر کا اضافہ کیا گیا ہے۔ اعلامیے کے مطابق حکومت نے اوگرا اور متعلقہ وزارتوں کی تجویز پر اگلے 15 روز کے لیے پیٹرولیم مصنوعات کی قیمتوں میں اضافہ کردیا ہے۔قیمتوں میں اضافے کے بعد فی لٹر پٹرول کی قیمت 272 روپے 15 پیسے اور ہائی اسپیڈ ڈیزل کی قیمت 284 روپے 35 پیسے ہوگئی۔جبکہ اس سے قبل پٹرول کی قیمت266 روپے79پیسے اوراورڈیزل کی قیمت279 روپے98پیسے تھی۔پیٹرولیم مصنوعات کی قیمتوں میں اضافے کے اعلان کے بعد اس کا اطلاق 16سے31جولائی تک کے لیے ہے۔علاوہ ازیں ذرائع کا کہنا ہے کہ مٹی کے تیل کی قیمت میں3روپے 10 پیسے فی لیٹر کمی جبکہ لائٹ ڈیزل آئل کی قیمت میں ایک روپیہ 85 پیسے فی لیٹر کمی کی گئی ہے۔

رات گئے حکومت نے پٹرول بم گرادیا، پیٹرولیم مصنوعات کی قیمتوں میں ایک بار پھر اضافہ

پیٹرول کی قیمت میں 5 روپے 36 پیسے فی لیٹر اور ہائی اسپیڈ ڈیزل کی قیمت میں 11 روپے 37 پیسے فی لیٹر کا اضافہ کیا گیا ہے،نوٹیفکیشن

اڈیالا جیل انتظامیہ کا کہنا ہےکہ بانی پی ٹی آئی عمران خان کو جیل میں بی کلاس کی تمام سہولیات حاصل ہیں،عمران خان کے تمام اعضاء رئیسہ کا معائنہ کیا  جاتا ہے، بانی پی ٹی آئی مکمل صحت مند ہیں ، ان کے اعضاء رئیسہ مقررہ معیار کے مطابق ہیں۔ سپریٹنڈنٹ اڈیالہ جیل عبدالغفور انجم کی جانب سے   عمران خان کی جیل سہولیات سے متعلق تحریری وضاحت جاری کر دی گئی۔سینٹرل جیل راولپنڈی کے سپرنٹنڈنٹ کی جانب سے جاری کردہ وضاحتی بیان میں کہا گیا ہے کہ عمران خان کو جیل میں بی کلاس کے تمام سہولیات قانون و ضابطے کے مطابق فراہم کی جا رہی ہیں اور ان کے ساتھ کسی بھی قسم کا امتیازی سلوک روا نہیں رکھا جا رہا۔بیان کے مطابق عمران خان کو 7 سیلز پر مشتمل علیحدہ کمپلیکس میں رکھا گیا ہے جہاں ان کے لیے کھلا صحن، واک، ایکسرسائز بائیک، ایل ای ڈی، اخبارات اور ذاتی انتخاب کی کتابیں دستیاب ہیں۔ انہیں اپنی پسند کے مطابق ناشتہ، دوپہر اور رات کا کھانا تیار کرنے کے لیے ایک قیدی باورچی بھی مہیا کیا گیا ہے، جبکہ ایسی سہولیات دیگر بی کلاس قیدیوں کو حاصل نہیں۔جیل انتظامیہ کے مطابق بانی پی ٹی آئی نے جیل میں قید کے دوران اب تک 413 مرتبہ سوشل میڈیا پلیٹ فارم ’ ایکس‘پر پیغامات جاری کروائے، جن میں انہوں نے پارٹی رہنماؤں کو سیاسی سرگرمیوں، انتخابات، حکومت سے مذاکرات اور آئینی ترامیم سے متعلق ہدایات دیں۔ اگست 2024 سے اب تک ان کے بیانات 145 مرتبہ قومی میڈیا کی شہ سرخیاں بنے، علاوہ ازیں وہ 10 بین الاقوامی میڈیا اداروں سے بھی رابطے میں رہے جن میں رائٹرز، فاکس نیوز، آئی ٹی وی، وال اسٹریٹ جرنل اور دیگر شامل ہیں۔ وہ روزانہ کی بنیاد پر جیل میں ہونے والی عدالتی سماعتوں کے دوران میڈیا نمائندوں سے براہ راست مخاطب ہوتے رہے ہیں۔گزشتہ 3 ماہ میںعمران خان سے 66 افراد کی ملاقاتیں ہوئیں، جن میں ان کے اہلِ خانہ، سیاسی ساتھی اور وکلاء شامل تھے۔ ان کے لیے متعین جیل ڈاکٹرز روزانہ 3 مرتبہ طبی معائنہ کرتے ہیں، اور حالیہ 2 ہفتوں میں ان کی صحت مکمل طور پر تسلی بخش قرار دی گئی ہے۔جیل انتظامیہ نے سوشل میڈیا اور بعض سیاسی حلقوں کی جانب سے بانی پی ٹی آئی کو سہولیات نہ ملنے سے متعلق دعوؤں کو بے بنیاد اور گمراہ کن قرار دیتے ہوئے کہا ہے کہ یہ صرف سنسنی پھیلانے اور سیاسی فائدے کے لیے پھیلائی گئی افواہیں ہیں۔جیل انتظامیہ نے کہا کہ بانی پی ٹی آئی کو جیل میں تمام تر سہولیات قانون کے مطابق دی جا رہی ہیں، ان کی صحت، سیکیورٹی اور حقوق کا مکمل خیال رکھا جا رہا ہے، اور وہ دیگر قیدیوں کی نسبت کہیں زیادہ مراعات کے حامل ہیں۔

عمران خان سے متعلق پھیلائی جانیوالی افواہوں میں کوئی صداقت نہیں، اڈیالاجیل انتظامیہ

عمران خان مکمل صحت مند ہیں، ان کے تمام اعضاء رئیسہ کا معائنہ کیا جاتا ہے ،سپرنٹنڈنٹ اڈیالہ جیل

ایشیائی ترقیاتی بینک کی رپورٹ میں انکشاف کیا گیا ہے کہ ٹیلی کام سیکٹر پر خطے میں سب سے زیادہ ٹیکسز پاکستان میں ہیں۔ ایشیائی ترقیاتی بینک نے کہا ہے کہ پاکستان میں ٹیلی کام سیکٹر پر خطے میں سب سے زیادہ ٹیکس نافذ ہیں، پاکستان میں 4 جی کوریج خطے میں سب سے کم ہے اور 5 جی کے لیے تیاری بھی ناکافی ہے۔اے ڈی بی نے  حکومت سے سفارش کی ہے کہ وہ تمام ڈیجیٹل لین دین پر یکساں 5 فیصد جنرل سیلز ٹیکس (جی ایس ٹی) نافذ کرے تاکہ ملک بھر میں ڈیجیٹل ادائیگیوں اور ای کامرس پلیٹ فارمز کو فروغ دیا جا سکے، نقدی سے متعلقہ غیر مؤثر طریقہ کار کو کم کیا جا سکے اور معیشت کو دستاویزی شکل دی جا سکے۔ایشیائی ترقیاتی بینک نے پاکستان کے ڈیجیٹل ایکو سسٹم اور سٹیٹس پر رپورٹ جاری کی ہے جس کے مطابق پاکستان میں ڈیجیٹل ایکو سسٹم کو مزید سرمایہ کاری کی ضرورت ہے، پاکستان کے ڈیجیٹل سیکٹر کا جی ڈی پی میں حصہ صرف 1.5 فیصد ہے۔اے ڈی بی نےاپنی رپورٹ میں خبردار کیا ہے کہ ملک میں ڈیجیٹل انفرااسٹرکچر پر بھاری اور غیر مستقل ٹیکس غیر ملکی سرمایہ کاری، ترقی اور ڈیجیٹل خدمات کے پھیلاؤ کے لیے سنگین خطرہ ہیں۔رپورٹ میں کہا گیا ہے’ پاکستان کے ڈیجیٹل انفرا اسٹرکچر کو زیادہ ٹیکسیشن سے بڑا چیلنج درپیش ہے، اس شعبے پر وفاقی اور صوبائی سطح پر عائد ٹیکس دنیا اور خطے میں سب سے زیادہ ہیں اور ٹیکس پالیسیاں عام طور پر مستقل نہیں رہتیں۔رپورٹ میں بتایا گیا ہے کہ پاکستان میں خواتین و غریب طبقے کیلئے انٹرنیٹ ڈیوائسز خریدنا بڑا چیلنج ہے، پاکستان میں فکسڈ براڈ بینڈ رسائی صرف 1.3 فیصد ہے، فائبر آپٹک نیٹ ورک کی رسائی محدود ہے اور اس میں فوری توسیع ناگزیر ہے۔رپورٹ کے مطابق پاکستان میں 80 فیصد آبادی کو موبائل انٹرنیٹ کی رسائی ہے مگراستعمال بہت کم ہے، 86 فیصد مردوں اور 53 فیصد خواتین کے پاس موبائل موجود ہیں، 53 فیصد مردوں اور 33 فیصد خواتین کو انٹرنیٹ رسائی حاصل ہے۔ٹیلی کام سرمایہ کاری کیلئے سازگار ماحول کی ضرورت ہے، پسماندہ علاقوں میں فائبر آپٹکس بچھانے پر توجہ دینے کی ضرورت ہے، صوبے اسکولوں،اسپتالوں میں فائبر براڈ بینڈ کی طلب بڑھائیں۔ ڈیجیٹل حکمرانی کے لیے سائبر سیکیورٹی فریم ورک ضروری ہے، خواتین کیلئے ڈیجیٹل لٹریسی پروگرام اور سستے سمارٹ فونز فراہم کیے جائیں، ای گورننس کے لیے ڈیٹا گورننس، سروس ڈیزائن اپ گریڈ کرنے کی ضرورت ہے۔ایشیائی ترقیاتی بینک نے کہا کہ زرعی ویلیو چین اور ایس ایم ایز کی ڈیجیٹلائزیشن سے جی ڈی پی میں اضافہ ہو سکتا ہے، دیہی علاقوں میں خواتین و نوجوانوں کو آن لائن بزنس سکھایا جائے۔رپورٹ  کے مطابق پاکستان کی ٹیلی کمیونیکیشن مارکیٹ کا حجم 4 ارب 52 کروڑ ڈالر ہے جو 2029 تک بڑھ کر 5ارب 32 کروڑ ڈالر تک پہنچ  جائے گا، مگر گزشتہ 5 سال کے دوران ڈیجیٹل انفرا اسٹرکچر اور نیٹ ورک اپ گریڈ میں سرمایہ کاری کم ترین رہی،جس کی وجہ مسلسل سیاسی عدم استحکام تھی۔رپورٹ میں مزید بتایا گیاہے کہ  حکومت نے تھری جی اسپیکٹرم میں کوئی اخراجات نہیں کیے جب کہ دنیا کے 101 ملکوں میں کمرشل فائیو جی سروسز شروع ہو چکی ہے اور پاکستان فور جی کی ترویج اور فائیو جی اسپیکٹرم کے اجرا میں بہت پیچھے ہے۔اپنی سفارشات میں اے ڈی بی نے کہا کہ ’ تمام براہ راست اور بالواسطہ ڈیجیٹل انفرااسٹرکچر ٹیکسز کو معقول بنایا جائے، انہیں دیگر ممالک کے مقابلے میں مسابقتی بنایا جائے، اور کم از کم 10 سال کے لیے اس شعبے کے ٹیکس ریٹس کو مقرر کیا جائے۔

ٹیلی کام سیکٹر پرخطے میں سب سے زیادہ ٹیکسزپاکستان میں نافذ ہیں،ایشیائی ترقیاتی بینک

پاکستان میں ڈیجیٹل سیکٹر کا ملک کی مجموعی قومی پیداوار (جی ڈی پی) میں حصہ صرف 1.5فیصد ہے،رپورٹ

چینی پرٹیکس چھوٹ نے IMF کو ناراض کر دیا حکومت کا ’فوڈ ایمرجنسی‘ کا بہانہ ناکام ہوگیا،آئی ایم ایف نے پاکستان کی جانب سے چینی کی درآمد پر دی گئی ٹیکس چھوٹ پر شدید تحفظات کا اظہار کرتے ہوئے اسے 7 ارب ڈالر قرض پروگرام کی شرائط کی صریح خلاف ورزی قرار دیا ہے۔آئی ایم ایف نے پاکستان کا فوڈ ایمرجنسی کا مؤقف بھی مسترد کردیا ہے جب کہ عالمی مالیاتی ادارے کی جانب سے 7 ارب ڈالر پروگرام کی خلاف ورزی پر تشویش بھی ظاہر کی جا رہی ہے۔نجی ٹی وی کی رپورٹ میں ذرائع کے حوالے سے بتایا گیا ہے کہ آئی ایم ایف نے نہ صرف ان اقدامات پر گہری تشویش کا اظہار کیا ہے بلکہ پاکستان کی جانب سے پیش کیا گیا ’فوڈ ایمرجنسی‘کا جواز بھی مسترد کر دیا ہے، جسے عالمی ادارے نے وعدوں کی صریح خلاف ورزی قرار دیا ہے۔حکومت پاکستان نے حالیہ ہفتوں میں چینی کی بڑھتی ہوئی قیمتوں کو جواز بنا کر 5 لاکھ ٹن چینی درآمد کرنے کی اجازت دی، جس کے ساتھ تمام درآمدی ٹیکسز، بشمول ڈیوٹی، سیلز ٹیکس اور ودہولڈنگ ٹیکس میں نرمی کی گئی۔ ایف بی آر نے صرف صفراعشاریہ پچیس فیصد ٹیکس مقرر کر کے درآمدات کو مکمل طور پر سبسڈی نما ریلیف دیا جب کہ وزارت خزانہ نے اس فیصلے کی مخالفت کی تھی۔ذرائع کا کہنا ہے کہ کابینہ نے وزارت خزانہ کی واضح مخالفت کے باوجود سمری منظور کر لی، جس کے بعد چینی کی قیمت مارکیٹ میں تیزی سے بڑھی اور پہلی بار 200 روپے فی کلو کی حد عبور کر گئی۔ اس اقدام نے نہ صرف مہنگائی میں اضافہ کیا بلکہ خود حکومت کے بیانیے کو بھی کمزور کیا، جو مسلسل  میکرو اکنامک استحکام کا دعویٰ کر رہی تھی۔آئی ایم ایف کے حکام کے نزدیک چینی پر ٹیکس چھوٹ کا یہ فیصلہ سبسڈی نما رعایت کے زمرے میں آتا ہے، جو موجودہ 7 ارب ڈالر کے اسٹینڈ بائی معاہدے کی شرائط کے منافی ہے۔ معاہدے کے تحت پاکستان نئی ٹیکس چھوٹ یا سبسڈی متعارف نہیں کر سکتا جب تک وہ آئی ایم ایف سے پیشگی منظوری نہ لے۔ذرائع کے مطابق آئی ایم ایف نے اس معاملے پر باضابطہ اعتراض اٹھایا ہے اور حکومت پاکستان سے وضاحت طلب کی ہے کہ کس بنیاد پر فوڈ ایمرجنسی کی اصطلاح استعمال کی گئی جبکہ حقیقی بنیادوں پر ایسی کوئی ہنگامی صورت حال نہیں تھی جو ٹیکس چھوٹ کو جواز فراہم کرے۔دوسری جانب ٹریڈنگ کارپوریشن آف پاکستان نے 3 لاکھ ٹن چینی کی درآمد کے لیے ٹینڈر جاری کر دیا ہے جس کی آخری تاریخ 18 جولائی مقرر کی گئی ہے۔ وفاقی حکومت اب اس فیصلے پر نظر ثانی کر رہی ہے اور ممکنہ طور پر ٹیکس چھوٹ کو جزوی یا مکمل طور پر واپس لینے کے آپشنز پر غور کیا جا رہا ہے تاکہ آئی ایم ایف کے ساتھ پیدا ہونے والی کشیدگی کو کم کیا جا سکے۔اسی دوران پاکستان شوگر ملز ایسوسی ایشن نے آئندہ کرشنگ سیزن کے آغاز پر آمادگی ظاہر کر دی ہے، جس سے آئندہ مہینوں میں مقامی چینی کی دستیابی کی صورت حال بہتر ہونے کی امید ہے۔ماہرین کا کہنا ہے کہ اس وقت تک چینی کی قیمتیں عام صارف کے لیے ناقابل برداشت حد تک پہنچ چکی ہیں اور فوری ریلیف کے لیے حکومتی سطح پر شفاف اور مستقل حکمت عملی کی ضرورت ہے۔ذرائع کا بتانا ہےکہ آئی ایم ایف کے تحفظات کے بعد حکومت نے چینی کی درآمد پر دی گئی ٹیکس چھوٹ واپس لینے پر غور شروع کردیا ہے اور چینی درآمد کا فیصلہ مکمل طور پر ختم کیے جانے کا بھی امکان ہے۔واضح رہے کہ ملک میں چینی کی قیمت تاریخ میں پہلی بار 200 روپے فی کلو سے تجاوز کرچکی ہے، حکومت نے چینی کی قیمتوں میں استحکام لانے کے لیے 5 لاکھ میٹرک ٹن چینی کی درآمد پر تمام ڈیوٹیز معاف کردی تھیں۔

ٹیکس چھوٹ نے آئی ایم ایف کو ناراض کر دیا، حکومت کا ’فوڈ ایمرجنسی‘ کا بہانہ ناکام

آئی ایم ایف کا چینی پر ٹیکس رعایت پر اعتراض، فوڈ ایمرجنسی کی وضاحت کومستردکردیا

پاکستان اور روس کے درمیان مال بردار ٹرین آئندہ ماہ چلانے کا اعلان کر دیا گیا۔پاکستان اور روس کے درمیان بڑھتے ہوئے تعلقات کا ایک نیا دور دیکھنے کو مل رہا ہے، پاکستان اور روس کے درمیان مال بردار ٹرین چلانے کی تیاریاں آخری مراحل میں داخل ہو چکی ہیں، لاہور سے روس تک مال بردارٹرین چلائی جائے گی۔دفتر خارجہ حکام کے مطابق مال بردار ٹرین کا پائلٹ پراجیکٹ اگست میں شروع کیا جائے گا، پہلی مال بردار ٹرین 16 بوگیوں پر مشتمل ہوگی جو ایران ترکمانستان اور قازقستان سے ہوتے ہوئے روس پہنچے گی، مال بردار ریل گاڑی سے مختلف اشیا روس، ترکمانستان اور قازقستان سے پاکستان پہنچیں گی۔حکام کے مطابق اس اقدام سے جنوبی ایشیا اور وسطی ایشیا کے درمیان تجارت کو مزید فروغ ملے گا اور روزگار کے مواقع پیدا ہوں گے۔یادر ہے کہ چند دن پہلے وزیر اعظم کے معاون خصوصی طارق فاطمی نے معاون خصوصی برائے صنعت و پیداوار ہارون اختر کے ساتھ روس کا دورہ کیا تھا جس میں پاکستان اور روس نے پاکستان سٹیل ملز کی بحالی کے پروٹوکول پر دستخط بھی کیے تھے۔

پاکستان اور روس کے درمیان مال بردار ٹرین آئندہ سے ماہ چلانے کا اعلان

مال بردار ٹرین کا پائلٹ پراجیکٹ اگست میں شروع کیا جائے گا، پہلی مال بردار ٹرین 16 بوگیوں پر مشتمل ہوگی،دفتر خارجہ

آج سے اسٹڈی اور ورک ویزا پر سفر کرنے والوں کو فزیکل ویزا اسٹکر کی ضرورت نہیں رہے گی،برطانوی حکومت نے پاکستان سے برطانیہ جانے والے طلبہ اور ورک ویزا ہولڈرز کے لیے ویزا نظام میں بڑی تبدیلی کا اعلان کرتے ہوئے آج سے پاسپورٹ میں ویزا اسٹیکر کی شرط ختم کر دی ہے۔ اب زیادہ تر اسٹوڈنٹس اور ورک ویزا درخواست دہندگان کو فزیکل ویزا کے بجائے’’ای ویزا‘‘ جاری کیا جائے گا، جو برطانیہ میں ان کے امیگریشن اسٹیٹس کا آن لائن ریکارڈ ہوگا۔کستان میں برطانوی ہائی کمشنر جین میریٹ کے مطابق برطانوی حکومت نے امیگریشن سسٹم کو جدید، محفوظ اور مؤثر بنانے کے لیے ویزا عمل کو مکمل طور پر ڈیجیٹل بنا دیا ہے۔ اب درخواست دہندگان اپنا ویزا آن لائن UKVI اکاؤنٹ کے ذریعے حاصل کر سکیں گے۔ہائی کمشنر نے وضاحت کی کہ ای ویزا کا نفاذ صرف عمل کے سادہ اور تیز ہونے کے لیے ہے، اس سے ویزا اسٹیٹس یا اس کی شرائط پر کوئی اثر نہیں پڑے گا۔ اس نئے سسٹم کا اطلاق سٹوڈنٹس، گلوبل ٹیلنٹ، سپورٹس پرسنز، سکلڈ ورکرز، یوتھ موبیلٹی، ٹیمپریری ورک اور بزنس موبیلٹی ویزوں پر ہو گا۔نئے نظام کے تحت پاسپورٹ رکھنے والے افراد اپنے سفری دستاویزات کو UKVI اکاؤنٹ سے منسلک کر سکیں گے، جبکہ ویزا کی تصدیق کے لیے’’ویو اینڈ پروو ‘‘سروس متعارف کرائی گئی ہے، جس کے ذریعے آن لائن ویزا اسٹیٹس شیئر یا دکھایا جا سکے گا۔جین میریٹ نے واضح کیا کہ عام وزیٹر ویزا اور ڈپینڈنٹ ویزوں کے لیے فی الحال فزیکل اسٹکر کا طریقہ برقرار رہے گا، اور پہلے سے جاری کردہ فزیکل ویزا رکھنے والوں کو کسی بھی نئی کارروائی کی ضرورت نہیں ہے۔

برطانیہ کا طلبہ اور ورک ویزا ہولڈرز کیلئے ویزا سسٹم میں بڑی تبدیلی کا اعلان

برطانیہ نے پاکستانی طلبہ، کھلاڑی، کاروباری و پیشہ ور افراد کیلئے ای ویزا سہولت متعارف کروادی

ایران نے ایک بار پھر جوہری پروگرام سے متعلق اپنے اصولی مؤقف کی وضاحت کرتے ہوئے کہا ہے کہ اگر امریکا مذاکرات کو یورینیم افزودگی کے خاتمے سے مشروط کرتا ہے تو تہران اس عمل میں شریک نہیں ہو گا۔ایرانی رہبرِ اعلیٰ آیت اللہ علی خامنہ ای کے سینئر مشیر علی ولایتی نے سرکاری خبر رساں ایجنسی ایرنا سے گفتگو میں کہا کہ اگر مذاکرات کی شرط یہ ہے کہ ایران یورینیم کی افزودگی روک دے، تو ایسے کسی عمل کی کوئی گنجائش نہیں۔یہ بیان ایسے وقت میں سامنے آیا ہے جب حالیہ دنوں میں اسرائیل کے حملوں اور خطے میں بارہ روزہ کشیدگی کے بعد ایران اور امریکہ کے درمیان مذاکرات کے امکانات پیدا ہوئے تھے۔تاہم ایران نے واضح کر دیا ہے کہ وہ پرامن مقاصد کے لیے یورینیم افزودگی کے اپنے حق سے دستبردار نہیں ہو گا۔ ایرانی وزارتِ خارجہ کے ترجمان اسماعیل بقائی نے بھی اس مؤقف کی توثیق کرتے ہوئے کہا ہے کہ تہران اور واشنگٹن کے درمیان کسی ممکنہ ملاقات کے لیے نہ کوئی تاریخ طے ہوئی ہے، نہ وقت اور نہ ہی مقام کا فیصلہ ہوا ہے۔یاد رہے کہ ایرانی اعلیٰ مذاکرات کار عباس عراقچی اور امریکی نمائندہ خصوصی اسٹیو وٹکوف کے درمیان پانچ دور ہو چکے ہیں، تاہم کوئی حتمی معاہدہ طے نہ پا سکا، یہ بات چیت عمان کی ثالثی میں ہو رہی تھی 13 جون کو اسرائیل کی جانب سے ایران پر اچانک حملوں کے بعد معطل ہو گئی تھی،بعد ازاں امریکہ نے بھی اسرائیل کی حمایت میں محدود فضائی حملے کیے۔ ایرانی صدر مسعود پزشکیاں نے بھی اپنے ایک بیان میں کہا کہ ایران سفارتکاری اور بامقصد بات چیت کا حامی ہے اور ہم سمجھتے ہیں کہ مذاکرات کی راہ اب بھی کھلی ہے، اور ہم سنجیدگی سے پرامن حل کی کوشش جاری رکھیں گے۔

ایران نے جوہری پروگرام پر کوئی سمجھوتہ نہ کرنے کا اعلان کر دیا، امریکا کیساتھ مذاکرات غیر یقینی

امریکا کیساتھ ممکنہ ملاقات کیلئے تاریخ، وقت یا مقام کا تعین تاحال نہیں ہوا ،ترجمان ایرانی وزارت خارجہ

پاکستان اسٹاک ایکسچینج میں زبردست تیزی کا رجحان جاری ہے، جہاں ہنڈرڈ انڈیکس نے نئی تاریخ رقم کرتے ہوئے ایک لاکھ 37 ہزار پوائنٹس کی حد عبور کر لی ہے۔کاروباری ہفتے کے دوسرے روز کے آغاز پر مارکیٹ میں مثبت رجحان دیکھا گیا، جس کے نتیجے میںایک ہزار سے زائد پوائنٹس کا اضافہ ہوا۔ اس اضافے کے بعد ہنڈرڈ انڈیکس  ایک لاکھ سینتیس ہزارسات سوپوائنٹس کی نئی بلند ترین سطح پر پہنچ گیا۔یاد رہے کہ گزشتہ کاروباری دن کے اختتام پر بھی مارکیٹ میں نمایاں بہتری دیکھنے میں آئی تھی، جب ہنڈرڈ انڈیکس بائیس سو پوائنٹس کے اضافے کے ساتھ ایک لاکھ 36 ہزار 502 پوائنٹس کی سطح پر بند ہوا تھا۔ماہرین کے مطابق اسٹاک مارکیٹ میں حالیہ تیزی معاشی استحکام اور سرمایہ کاروں کے اعتماد کی عکاس ہے۔

پاکستان اسٹاک مارکیٹ نئی بلندیوں پر، انڈیکس ایک لاکھ 37 ہزار پوائنٹس کی حد بھی عبور کر گیا

گزشتہ روز کاروباری دن کے اختتام پر 100 انڈیکس بڑے اضافے کے ساتھ ایک لاکھ 36 ہزار 502 پوائنٹس کی حد پر بند ہوا تھا

کراچی(این این آئی) سوئنگ کے سلطان اور پاکستان کرکٹ ٹیم کے سابق کپتان وسیم اکرم نے مایہ ناز آسٹریلوی کرکٹرمچل اسٹارک کو دور جدید کا عظیم ترین کرکٹر قرار دیا ہے۔ سابق قومی کپتان جن کی بولنگ کی آج بھی ایک دنیا دیوانی ہے اور وہ عظیم ترین کرکٹر میں شمار ہوتے ہیں انھوں نے آسٹریلیا کے لیفٹ آرم فاسٹ بولر مچل اسٹارک کو دور جدید کا عظیم کرکٹر قرار دیا ہے جنھوں نے ٹیسٹ میچز میں شرکت کی سنچری بھی مکمل کرلی ہے۔کینگرو پیسر نے گذشتہ روز ویسٹ انڈیز کیخلاف میچ میں شرکت کے بعد یہ اعزاز اپنے نام کیا، وسیم اکرم نے اسٹارک کو اس سنگ میل پر پہنچنے مبارکباد پیش کی اور انھیں سراہا۔لیجنڈ کرکٹر کا کہنا تھا کہ 100 ٹیسٹ میچز کھیلنا بہت بڑا کارنامہ ہے، موجودہ دور میں یہ واقعی بڑی بات ہے، یہ کسی بھی کرکٹر کی صلاحیت کا اظہار ہے۔وسیم اکرم نے کہا کہ ٹیسٹ میچز کی سنچری ثابت کرتی ہے کہ آسٹریلوی کرکٹر مچل اسٹارک کیریئر میں کس چیز کو ترجیح دیتے ہیں، میرے نزدیک مچل اسٹارک جدید دور کے عظیم کرکٹر ہیں۔سابق قومی کپتان نے ان کی تعریف کرتے ہوئے کہا کہ پیسر ٹیسٹ فارمیٹ کافی مستقل مزاجی سے کھیلتے رہے ہیں، وہ ٹی 20 اور لیگ کرکٹ بھی کھیلتے ہیں مگر ان کا ٹیسٹ کیریئر سب سے آگے ہے۔

وسیم اکرم نے مایہ ناز آسٹریلوی کرکٹرمچل اسٹارک کو دور جدید کا عظیم ترین کرکٹر قرار دیدیا

سوئنگ کے سلطان وسیم اکرم نے اسٹارک کو ٹیسٹ میچز میں شرکت کی سنچری مکمل کرنے پرمبارکباد بھی دی

اسلام آباد میں نصب کی گئی نئی یادگار اب صرف یادوں میں رہ جائے گی،اسلام آباد کی انتظامیہ نے تنقید کے بعد مبہم اور ذو معنی سنہرے ہاتھوں والے مانومنٹ کو ہٹایاجارہاہے۔حال ہی میں قائم کی جانے والی اس نئی یادگار کو عوامی تنقید اور سوشل میڈیا پر شدید ردعمل کے بعد اب بھاری مشینری کے ذریعے گرایا جا رہا ہے۔رپورٹس کے مطابق اسلام آباد ڈی 12 میں دو سنہرے ہاتھوں کی ہتھیلیوں میں گیندوں والا مجسمہ نصب کیا گیا تھا یادگار میں سنہری رنگ کے دو انسانی ہاتھ دکھائے گئے تھے، جن کی ہتھیلیوں پر سفید گیند نما چیز رکھی گئی تھی۔اس غیر روایتی ڈیزائن نے سوشل میڈیا پر ایک نئی بحث کو جنم دیا، جہاں صارفین نے نہ صرف اس کے تصور پر سوال اٹھائے بلکہ اسے طنز و مزاح کا نشانہ بھی بنایاسوشل میڈیا پر اس ذو معنی یا معنی خیز مانومنٹ کے حوالے سے صارفین نے تبصرے کیے۔کسی نے پوچھا کہ ’یہ کس کا ویژن تھا سر؟‘ تو کسی نے تبصرہ کیا کہ ’شاید یہ یادگار اس بات کی علامت ہے کہ پاکستان کے ہاتھ طاقتور ہیں، یہ کٹ سکتے ہیں مگر جھک نہیں سکتے۔ایک صارف نے تبصرہ کیا کہ یہ ہاتھ کس کے ہیں جنہوں نے بالز کو تھام رکھا ہے یہ اسلام آباد میں نصب کیا گیا یہ کیا پیغام ہے؟ایک نے طنزاً لکھا کہ پہلے ہاتھوں میں بالز پکڑائیں، پھر کپڑا ڈالا اور اب اُکھاڑ ہی دیا۔ انہوں نے فلم شعلے کا مشہور ڈائیلاگ بولتے ہوئے کہا کہ یہ ہاتھ ہم کو دے دے ٹھاکر۔ تاہم ان سوالات کا کوئی جواب نہیں آیا۔ابتدائی طور پر انتظامیہ نے تنقید سے بچنے کے لیے یادگار کو کپڑوں سے ڈھانپ دیا تھا، مگر سوشل میڈیا پر دباؤ بڑھنے کے بعد اسے مکمل طور پر ختم کرنے کا عمل شروع کر دیا گیا ہے۔ اب اس مقام کو عوام کے لیے بند کر دیا گیا ہے جبکہ توڑ پھوڑ جاری ہے۔اس حوالے سے سی ڈی اے نے بتایاکہ نجی ہاؤسنگ سوسائٹی نے اس ماڈل کیلئے سی ڈی اے سے منظوری نہیں لی تھی۔سوشل میڈیا صارفین نے ماڈلز پر تنقید کرتے ہوئے سوال اٹھایا تھا کہ آخر کس نے ان ماڈلز کو نصب کرنے کی اجازت دی ہے؟۔سی ڈی اے حکام نے بتایا کہ سرکاری ادارے کا اس ماڈل کی تنصیب سے کوئی تعلق نہیں، یہ ماڈل ایک نجی ہاؤسنگ سوسائٹی نصب کررہی تھی۔ سی ڈی اے نے کہاکہ پبلک پرائیوٹ پارٹنرشپ کے تحت خوبصورتی کیلئے ماڈلز لگانے کی اجازت دی جاتی ہے مگر اس کیلئے ماڈل ڈیزائن کی منظوری لینا ہوتی ہے۔

تنقید کے بعداسلام آباد کے ایران ایونیو پرنصب ہاتھوں میں گیند والے مجسمے کو ہٹا دیا گیا

یادگار میں سنہری رنگ کے دو انسانی ہاتھ دکھائے گئے تھے، جن کی ہتھیلیوں پر سفید گیند نما چیز رکھی گئی تھی

ملک میں چینی کے حالیہ بحران کے بعد بڑی پیشرفت سامنے آئی ہے،حکومت اور شوگرانڈسٹری کے درمیان معاملات طے پاگئے، چینی کی ایکس مل قیمت 165 روپے فی کلو مقرر کی گئی ہے۔وزارت غذائی تحفظ نے اس حوالے سے جاری بیان میں کہا ہے کہ شوگر ملز سے بات چیت کے بعد چینی کی ایکس مل قیمت 165روپے فی کلو مقرر ہوگئی ہے، تمام صوبائی حکومتیں سستی چینی کی دستیابی یقینی بنائیں گی۔یاد رہے کہ اس سے قبل ملک کے مختلف شہروں میں فی کلو چینی کی قیمت 200 روپے تک پہنچ گئی تھی۔حکومت چینی کی قیمت میں کمی کے لیے چینی کی امپورٹ پر عارضی طور پر ٹیکسز ختم کردیے ہیں مگر تاحال قیمت میں کمی نہیں آرہی۔ہول سیلرز ایسوسی ایشن نے امپورٹ پر ٹیکس ختم کرنے کے بجائے حکومت سے مافیا کے خلاف کریک ڈاؤن کرنے اور گوداموں پر چھاپے مارنے کا مطالبہ کیا تھا اور کہا تھا کہ کریک ڈاؤن سے چین کی قیمت میں واضح کمی آجائے گی۔یاد رہے کہ حکومت نے چینی کی قیمتوں کو قابو میں رکھنے کے لیے 5 لاکھ ٹن چینی درآمد کرنے کا فیصلہ کیا ہے، جس کے لیے باقاعدہ ٹینڈر بھی جاری کر دیا گیا ہے۔

حکومت اور شوگر ملز مالکان میں معاملات طےپاگئے، چینی کی ایکس مل قیمت 165 روپے کلو مقرر

تمام صوبائی حکومتیں اس فیصلے کے تحت عوام کو سستی چینی کی دستیابی یقینی بنائیں گی، وزارت غذائی تحفظ

انگلینڈ نے لارڈز ٹیسٹ میں بھارت کو دلچسپ مقابلے میں 22 رنز سے شکست دے کر سیریز میں 1-2 کی برتری حاصل کرلی۔ انگلینڈ کی جانب سے دیے گئے 193 رنز کے ہدف کے تعاقب میں بھارتی ٹیم 170 رنز پر ڈھیر ہوگئی۔ رویندرا جڈیجا کی ناقابلِ شکست 61 رنز کی اننگز بھی ٹیم کو شکست سے نہ بچا سکی، جب کہ کے ایل راہول 39 رنز کے ساتھ نمایاں رہے۔ کپتان شبھمن گل صرف 6 رنز بنا کر پویلین لوٹ گئے۔ بھارت کے 7  بلے باز ڈبل فیگر میں بھی داخل نہ ہوسکے۔انگلینڈ کی جانب سے کپتان بین اسٹوکس اور جوفرا آرچر نے 3، 3 وکٹیں حاصل کیں۔ قبل ازیں انگلینڈ نے ٹاس جیت کر پہلے بیٹنگ کا فیصلہ کیا اور 387 رنز کی اننگ کھیلی جس میں جوئے روٹ 104 رنز کے ساتھ سرفہرست رہے جبکہ بریڈن کارس 56 ، جیمی سمتھ 51 ، اولی پوپ 44 رنز کے ساتھ نمایاں رہے ۔ بھارت نے انگلینڈ کے 387 رنز کے جواب میں  387 رنز بنائے اور انگلینڈ کی برتری کو ختم کر دیا، بھارت کی جانب سے کے ایل راہول سینچری بنانے میں کامیاب ہوئے، رشبھ پنت نے 74 ، جدیجہ نے 72 ، کارون نائر نے 40 رنز کی اننگ کھیلی ۔ دوسری اننگز میں انگلینڈ نے بھارت کو193 رنز کا ہدف دیا لیکن انڈیا کی پوری ٹیم 170 رنز بنا کر آوٹ ہو گئی اور 22 رنز سے شکست کا سامنا کرنا پڑا ۔

لارڈز ٹیسٹ، انگلینڈ نے دلچسپ مقابلے کے بعد بھارت کو 22 رنز سےہرادیا

انگلینڈ کے دیئے گئے 193 رنز کے تعاقب میں بھارتی ٹیم 170 رنز پر ڈھیر ہوگئی، انگلینڈ کو سیریز میں 1-2 کی برتری حاصل ہوگئی

اسلام آباد (این این آئی)صدر مملکت آصف علی زرداری نے فرنٹیئر کانسٹیبلری ری آرگنائزیشن آرڈیننس 2025ء جاری کر دیا۔آرڈیننس کے مطابق فرنٹیئر کانسٹیبلری اب فیڈرل کانسٹیبلری کہلائے گی، ملک بھر میں ایف سی کا دائرہ اختیار بڑھانے کا آرڈیننس جاری کیا جا رہا ہے، ایف سی ایکٹ 1915ء میں ترامیم منظوری کے بعد آرڈیننس جاری کیا گیا ہے،فیڈرل کانسٹیبلری چاروں صوبوں اور اسلام آباد میں کام کرنے کا اختیار رکھے گی، فیڈرل کانسٹیبلری کو آزاد جموں وکشمیر، گلگت بلتستان میں بھی کام کا اختیار حاصل ہو گا۔آرڈیننس میں کہا گیا کہ فیڈرل کانسٹیبلری کا انسپکٹر جنرل وفاقی حکومت تعینات کرے گی، فیڈرل کانسٹیبلری سے متعلق قواعد بنائے جائیں گے، ہر ڈویژن میں ایک ونگ کمانڈر تعینات کیا جائے گا، ڈویڑنل ونگ کمانڈر کا رینک ڈپٹی انسپکٹر جنرل کے برابر ہو گا۔وفاقی حکومت لاء اینڈ آرڈر کے قیام کے لیے وفاقی ریزرو فورس بھرتی کر سکے گی، فیڈرل کانسٹیبلری کی ذمے داری فسادات کنٹرول، داخلی سیکیورٹی، کاؤنٹر ٹیرر ازم اور تحفظ کی ہو گی۔آرڈیننس کے مطابق فیڈرل کانسٹیبلری کی ایک سیکیورٹی ڈویڑن اور دوسری فیڈرل ریزرو ڈویژن ہوگی، فیڈرل کانسٹیبلری میں بھرتی کے لیے ملک بھر میں دفاتر قائم کیے جائیں گے، تنظیم نو فریم ورک کے تحت فیڈرل کانسٹیبلری کی کمانڈ پولیس سروس آف پاکستان کیافسران کریں گے،یہ آرڈیننس وفاقی کانسٹیبلری کے ہر رکن پر لاگو ہوگا اور فوری نافذالعمل ہو گا، وفاقی کانسٹیبلری کی نگرانی اور کنٹرول وفاقی حکومت کے پاس ہوگا، وفاقی حکومت کو اختیار ہوگا وہ وفاقی کانسٹیبلری کو ریزرو فورس کے طور پر استعمال کرے، یہ ریزرو فورس اسلام آباد پولیس، صوبائی پولیس اور دیگر قانون نافذ کرنے والے اداروں کی مدد کر سکے گی۔آرڈیننس میں کہا گیا کہ وفاقی حکومت وفاقی کانسٹیبلری کو انسداد دہشت گردی، داخلی سلامتی اور ہنگامہ آرائی کنٹرول کرنے کیلئے استعمال کر سکے گی، فورس کے ہر رکن پر لازم ہو گا کہ وہ بالا افسران کے احکامات اور وارنٹ فوراً اور قانون کے مطابق بجا لائے، فورس پر لازم ہوگا کہ مجرموں کو گرفتار کرے اور قانون کے مطابق متعلقہ ایجنسی کے سپرد کرے۔وفاقی کانسٹیبلری کو ضابطہ فوجداری 1898ء کے تحت اختیارات حاصل ہوں گے، ان کو انسداد دہشت گردی ایکٹ 1997ء کے تحت اختیارات حاصل ہوں گے، انہیں پولیس آرڈر 2002ء اور دیگر نافذ العمل قوانین کے تحت اختیارات حاصل ہوں گے، وفاقی حکومت کسی بھی رکن کو کسی بھی قانون کے تحت پولیس افسر جیسے اختیارات و فرائض دے سکے گی۔

صدر مملکت نے فرنٹیئر کانسٹیبلری کو ملک گیر فیڈرل فورس میں تبدیل کرنے کا آرڈیننس جاری کر دیا

فرنٹیئر کانسٹیبلری اب فیڈرل کانسٹیبلری کہلائے گی،فیڈرل کانسٹیبلری چاروں صوبوں اور اسلام آباد میں کام کرنے کا اختیار رکھے گی

برطانیہ کے لیبر ارکان پارلیمنٹ نے فلسطینی ریاست کو فوری تسلیم کرنے کا مطالبہ کردیا۔برطانیہ کی لیبر پارٹی سے تعلق رکھنے والے تقریباً 60 ارکان پارلیمنٹ نے حکومت سے مطالبہ کیا ہے کہ وہ فلسطینی ریاست کو فوری طور پر تسلیم کرے۔ اس سلسلے میں ارکان نے برطانوی وزیر خارجہ ڈیوڈ لیمی کو باقاعدہ خط لکھا ہے۔گارجین کی رپورٹ کے مطابق لگ بھگ 60 برطانوی لیبر ارکانِ پارلیمنٹ نے وزیرِ خارجہ ڈیوڈ لامی کو خط لکھ کر مطالبہ کیا ہے کہ برطانیہ فلسطین کو فورا بطور ریاست تسلیم کرے، خط میں ارکان پارلیمنٹ نے خبردار کیا کہ انہیں یقین ہے کہ غزہ میں جاری اقدامات دراصل نسلی تطہیر ہیں۔انہوں نے لکھا ہے کہ اسرائیلی وزیر دفاع کا اعلان انسانیت کے خلاف جرم کا آپریشنل منصوبہ ہے، یہ منصوبہ ایک پوری آبادی کو جبری طور پر بے دخل کرنے کا منظم طریقہ کار معلوم ہوتا ہے۔اراکین پارلیمنٹ نے اپنے خط میں لکھاہے کہ ہم آپ کو یہ خط نہایت تشویش اور ہنگامی صورتحال کے پیش نظر لکھ رہے ہیں، جو اسرائیلی وزیرِ دفاع کے اس اعلان سے پیدا ہوئی ہے، جس میں انہوں نے پیر کے روز غزہ کے تمام فلسطینی شہریوں کو جبری طور پر رفح کے تباہ شدہ شہر میں قائم ایک کیمپ میں منتقل کرنے کا منصوبہ پیش کیا ہے اور انہیں وہاں سے نکلنے کی اجازت نہ دینے کی بھی بات کی گئی ہے۔انہوں نے مزید کہا اسرائیلی انسانی حقوق کے ممتاز وکیل، مائیکل سفارد نے اس منصوبے کو انسانیت کے خلاف جرائم کا عملی منصوبہ قرار دیا ہے، یہ غزہ کے جنوبی کنارے پر آبادی کی جبری منتقلی اور پھر مکمل بے دخلی کی تیاری ہے۔یہ خط لیبرفرینڈز آف فلسطین اینڈ دی مڈل ایسٹ کی جانب سے ترتیب دیا گیا ہے اور اس پر پارٹی کے مختلف دھڑوں سے تعلق رکھنے والے 59 ایم پیز کے دستخط موجود ہیں۔

فلسطین کو فوری طور پر ریاست تسلیم کیا جائے، 60لیبر ارکان پارلیمنٹ کا برطانیہ سے مطالبہ

اسرائیلی وزیر دفاع کا اعلان انسانیت کے خلاف جرم کا آپریشنل منصوبہ ہے، وزیرخارجہ کو خط

لندن (این این آئی)انگلینڈ کے خلاف لارڈز میں کھیلے جا رہے ٹیسٹ میچ میں قانون کی خلاف ورزی پر بھارتی کرکٹر محمد سراج کو جرمانہ ہو گیا۔محمد سراج نے میچ کے چوتھے روز آئی سی سی کوڈ آف کنڈکٹ کی خلاف ورزی کی، کوڈ کے آرٹیکل 2.5 کی خلاف ورزی پر ان پر میچ فیس کا 15 فیصد جرمانہ کیا گیا۔محمد سراج نے گزشتہ روز بین ڈکٹ کی وکٹ پر جشن کے دوران بیٹر کے خلاف جارحانہ رویہ اپنایا تھا۔محمد سراج کے ڈسپلنری ریکارڈ میں ایک ڈی میرٹ پوائنٹ کا بھی اضافہ ہوا ہے۔واضح رہے کہ بھارت اور انگلینڈ کے درمیان 5 میچز کی سیریز کا تیسرا ٹیسٹ لارڈز میں جاری ہے جہاں میچ کے 4 دن کا کھیل ختم ہو گیا اور آخری دن میچ دلچسپ مرحلے میں داخل ہو چکا ہے۔

لارڈز ٹیسٹ میں قانون کی خلاف ورزی پر بھارتی کرکٹر محمد سراج کو جرمانہ

محمد سراج نے گزشتہ روز بین ڈکٹ کی وکٹ پر جشن کے دوران بیٹر کے خلاف جارحانہ رویہ اپنایا تھا

عوام کے لیے ایک اور مہنگائی کا دھماکہ متوقع ہے، کیونکہ پیٹرولیم مصنوعات کی قیمتوں میں ایک بار پھر اضافہ سامنے آنے والا ہے۔ عالمی مارکیٹ میں خام تیل کی قیمتوں میں مسلسل اضافے کے بعد ملک میں آئندہ 15 دنوں کے لیے پیٹرول اور ڈیزل کی قیمت میں نمایاں اضافہ متوقع ہے۔ میڈیارپورٹس کے مطابق نئی قیمتوں کے تحت پیٹرول 6 روپے 60 پیسے اور ہائی اسپیڈ ڈیزل 5 روپے 27 پیسے فی لیٹر مہنگا ہو سکتا ہے۔ تاہم، دوسری جانب مٹی کے تیل اور لائٹ ڈیزل کی قیمتوں میں کچھ کمی کی تجویز بھی زیر غور ہے۔مٹی کے تیل کی قیمت میں 3 روپے 74 پیسے فی لیٹر جب کہ لائٹ ڈیزل کی قیمت میں 2 روپے 23 پیسے فی لیٹر تک کمی کی ممکنہ تجویز دی گئی ہے۔ پیٹرولیم مصنوعات کی قیمتوں پر ابتدائی ورکنگ مکمل کر لی گئی ہے اور اوگرا کی جانب سے اس سلسلے میں سمری کل حکومت کو ارسال کی جائے گی۔ذرائع کا کہنا ہے کہ آئل سیکٹر کی جانب سے ورکنگ پہلے ہی اوگرا کو ارسال کی جا چکی ہے۔ اب سمری کی بنیاد پر وزیراعظم حتمی منظوری دیں گے، جس کے بعد قیمتوں میں ردوبدل کا باقاعدہ اعلان کیا جائے گا۔اگر یہ منظوری دی گئی، تو پیٹرول کی نئی قیمتیں عوام کے لیے ایک اور معاشی بوجھ ثابت ہو سکتی ہیں، جب کہ معمولی ریلیف صرف مٹی کا تیل اور لائٹ ڈیزل استعمال کرنے والے صارفین کو ملنے کا امکان ہے۔

عوام پر ایک اور پٹرول بم گرانے کی تیاری،پیٹرولیم مصنوعات مہنگی ہونے کا امکان

اوگرا اپنی ورکنگ 15 جولائی کو حکومت کو ارسال کریگا، اوگرا کی سمری کی روشنی میں وزیراعظم حتمی منظوری دینگے

ملک بھر میں تاجروں کی جانب سے اعلان کردہ مجوزہ پہیہ جام ہڑتال کے بعد وفاقی وزیر خزانہ محمد اورنگزیب نے کشیدگی کو کم کرنے اور مذاکرات کی راہ ہموار کرنے کے لیے بڑا فیصلہ کیا ہے۔انہوں نے واضح طور پر کہا ہے کہ حکومت کاروباری طبقے کے تحفظات کو سنجیدگی سے لیتی ہے اور ان کے حل کے لیے براہ راست بات چیت کو تیار ہے۔اسلام آباد میں براہ راست ملاقات کی دعوت دیتے ہوئے وزیر خزانہ نے کہا کہ تاجروں سے محاذ آرائی کے بجائے افہام و تفہیم کی راہ اپنائی جائے گی تاکہ مسائل کا پائیدار حل نکالا جا سکے۔ انہوں نے کراچی میں اوورسیز انویسٹرز چیمبر آف کامرس کے دورے کے دوران میڈیا سے بات کرتے ہوئے یہ یقین دہانی بھی کروائی کہ تاجر برادری معیشت میں ریڑھ کی ہڈی کی حیثیت رکھتی ہے۔انہوں نے ایف بی آر کے اختیارات کے حوالے سے وضاحت کرتے ہوئے کہا کہ نئے اختیارات صرف 5 کروڑ یا اس سے زائد کے سیلز ٹیکس فراڈ کو روکنے کے لیے دیے گئے ہیں، جو عام دکاندار یا انکم ٹیکس فائلر پر لاگو نہیں ہوتے۔ اس معاملے پر تاجر چیمبرز کے صدور سے کل ایک اہم ملاقات بھی متوقع ہے۔وزیر خزانہ نے اس تاثر کو مسترد کیا کہ حکومت تاجروں پر دباؤ ڈال رہی ہے، بلکہ انہوں نے کہا کہ کچھ حلقے اس معاملے کو غیر ضروری سیاسی رنگ دے رہے ہیں۔ ان کا کہنا تھا کہ تمام اقدامات پارلیمانی منظوری کے بعد کیے گئے ہیں اور مقصد صرف ریونیو سسٹم کو بہتر بنانا ہے۔تنخواہ دار طبقے سے متعلق سوال پر محمد اورنگزیب نے بتایا کہ حکومت نے ان کے لیے ٹیکس گوشواروں کا فارم آسان بنا کر ایف بی آر کی ویب سائٹ پر اپ لوڈ کر دیا ہے۔انہوںنے کہاکہ گنجائش کے مطابق تنخواہ دار طبقے کو ریلیف فراہم کر دیا گیا ہے اور ان کی سہولت کے لیے گوشواروں کو آسان بنایا گیا ہے۔وزیر خزانہ نے کہا کہ تنخواہ دار طبقے کے لیے ٹیکس گوشواروں کا نہایت آسان فارم ایف بی آر کی ویب سائٹ پراپ لوڈ کر دیا گیا ہے، جس کا دائرہ کار آئندہ مرحلے میں چھوٹے تاجروں اور ایس ایم ایز تک بھی بڑھایا جائے گا۔انہوں نے بتایا کہ حکومت کی جانب سے رواں ماہ کے دوران 75 ارب روپے کے سیلز ٹیکس ریفنڈز جاری کیے جا چکے ہیں، جو کاروباری طبقے کے اعتماد کی بحالی کی جانب اہم قدم ہے۔وزیر خزانہ نے کہا کہ بلاشبہ ہر وزیر خزانہ کی خواہش ہوتی ہے کہ ملک میں فوری طور پر شرح نمو میں اضافہ ہو، لیکن ایسا کرنا زرمبادلہ کے ذخائر پر شدید دباؤ کا باعث بنتا ہے، جس سے معیشت دوبارہ غیر مستحکم ہو سکتی ہے۔مزید برآں، انہوں نے بتایا کہ مالیاتی شعبے میں بہتری آ رہی ہے، بینکوں کے پاس فنڈز کی دستیابی بڑھی ہے اور اب زرعی و چھوٹے کاروباروں کو زیادہ قرض دیے جائیں گے تاکہ معاشی سرگرمیاں بڑھ سکیں۔ادھر تاجر تنظیموں نے مذاکرات کی پیشکش کو خوش آئند قرار دیا ہے، مگر ان کا مؤقف ہے کہ اگر ان کے مطالبات سنجیدگی سے نہ لیے گئے تو ہڑتال کا فیصلہ واپس نہیں لیا جائے گا۔موجودہ صورتحال ایک نازک موڑ پر کھڑی ہے، مگر وزیر خزانہ کے صلح جو انداز نے ایک نئی امید پیدا کر دی ہے کہ شاید یہ تنازع مذاکرات کے ذریعے حل ہو جائے۔

تاجروں کی ہڑتال پر حکومت کا یوٹرن؟ وزیر خزانہ نے براہ راست مذاکرات کی پیشکش کر دی

سیلز ٹیکس فراڈ پر گرفت صرف 5 کروڑ روپے سے زائد کیسز میں ہوگی، وزیر خزانہ محمد اورنگزیب

انٹرنیشنل فیڈریشن آف جرنلسٹس نے پاکستان میں صحافیوں کے حقوق اور آزادی اظہار کے حوالے سے شدید تحفظات کا اظہار کرتے ہوئے چیف جسٹس آف پاکستان کو ایک خط ارسال کیا ہے۔ خط میں پیکا ایکٹ کے تحت صحافیوں کو درپیش مسائل اور ان کے بنیادی حقوق کی خلاف ورزیوں پر تشویش کا اظہار کیا گیا ہے۔رپورٹس کے مطابق متنازع پیکا ایکٹ اور صحافیوں کے مسائل پر انٹرنیشنل فیڈریشن آف جرنلسٹس  آئی ایف جے نے چیف جسٹس پاکستان یحییٰ آفریدی کو خط لکھ دیا۔انٹرنیشنل فیڈریشن آف جرنلسٹس کی جانب سے لکھے گئے خط کی کاپی وزیر اعظم، چیف جسٹس اسلام آباد ہائی کورٹ اور صدر پی ایف یو جے کو بھی بھیجی گئی ہے۔آئی ایف جے نے پیکا ایکٹ پر تشویش کا اظہار کرتے ہوئے کہا کہ پاکستان میں صحافیوں کو پیشہ ورانہ فرائض کی انجام دہی میں بڑھتے خطرات کا سامنا ہے، صحافیوں کو پیکا قانون کے تحت مقدمات، ہراسانی اور دھمکیوں کا سامنا ہے۔انٹرنیشنل فیڈریشن آف جرنلسٹس نے خط میں کہا کہ پاکستان نے انٹرنیشنل لیبر آرگنائزیشن اور اقوام متحدہ کے کنونشنز پر دستخط کر رکھے ہیں، پیکا کے تحت آزادی اظہار اور بنیادی حقوق محدود ہو رہے ہیں، پریس فریڈم رپورٹ کے مطابق 34 خلاف ورزیاں رپورٹ ہوئی ہیں۔چیف جسٹس کولکھے گئےخط میں کہا گیا کہ صحافیوں پر حملے، ہراسانی اور سوشل میڈیا پر نفرت انگیزی اور تشدد کے کئی کیسز رپورٹ ہوئے، پاکستان میں صحافیوں کو تنخواہوں کی عدم ادائیگی کا سامنا ہے، پاکستان میں صحافیوں کو غیرقانونی برطرفیوں اور سیکیورٹی خطرات کا سامنا ہے۔آئی ایف جے نے کہا کہ سپریم کورٹ کو براہ راست اپیلوں کی اجازت دینا ہائی کورٹس کو بائی پاس کرنے کے مترادف ہے، آئی ایف جے نے پاکستان میں دو مشن بھیجے، جنہوں نے میڈیا ورکرز سے براہ راست ملاقاتیں کیں، سپریم کورٹ پیکا قانون کا ازسرنو جائزہ لے اور حکومت کو قانون میں ترامیم کی ہدایت دے۔انٹرنیشنل فیڈریشن آف جرنلسٹس کا کہنا ہے کہ آرٹیکل 19 کے تحت آزادی صحافت کے تحفظ کے لیے فوری اقدام کیا جائے، پاکستان میں ایک سال کے دوران 7 صحافی قتل کیے گئے، چیف جسٹس سے اپیل ہے پیکا قانون کا فوری ازسرنو جائزہ لیا جائے۔

پیکا ایکٹ پر تحفظات، انٹرنیشنل فیڈریشن آف جرنلسٹس نے چیف جسٹس کو خط لکھ دیا

صحافیوں کو پیکا قانون کے تحت مقدمات، ہراسانی اور دھمکیوں کا سامنا ہے،آئی ایف جے کا اظہار تشویش

Australia’s bowling spearhead Josh Hazlewood was at his ruthless best, claiming 5–43 to dismantle the West Indies for 141 and seal a comprehensive 159‑run win

Josh Hazlewood takes five as Australia thump West Indies in first Test

Australia&rsquo;s bowling spearhead Josh Hazlewood was at his ruthless best, claiming 5&ndash;43 to dismantle the West Indies for 141 and seal a comprehensive 159‑run win over the hosts in the opening Test at Kensington Oval, concluding inside three days .

Chasing 301 to stay alive, the West Indies succumbed under accurate seam bowling. Hazlewood, bowling a seaming and unplayable spell, struck four times in a devastating burst that left the hosts reeling at 86‑8 before finishing them off.

Earlier, Travis Head (61), Beau Webster (63), and Alex Carey (65) steadied Australia&rsquo;s second innings after a shaky start, combining for a 102‑run rescue that set a formidable target. Nathan Lyon then polished off the tail with 2&ndash;20, including back‑to‑back wickets in the final over.

Reflecting on his spell, <a href="https://www.rediff.com/cricket/report/hazlewood-takes-5-as-australia-crush-west-indies-in-first-test/20250628.htm">Hazlewood said:</a> &ldquo;There was enough in the wicket, up‑and‑down from a length&hellip; It&rsquo;s just about hitting that area time and time again and being patient. I&rsquo;m just enjoying Test cricket at the moment.&rdquo;

Australia now take a 1&ndash;0 lead in the three‑match Frank Worrell Trophy series, having wrapped up victory with two days to spare. According to <a href="https://www.reuters.com/sports/cricket/captain-cummins-backs-youngster-konstas-australia-cruise-west-indies-win-2025-06-28/">Reuters</a>, captain Pat Cummins particularly praised the bowlers and recognised the maturation of younger players like Sam Konstas, despite his modest returns.

Australia&rsquo;s seam attack, spearheaded by Hazlewood, laid down a marker in the series opener. A clinical win backed by lower-order batting resilience and late‑innings bowling finesse gives the tourists early confidence. The second Test begins on 4 July in Grenada.

Josh Hazlewood takes five as Australia thump West Indies in first Test

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan