Cricket

Entertainment

News

Football

انسانی ہمدردی کے لیے غزہ کی جانب رواں گلوبل صمود فلوٹیلا پر اسرائیلی فوجیوں نے دھاوا بولتے ہوئے کئی کشتیوں کو گھیر لیا اور بعض جہازوں کے عملے کو حراست میں لے لیا۔ فلوٹیلا کے منتظمین نے تصدیق کی ہے کہ اسرائیلی اہلکاروں نے قافلے میں شامل کم از کم دو کشتیوں ’الما‘ اور ’سائرس‘ کو روکا اور کچھ جہازوں پر سوار کارکنوں کو گرفتار کر کے اسرائیل منتقل کر دیا گیا۔فلوٹیلا کی انتظامیہ کے مطابق متعدد کشتیوں کی لائیو نشریات اچانک بند ہو گئیں اور کچھ جہازوں کا ایک دوسرے سے رابطہ منقطع ہو گیا۔ منتظمین نے بتایا کہ اسرائیلی بحریہ نے قافلے کے جہازوں کو ریڈیو کے ذریعے ہدایت کی کہ وہ اپنا رخ اشدود بندرگاہ کی جانب موڑ دیں،صمود فلوٹیلا کی اسٹیئرنگ کمیٹی کے اراکین کا کہنا ہے کہ اسرائیلی جہازوں کی ایک بڑی تعداد موجود ہے اور کئی مقام پر الفاظی و بصری مداخلت کی کوششیں کی گئی ہیں۔ فلوٹیلا سے شائع ہونے والے پیغامات میں یہ بھی کہا گیا کہ بعض جہازوں کے کیمرے بند کر دیے گئے اور انٹرنیٹ کنیکٹیویٹی بلاک کر دی گئی۔ ایک رکن نے آڈیو پیغام میں بتایا کہ وہ ایک فیصلہ کن مرحلے میں ہیں اور سمندری ناکہ بندی کے قریب پہنچ چکے ہیں۔فلوٹیلا میں شامل تنظیموں کے مطابق اس قافلے میں 40 سے زائد ممالک کے تقربیاً 500 سے زائد افراد سوار ہیں، جن میں مختلف ممالک کے کارکن، صحافی اور رضاکار شامل ہیں۔ رووس یکما نامی ایک کارکن نے اپنی آخری ویڈیو پیغام میں کہا کہ وہ اسرائیلی فورسز کے جہازوں کے گھیرے میں ہیں اور خدشہ ہے کہ ان کے جہازوں پر فورسز داخل ہو سکتی ہیں۔ان حالات کے باعث ریڈ کراس نے غزہ شہر میں اپنے بعض آپریشنز مؤخر کر دیے اور عملے کو محفوظ مقامات پر منتقل کر دیا۔ مقامی طبی اور امدادی تنظیمیں غزہ کے جنوبی حصے میں انسانی ضروریات کی فراہمی میں مصروف تھیں، مگر اب وہاں حالات مزید نازک ہو گئے ہیں۔فلوٹیلا کے منتظمین نے بارہا کہا کہ ان کا مقصد محاصرہ کے دوران پھنسے ہوئے ہزاروں عوام کے لیے امداد پہنچانا اور ایک محفوظ راہداری قائم کرنا ہے۔ دوسری جانب اسرائیلی وزارتِ خارجہ اور نیوی کا موقف ہے کہ امدادی سامان کو محفوظ طریقے سے غزہ پہنچانے کے متبادل راستے موجود ہیں اور وہ فلوٹیلا کو قانونی اور محفوظ چینلز استعمال کرنے کی پیشکش کر چکے ہیں۔رپورٹس کے مطابق علاقے میں کم از کم 20 کے قریب جنگی و نگرانی کے بحری جہاز فلوٹیلا کے گرد موجود ہیں، تاہم ابھی تک یہ واضح نہیں کہ مزید کون سی کارروائیاں متوقع ہیں اور گرفتار شدگان کے مستقبل کے بارے میں کیا فیصلہ لیا جائے گا۔

غزہ امداد لے جانے والے گلوبل صمود فلوٹیلا پراسرائیلی فوج نے حملہ کردیا

قافلے کی لائیو نشریات اچانک بند، اسرائیل کا دعویٰ کہ گرفتار کارکنوں کو ڈی پورٹ کر دیا جائے گا

امریکا نے دوحا پر اسرائیلی حملے کے بعد قطر کی سلامتی کی ضمانت دیتے ہوئے کسی بھی حملے کی صورت میں فوجی کارروائی کا اعلان کیا ہے۔امریکی صدر ڈونلڈ ٹرمپ نے دوحا پر اسرائیلی حملے کے بعد قطر کی سلامتی کی ضمانت دیتے ہوئے ایک ایگزیکٹو آرڈر پر دستخط کر دیے ہیں۔ اس حکم نامے کے مطابق قطر پر کسی بھی حملے کو امریکہ پر حملہ تصور کیا جائے گا اور واشنگٹن اس کے جواب میں سفارتی، معاشی اور فوجی اقدامات اٹھائے گا۔وائٹ ہاؤس کے ترجمان نے بیان میں کہا کہ امریکہ قطر کی خودمختاری اور سالمیت کا تحفظ یقینی بنائے گا۔ صدر ٹرمپ کا کہنا تھا کہ قطر امن، استحکام اور خوشحالی کی جدوجہد میں امریکہ کا ثابت قدم اتحادی ہے اور دونوں ممالک قریبی فوجی تعاون اور مشترکہ مفادات کے رشتے میں جڑے ہیں۔امریکی صدر نے اعلان کیا کہ اگر قطر کے دفاع کی بات آئی تو واشنگٹن کسی بھی حد تک جانے کے لیے تیار ہے، چاہے وہ فوجی کارروائی ہی کیوں نہ ہو۔اسرائیل کی جانب سے حالیہ حملے کے بعد عرب اور اسلامی ممالک نے بھی دوحا میں سربراہی اجلاس کے دوران قطر کے ساتھ یکجہتی کا اظہار کیا تھا۔ دوسری جانب اسرائیلی وزیراعظم بینجمن نیتن یاہو نے یقین دہانی کرائی ہے کہ قطر پر دوبارہ کوئی حملہ نہیں کیا جائے گا۔خیال رہے کہ 9 ستمبر کو اسرائیل نے قطر کے دارالحکومت دوحہ پر فضائی حملے کیے، صہیونی فوج کا ہدف فلسطین کی مزاحمتی تنظیم حماس کی مرکزی قیادت تھی۔امریکی ایگزیکٹو آرڈر کے بعد خطے میں نئی سیاسی اور دفاعی صورتحال جنم لے رہی ہے، جسے ماہرین مشرقِ وسطیٰ میں طاقت کے توازن کے لیے ایک اہم موڑ قرار دے رہے ہیں۔

قطر پر کیا جانے والا حملہ امریکا پر حملہ تصور ہوگا،ٹرمپ نے ایگزیکٹو آرڈر پر دستخط کردیے

قطر کی سرزمین، خودمختاری یا اہم تنصیبات پر کسی بھی مسلح حملے کو امریکا اپنی امن و سلامتی کے لیے خطرہ سمجھے گا، امریکی صدر

انٹرنیشنل کرکٹ کونسل (آئی سی سی) نے تازہ ترین ٹی ٹوئنٹی پلیئرز رینکنگ جاری کر دی ہے جس میں پاکستان کے صائم ایوب نے شاندار کارکردگی کے بعد آل راؤنڈرز میں دنیا بھر میں پہلی پوزیشن حاصل کر لی۔ صائم ایوب نے بھارت کے ہاردیک پانڈیا کو پیچھے چھوڑتے ہوئے نمبر ون آل راؤنڈر کا اعزاز اپنے نام کر لیا۔رینکنگ کے مطابق ہاردیک پانڈیا دوسرے نمبر پر چلے گئے ہیں جبکہ پاکستان کے محمد نواز 4 درجے بہتری کے بعد 13ویں اور فہیم اشرف 35ویں نمبر پر آگئے ہیں۔بالرز رینکنگ میں بھارت کے ورون چکرورتی بدستور پہلے نمبر پر موجود ہیں۔ پاکستان کے ابرار احمد 3 درجے تنزلی کے بعد ساتویں نمبر پر آ گئے، جبکہ شاہین شاہ آفریدی نے زبردست چھلانگ لگاتے ہوئے 12 درجے ترقی کے ساتھ 14ویں پوزیشن حاصل کر لی۔ بھارت کے کلدیپ یادیو 9 درجے ترقی کے بعد 12ویں نمبر پر پہنچ گئے، جسپریت بمرا بھی 12 درجے اوپر آ کر 29ویں نمبر پر آ گئے۔ دوسری جانب پاکستان کے حارث رؤف 5 درجے گرنے کے بعد 33ویں نمبر پر چلے گئے۔بیٹرز کی رینکنگ میں بھارت کے ابھیشیک شرما بدستور سرفہرست ہیں۔ سری لنکا کے پاتھم نسانکا 2 درجے ترقی کے بعد پانچویں نمبر پر پہنچے ہیں جبکہ بھارتی کپتان سوریا کمار یادیو دو درجے گرنے کے بعد آٹھویں پوزیشن پر آ گئے۔ پاکستان کے صاحبزادہ فرحان نے 11 درجے لمبی چھلانگ لگاتے ہوئے 13ویں نمبر پر جگہ بنا لی۔اس کے برعکس بابر اعظم دو درجے نیچے ہو کر 37ویں اور محمد رضوان تین درجے تنزلی کے بعد 41ویں نمبر پر پہنچ گئے ہیں۔

آئی سی سی ٹی ٹونٹی رینکنگ، صائم ایوب نے ہاردیک پانڈیا سے پہلی پوزیشن چھین لی

بلے بازوں میں صاحبزادہ فرحان 11درجے ترقی پاکر 13ویں نمبر پر آگئے، بابراعظم کی مزید 2درجے تنزلی

آزاد کشمیر میں جموں و کشمیر جوائنٹ عوامی ایکشن کمیٹی کی کال پر جاری احتجاج شدت اختیار کر گیا ہے۔ ریاست بھر میں معمولات زندگی معطل ہیں جبکہ مظاہرین نے دارالحکومت مظفرآباد کی جانب مارچ شروع کر دیا ہے۔تفصیلات کے مطابق آزاد کشمیر میں جوائنٹ عوامی ایکشن کمیٹی کی کال پر شروع ہونے والی ہڑتال تیسرے روز خونریز شکل اختیار کر گئی۔ مختلف اضلاع میں پولیس اور مظاہرین کے درمیان جھڑپوں میں اب تک تین پولیس اہلکاروں سمیت 9 افراد جاں بحق اور درجنوں زخمی ہو چکے ہیں۔ ریاست بھر میں نظام زندگی مفلوج ہے جبکہ مظاہرین دارالحکومت مظفرآباد کی جانب مارچ کر رہے ہیں۔دھیر کوٹ سب سے زیادہ متاثرہ مقام ثابت ہوا جہاں اے ایس آئی سمیت تین پولیس اہلکار جان سے گئے۔ مظفرآباد میں دو اور ڈڈیال میں ایک شہری جاں بحق ہوا، جبکہ زخمیوں کی بڑی تعداد اسپتالوں میں زیرِ علاج ہے۔ سرکاری اعداد و شمار کے مطابق 172 پولیس اہلکار بھی زخمی ہیں جن میں سے 12 کی حالت تشویشناک ہے، جب کہ کم از کم 50 عام شہری بھی جھڑپوں کی زد میں آئے۔ریاست بھر میں ہڑتال کے باعث کاروباری مراکز، تعلیمی ادارے اور ٹرانسپورٹ بند ہیں، اشیائے خورد و نوش کی قلت کا خطرہ بڑھ رہا ہے اور شہری شدید مشکلات سے دوچار ہیں۔عوامی ایکشن کمیٹی نے 29 ستمبر سے 38 نکاتی چارٹر آف ڈیمانڈ کی منظوری کیلئے احتجاج شروع کیا تھا۔ سب سے بڑے مطالبات میں مہاجرین مقیم پاکستان کیلئے اسمبلی کی 12 نشستوں کا خاتمہ اور اشرافیہ کی مراعات میں کمی شامل ہیں۔حکومتِ آزاد کشمیر اور وفاقی نمائندے کئی بار کمیٹی کو مذاکرات کی دعوت دے چکے ہیں۔ وفاقی وزیر طارق فضل چوہدری کے مطابق کمیٹی کے 90 فیصد مطالبات مان لیے گئے ہیں، مگر دو نکات مہاجرین کی نشستوں میں کمی اور وزرا کی تعداد گھٹانے کیلئے آئینی ترمیم ضروری ہے۔ تاہم کمیٹی نے احتجاج ختم کرنے سے انکار کر دیا اور ڈیڈلاک برقرار ہے۔وزیراعظم آزاد کشمیر چوہدری انوار الحق نے کہا کہ ہم انسانی جان کو سب سے مقدم سمجھتے ہیں، تشدد مسائل کا حل نہیں۔ انہوں نے انکشاف کیا کہ مظاہرین نے ایک اسکول کو بھی آگ لگائی، جو اس بات کا ثبوت ہے کہ احتجاج پرامن رخ سے ہٹ چکا ہے۔ادھر حکومت نے عوام سے اپیل کی ہے کہ وہ افواہوں اور سوشل میڈیا پر پھیلائی جانے والی جھوٹی خبروں سے گریز کریں اور صرف مستند ذرائع پر اعتماد کریں۔صورتحال بدستور کشیدہ ہے اور خدشہ ہے کہ اگر مذاکرات کا سلسلہ فوری بحال نہ ہوا تو احتجاج مزید شدت اختیار کر سکتا ہے۔

آزاد کشمیر میں احتجاج کی لہر شدت اختیار کر گئی،پولیس اہلکاروں سمیت 9 افراد جاں بحق

مظاہرین کا دارالحکومت کی طرف مارچ،نظام زندگی مفلوج، اشیائے خور و نوش کی قلت کا خدشہ بڑھ گیا

لاہور (این این آئی) پاکستان کرکٹ بورڈ اور ایشین کرکٹ کونسل کے چیئرمین محسن نقوی نے بھارتی میڈیا کے ان دعوںٰ کی تردید کی ہے، جن میں کہا گیا تھا کہ انہوں نے ایشیاء کپ فائنل میں ٹرافی حوالے کرنے کے تنازع پر بھارتی کرکٹ کنٹرول بورڈ سے معافی مانگی ہے۔تفصیلات کے مطابق اتوار کو ایشیا کپ کے مردوں کے فائنل کی اختتامی تقریب اس وقت ایک تماشے میں بدل گئی تھی، جب بھارتی ٹیم نے اے سی سی چیف سے ونرز ٹرافی وصول سے انکار کر دیا تھا، جو دونوں ممالک کے درمیان کرکٹ تعلقات میں ایک تاریخی بدترین لمحہ تھا۔بعد ازاں بھارتی میڈیا نے یہ الزام عائد کیا کہ ٹرافی دینے سے خود محسن نقوی نے انکار کر دیا تھا۔بھارتی میڈیا اداروں، بشمول انڈیا ٹوڈے، فنانشل ایکسپریس اور ہندستان ٹائمز نے یہ رپورٹ کیا کہ نقوی نے اب بی سی سی آئی سے معافی مانگ لی ہے لیکن پھر بھی انہوں نے ٹرافی دینے سے انکار کر دیا ہے۔انڈیا ٹوڈے کی رپورٹ پر ردعمل دیتے ہوئے محسن نقوی نے کہا کہ بھارتی میڈیا جھوٹ پر چلتا ہے، حقائق پر نہیں، میں بالکل واضح کر دینا چاہتا ہوں کہ میں نے کوئی غلط کام نہیں کیا اور نہ ہی کبھی بی سی سی آئی سے معافی مانگی ہے اور نہ ہی کبھی مانگوں گا۔انہوں نے ان دعوئوں کو من گھڑت، بکواس اور سستا پروپیگنڈا قرار دیا جس کا مقصد بھارتی عوام کو گمراہ کرنا ہے۔پی سی بی چیئرمین نے بھارت کو تنقید کا نشانہ بناتے ہوئے کہا کہ وہ کرکٹ میں سیاست کو گھسیٹ رہا ہے، جس سے کھیل کی اصل روح کو نقصان پہنچ رہا ہے۔انہوں نے کہا کہ بحیثیت اے سی سی چیئرمین، میں اس دن بھی ٹرافی دینے کے لیے تیار تھا اور آج بھی تیار ہوں، اگر وہ واقعی چاہتے ہیں تو خوشی سے آئیں اور اے سی سی کے دفتر سے مجھ سے ٹرافی لے جائیں۔یاد رہے کہ ایشیا کپ کے دوران اس سے قبل نقوی نے بھارتی ٹیم کی جانب سے کھیل کے جذبے کی کمی پر مایوسی کا اظہار کیا تھا، جب بھارتی کپتان سوریا کمار یادیو نے فتح کو مئی میں پہلگام دہشت گرد حملے کے متاثرین کے نام منسوب کر کے اسے سیاسی رنگ دیا تھا۔پی سی بی نے یادیو کے اس بیان پر انٹرنیشنل کرکٹ کونسل (آئی سی سی)میں شکایت درج کرائی تھی جس کے نتیجے میں ان پر آئی سی سی کے ضابطہ اخلاق کی خلاف ورزی کا الزام ثابت ہوا اور مبینہ طور پر ان کی میچ فیس کا 30 فیصد جرمانہ کیا گیا تھااس سال کے اوائل میں ایک مختصر لیکن شدید فوجی کشیدگی اس وقت پیدا ہوئی تھی، جب بھارت نے مقبوضہ کشمیر میں پہلگام حملے کے بعد پاکستان میں فضائی حملے کیے تھے۔پاکستان نے اس حملے میں ملوث ہونے کی تردید کی اور امریکی مداخلت کے بعد بحران کم ہوا، تاہم اس کے بعد سے دونوں جوہری طاقت رکھنے والے ممالک کے تعلقات شدید طور پر کشیدہ ہو گئے ہیں۔

بی سی سی آئی سے معافی مانگی نہ مانگوں گا ، اے سی سی کے دفتر آکر ٹرافی لے جائیں، محسن نقوی

بھارت کرکٹ میں سیاست کو گھسیٹ رہا جس سے کھیل کی اصل روح کو نقصان پہنچ رہا ہے،بھارتی میڈیا رپورٹس پر ردعمل

امن منصوبہ یا نیا تنازع؟فلسطین کی مزاحمتی تحریک حماس نے امریکی صدر ڈونلڈ ٹرمپ کے 20 نکاتی امن منصوبے پر تحفظات کا اظہار کرتے ہوئے بعض شقوں میں ترمیم کا مطالبہ کر دیا ہے۔تفصیلات کے مطابق فلسطینی مزاحمتی تنظیم حماس نے امریکی صدر ڈونلڈ ٹرمپ کے پیش کردہ 20 نکاتی امن منصوبے پر اپنے تحفظات ظاہر کیے ہیں اور بعض اہم شقوں میں ترمیم کا مطالبہ کیا ہے۔ فلسطینی ذرائع کے مطابق حماس اسرائیل کے مکمل انخلا اور رہنماؤں کی جانوں کے تحفظ کی بین الاقوامی ضمانت چاہتی ہے۔ذرائع نے بتایا ہے کہ باضابطہ جواب دینے کے لیے حماس کو دو سے تین دن درکار ہوں گے۔ حالیہ دنوں میں حماس کے مذاکرات کاروں نے دوحا میں ترک، مصری اور قطری حکام سے ملاقاتیں کی ہیں، جہاں منصوبے کی "غیر مسلح کرنے" والی شق سب سے زیادہ متنازع قرار دی گئی۔واضح رہے کہ صدر ٹرمپ کے منصوبے میں حماس کو مکمل طور پر غیر مسلح کرنے اور مستقبل کی حکومت میں کوئی کردار نہ دینے کی تجویز شامل ہے، تاہم پرامن رہنے والوں کے لیے عام معافی کی شق رکھی گئی ہے۔ دوسری طرف اسرائیلی وزیراعظم نیتن یاہو نے اعلان کیا ہے کہ اسرائیلی فوج غزہ کے کئی حصوں میں موجود رہے گی۔

حماس کا ٹرمپ کے امن منصوبے پر اعتراض، اسرائیل کے مکمل انخلا کا مطالبہ

فلسطینی تنظیم نے بین الاقوامی ضمانتیں مانگ لیں، غیر مسلح کیے جانے کی شق سب سے بڑا تنازع

اسلام آباد ہائی کورٹ نے کم عمری کی شادی سے متعلق ایک اہم فیصلہ سُناتے ہوئے 15 سالہ مدیحہ بی بی کو اپنی مرضی کے مطابق شوہر کے ساتھ رہنے کی اجازت دے دی، تاہم اس کے ساتھ ہی قوانین میں اصلاحات کی بھی سفارش کی گئی ہے۔اسلام آباد ہائی کورٹ کے جسٹس محمد اعظم خان نے 24 صفحات پر مشتمل تفصیلی فیصلہ جاری کیا ہے۔عدالت نے قرار دیا کہ اگرچہ شریعت کے مطابق بلوغت اور رضامندی کے بعد نکاح درست ہے، لیکن پاکستانی قانون کے تحت 18 سال سے کم عمر میں شادی جرم تصور کی جاتی ہے۔ فیصلے میں بتایا گیا کہ مدیحہ بی بی نے عدالت اور کرائسز سینٹر دونوں جگہ یہ واضح طور پر کہا کہ وہ والدین کے پاس واپس نہیں جانا چاہتی اور اپنی مرضی سے شوہر کے ساتھ رہنا چاہتی ہے۔فیصلے میں اسلام آباد چائلڈ میرج ریسٹرینٹ ایکٹ 2025 کا حوالہ دیتے ہوئے کہا گیا کہ نکاح نامے میں لڑکی کی عمر تقریباً 18 سال درج تھی، لیکن نادرا ریکارڈ کے مطابق وہ 15 سال کی ہے۔ اسی سلسلے میں عدالت نے چائلڈ میرج ریسٹرینٹ ایکٹ 1929 اور مسلم فیملی لاز آرڈیننس 1961 کا بھی حوالہ دیا۔عدالت نے سفارشات پیش کرتے ہوئے کہا کہ شادی، نابالغی اور فوجداری قوانین میں ہم آہنگی پیدا کی جائے۔ مزید یہ کہ نکاح رجسٹرار کو پابند بنایا جائے کہ وہ 18 سال سے کم عمر کی شادی نہ کریں اور نادرا کا سسٹم اس طرح بنایا جائے کہ عمر کی درست تصدیق کے بغیر نکاح نامہ جاری نہ ہو۔عدالت نے عوامی سطح پر آگاہی مہم چلانے کی بھی ہدایت دی تاکہ کم عمری کی شادی کے نقصانات سے بچا جا سکے۔ اس فیصلے کی کاپی وزارت قانون، وزارت انسانی حقوق، لاء اینڈ جسٹس کمیشن، اسلامی نظریاتی کونسل، وزارت داخلہ، چیف کمشنر اسلام آباد اور ڈی جی نادرا سمیت تمام متعلقہ اداروں کو بھیجنے کا حکم دیا گیا ہے۔عدالت کا یہ فیصلہ پاکستان میں شادی اور کم عمری کے قوانین پر نئی بحث کا آغاز بن گیا ہے۔

اسلام آباد ہائی کورٹ کا بڑا فیصلہ، 15 سالہ لڑکی کو شوہر کے ساتھ رہنے کی اجازت دیدی

کم عمری کی شادی شریعت میں باطل نہیں، مگر قانون کے تحت جرم ہے، جسٹس محمد اعظم خان کا 24 صفحات پر مشتمل تفصیلی فیصلہ جاری

— پاکستان نے ایک اور عالمی مالیاتی چیلنج کامیابی سے عبور کر لیا۔ 2015 میں جاری کردہ 500 ملین ڈالر کے یوروبانڈ کی میچورٹی 30 ستمبر 2025 کو ہوئی، جس کی ادائیگی پاکستان نے بروقت کر کے دنیا کو یہ پیغام دیا کہ ملک اپنے مالی وعدوں پر قائم ہے۔پاکستان نے 500 ملین ڈالر یورو بانڈ کی بروقت ادائیگی کر دی۔اس حوالے سے مشیر خزانہ خرم شہزاد کا کہنا تھا کہ 2015 میں جاری کردہ 10 سالہ یورو بانڈ 30 ستمبر 2025 کو میچور ہوا جس کے بعد پاکستان نے 500 ملین ڈالر یورو بانڈ کی بروقت ادائیگی کر دی، قرضوں کی بروقت ادائیگی پاکستان کے مالی نظم و ضبط کا ثبوت ہے۔خرم شہزاد نے بتایا کہ حالیہ مہینوں میں ملکی زرمبادلہ کے ذخائر اور لیکویڈیٹی کی صورتحال میں بہتری آئی ہے اور عالمی مالیاتی اداروں نے پاکستان کی کریڈٹ ریٹنگ میں اضافہ کیا ہے۔ ان کے مطابق، سرمایہ کاروں کا اعتماد بحال ہو رہا ہے، بانڈز پریمیئم پر ٹریڈ ہو رہے ہیں، قرضہ جی ڈی پی کے تناسب میں کمی آئی ہے جو 77 فیصد سے کم ہو کر 70 فیصد پر آگیا ہے، جبکہ کُل سرکاری قرض میں بیرونی قرض کا حصہ 38 فیصد سے گھٹ کر 32 فیصد تک پہنچ گیا ہے۔ان کا کہنا تھا کہ مالی سال 2025 کے دوران قرض بڑھنے کی رفتار نمایاں طور پر سست رہی اور عالمی سطح پر قرض لینے کی لاگت میں کمی پاکستان کے لیے فائدہ مند ہے۔معاشی تجزیہ کاروں کا کہنا ہے کہ اس اقدام سے پاکستان کی عالمی کریڈٹ ریٹنگ میں بہتری آئے گی اور قریبی مدت میں ڈیفالٹ کے خدشات مزید کم ہو جائیں گے۔

پاکستان نے 500 ملین ڈالر یورئوبانڈ کی بروقت ادائیگی کردی

قرضوں کی بروقت ادائیگی پاکستان کے مالی نظم و ضبط کا ثبوت ہے، لیکویڈیٹی میں بہتری آئی ہے، مشیر وزیر خزانہ

حکومت نے آئی ایم ایف کی ایک اور کڑی شرط پوری کردی، یکم اکتوبر سے پرانی گاڑیوں کی امپورٹ کھول دی گئی ہے۔تفصیلات کے مطابق حکومت نےآئی ایم ایف کی ایک اورشرط پر عمل درآمد کرتے ہوئے یکم اکتوبر سے پانچ سال سے زائد پرانی گاڑیوں کی کمرشل امپورٹ کی اجازت دے دی ہے۔ اس سلسلے میں باضابطہ نوٹیفکیشن بھی جاری کر دیا گیا ہے۔نوٹیفکیشن کے مطابق امپورٹ پالیسی آرڈر میں ترمیم کرتے ہوئے پاکستان کسٹم ٹیرف کوڈز کے تحت نئی کیٹیگریز شامل کی گئی ہیں۔ کوڈ 8702 اور 8703 کے تحت سیڈان کاریں، کوڈ 8704 کے تحت لائٹ کمرشل گاڑیاں اور وینز جبکہ کوڈ 8711 کے تحت دیگر گاڑیاں درآمد کی جا سکیں گی۔حکومت نے واضح کیا ہے کہ پرانی گاڑیوں کی امپورٹ صرف بینکنگ چینلز کے ذریعے ممکن ہوگی۔ ساتھ ہی ایف بی آر پانچ سال پرانی گاڑیوں پر 40 فیصد ریگولیٹری ڈیوٹی عائد کرنے کے لیے الگ نوٹیفکیشن جاری کرے گا۔حکام کے مطابق انجینئرنگ ڈویلپمنٹ بورڈ نے سخت معیار مقرر کیے ہیں اور صرف ان گاڑیوں کو درآمد کی اجازت ہوگی جو انٹرنیشنل سرٹیفکیٹ کی حامل ہوں۔ مزید یہ کہ پرانی گاڑیوں کی قیمتوں میں ماہانہ کمی یا ڈپریسی ایشن کے اصول بھی جلد جاری کیے جائیں گے۔وزیرِ خزانہ محمد اورنگزیب کی زیر صدارت اقتصادی رابطہ کمیٹی (ای سی سی)کے اجلاس میں پاکستان ورچوئل اثاثہ جات اتھارٹی کے لیے 80 کروڑ روپے کی گرانٹ کی بھی منظوری دی گئی تاکہ ڈیجیٹل مالیاتی نظام کو فروغ دیا جا سکے۔ اجلاس میں پیٹرولیم، توانائی اور غذائی تحفظ کے وزراء سمیت اعلیٰ حکام بھی شریک ہوئے۔

حکومت نے آئی ایم ایف کی شرط پر 5 سال سے زائد پرانی گاڑیوں کی کمرشل امپورٹ کی اجازت دیدی

امپورٹ صرف بینکنگ چینلز کے ذریعے ہوگی، ایف بی آر 40 فیصد ریگولیٹری ڈیوٹی عائد کرے گا

کراچی کے مختلف علاقوں میں آج صبح زلزلے کے جھٹکے محسوس کیے گئے جس کے باعث شہریوں میں خوف و ہراس پھیل گیا۔اطلاعات کے مطابق ملیر اور قریبی مقامات پر زلزلے کے جھٹکے ریکارڈ کیے گئے۔ زلزلہ صبح 9 بج کر 34 منٹ پر آیا، جس کی شدت 3.2 اور گہرائی زمین کے اندر 10 کلو میٹر تھی، جبکہ مرکز ملیر سے تقریباً 7 کلومیٹر شمال مغرب میں واقع تھا۔زلزلے کے باعث کسی جانی یا دیگر نقصان کی اطلاع نہیں ملی۔ماہرین کے مطابق معمولی نوعیت کے زلزلے اکثر آتے رہتے ہیں، تاہم اس بار شدت معمول سے کچھ زیادہ ہونے کے باعث شہریوں نے جھٹکے واضح طور پر محسوس کیے۔

کراچی کے علاقے ملیر میں ایک بارپھرزلزلے کے جھٹکے، شہری خوفزدہ

زلزلہ صبح 9 بج کر 34 منٹ پر ریکارڈ کیا گیا جس کی شدت  3.2اور گہرائی زیر زمین 10 کلو میٹر تھی، زلزلہ پیما مرکز

فلپائن کے صوبہ سیبو اور ملحقہ علاقوں میں 6.9 شدت کے زلزلے نے تباہی مچا دی، ہلاک ہونے والوں کی تعداد بڑھ کر 69 ہو گئی جبکہ ڈیڑھ سو سے زائد افراد زخمی ہیں۔ حکومتی اداروں نے امدادی کارروائیاں تیز کرتے ہوئے بجلی اور پانی کی بحالی کے اقدامات شروع کر دیے ہیں۔زلزلہ گزشتہ رات تقریباً دس بجے ساحلی شہر بوگو کے قریب آیا، جس کا مرکز زمین میں محض دس کلومیٹر کی گہرائی پر تھا۔ زلزلے کے جھٹکے اتنے شدید تھے کہ لوگ گھروں سے باہر نکل آئے جبکہ متعدد عمارتیں زمین بوس ہو گئیں، جن میں سو سال سے زائد پرانی ایک چرچ کی عمارت بھی شامل ہے۔بوگو شہر کے اسپتالوں میں زخمیوں کی بڑی تعداد لائے جانے کے باعث گنجائش ختم ہو گئی۔ مقامی حکام کے مطابق شمالی علاقوں میں بارش اور بجلی کی معطلی نے مشکلات مزید بڑھا دی ہیں اور پانی کی شدید قلت پیدا ہو گئی ہے۔سن ریمیگیو میں ایک اسپورٹس کمپلیکس کی چھت گرنے سے کھیل کے دوران کئی افراد جاں بحق ہو گئے۔ متاثرہ شہر کو ہنگامی حالت (اسٹیٹ آف کیلامٹی) قرار دے دیا گیا ہے تاکہ امدادی سرگرمیوں کو تیز کیا جا سکے۔مقامی افراد کے مطابق زلزلے کے فوراً بعد ساحلی علاقوں میں سمندر کا پانی پیچھے ہٹ گیا جس سے خوف و ہراس پھیل گیا، تاہم حکام نے واضح کیا کہ اس زلزلے کے بعد سونامی کا کوئی خطرہ نہیں تھا۔صدر فرڈینینڈ مارکوس جونیئر نے متاثرہ خاندانوں سے اظہار افسوس کیا اور کہا کہ حکومتی وزراء خود میدان میں موجود ہیں تاکہ متاثرین کو فوری امداد پہنچائی جا سکے۔فلپائن ’رِنگ آف فائر‘ کے خطے میں واقع ہے جہاں زلزلے اور آتش فشانی سرگرمیاں معمول کا حصہ ہیں۔ حالیہ برسوں میں یہ خطہ کئی بار زلزلوں سے متاثر ہو چکا ہے، تاہم منگل کی رات آنے والا یہ زلزلہ حالیہ تاریخ کے سب سے شدید اور ہلاکت خیز جھٹکوں میں شمار کیا جا رہا ہے۔

فلپائن میں  6.9شدت کے زلزلے نے تباہی مچادی،ہلاکتیں 69 تک جا پہنچیں

زلزلے کے جھٹکے اتنے شدید تھے کہ لوگ گھروں سے باہر نکل آئے جبکہ متعدد عمارتیں زمین بوس ہو گئیں

قطر کے وزیراعظم شیخ محمد بن عبدالرحمن الثانی نےواضح کیا ہے کہ غزہ سے اسرائیلی افواج کے انخلا کے معاملے پر مزید وضاحت اور سنجیدہ بات چیت کی ضرورت ہے۔ ان کا کہنا تھا کہ امریکی صدر ڈونلڈ ٹرمپ کی جانب سے پیش کیا گیا منصوبہ فی الحال صرف اصولوں کی ایک فہرست ہے، اس کی تفصیلات طے کیے بغیر عملی پیش رفت ممکن نہیں۔الجزیرہ سے گفتگو کرتے ہوئےقطری وزیراعظم نے کہا کہ قطر امن چاہتا ہے مگر ایسا امن قابلِ قبول ہوگا جو فلسطینی عوام کے حقوق اور ان کی خودمختاری کی ضمانت دے۔ ان کا کہنا تھا کہ اسرائیلی انخلا کے معاملے پر خاموشی اختیار نہیں کی جا سکتی، یہ ایک بنیادی نکتہ ہے جس کی وضاحت ضروری ہے۔انہوں نے بتایا کہ منصوبے میں جنگ بندی کو واضح شق کے طور پر شامل کیا گیا ہے اور حماس نے اس پر ذمہ داری کا مظاہرہ کرتے ہوئے سنجیدہ جائزہ لینے کا وعدہ کیا ہے۔ شیخ محمد نے کہا کہ ہمارا اولین مقصد جنگ کا خاتمہ ہے اور ہم امید کرتے ہیں کہ تمام فریقین اس موقع کو ضائع نہیں کریں گے۔انہوں نے مزید کہا کہ آج دوحہ میں ہونے والے ثالثی اجلاس میں مصر اور ترکی کے اعلیٰ حکام بھی شریک ہوں گے، جہاں امن کے لیے ممکنہ راستے پر بات چیت ہوگی۔ قطری وزیراعظم کے مطابق اگر یہ منصوبہ آگے بڑھا تو عرب اور اسلامی دنیا فلسطینی عوام کی حمایت میں بھرپور شمولیت کرے گی۔اسرائیلی وزیراعظم کی جانب سے قطر سے معافی کے بیان پر تبصرہ کرتے ہوئے شیخ محمد نے کہا کہ یہ کوئی احسان نہیں بلکہ ہمارا بنیادی حق تھا جسے تسلیم کیا گیا۔ انہوں نے زور دیا کہ قطر کی کوشش ہے کہ ایسا پائیدار لائحہ عمل سامنے لایا جائے جو فلسطینی عوام کے جائز حقوق کو یقینی بنائے اور خطے میں امن کی بنیاد رکھے۔

ٹرمپ منصوبے کی وضاحت ضروری، اسرائیلی افواج کے انخلاء پر سنجیدہ بات ہونی چاہیے، قطری وزیراعظم

اسرائیلی وزیراعظم نے معافی مانگ کر کوئی احسان نہیں کیا یہ ہمارا بنیادی حق تھا، شیخ محمد بن عبدالرحمن الثانی

وزیراعلیٰ خیبرپختونخوا علی امین گنڈاپور نے ایک ویڈیو پیغام میں اسرائیل کو تسلیم کرنے سے دو ٹوک انکار کیا اور کہا کہ پاکستان صرف ایک ریاست فلسطین کو مانتا ہے، ساتھ ہی انہوں نے پارٹی کے اندرونی اختلافات اور علیمہ خان سے متعلق امور پر بھی کھل کر بات کی۔اپنے ایک ویڈیو پیغام میں انہوں نے تصدیق کی کہ علیمہ خان کے حوالے سے انہوں نے عمران خان کو صورتِ حال سے آگاہ کیا کیونکہ یہ ان کی ذمہ داری تھی۔ ان کا کہنا تھا کہ شکایت منافق لوگ کرتے ہیں، جبکہ انہوں نے صرف حقائق اپنے قائد کے سامنے رکھے ہیں۔انہوں نے بتایا کہ پانچ ماہ بعد عمران خان سے ملاقات ہوئی اور اُن کی ہدایت پر صوبائی کابینہ میں تبدیلیاں عمل میں لائی گئیں، جس کے بعد عاقب اللہ اور فیصل تراکئی نے استعفیٰ دیا۔علی امین گنڈا پور نے کہا کہ وہ عمران خان کے وفادار ہیں اور انہیں سچ بتانا اُن کا حق ہے، شکایتیں تو منافق لوگ کرتے ہیں، جبکہ وہ خود کوئی شکایت لے کر نہیں گئے۔ انہوں نے پارٹی میں گہری تقسیم کا ذکر کرتے ہوئے کہا کہ بجٹ کے بعد اُن کے خلاف’غداری‘ جیسی مہم چلائی گئی اور یہ تاثر دیا گیا کہ وہ ’مائنس عمران خان‘ کے ہدف پر کام کر رہے ہیں۔ ان کے بقول عملی طور پر کسی میں ہمت نہیں کہ وہ مائنسِ بانی منصوبے پر عمل کر سکے، مگر کچھ حلقے ذاتی مفادات کے لیے گروہ بندی کر رہے ہیں۔علی امین گنڈاپور نے کہا کہ پارٹی کے اندر گروپ بندیاں اور مفاداتی سیاست جاری ہے، کچھ لوگ عمران خان کو مائنس کرنے کی کوشش کے بیانیے کو ہوا دے رہے ہیں، لیکن حقیقت یہ ہے کہ ایسا ممکن نہیں۔ انہوں نے واضح کیا کہ عمران خان ان کے لیڈر ہیں اور ہر فیصلہ ان کے لیے قابل قبول ہے۔انہوں نے کہا کہ علیمہ خان کو چیئرمین بنانے کی مہم پارٹی میں مایوسی پھیلا رہی ہے، جس سے تحریک کو نقصان پہنچ رہا ہے۔ ان کا دعویٰ تھا کہ بعض لوگ اسٹیبلشمنٹ سے روابط میں ہیں، اور یہ سب کچھ عمران خان کو بتانا ان کی ذمہ داری تھی۔وزیراعلیٰ نے بتایا کہ انہوں نے عمران خان کو یہ بھی آگاہ کیا کہ بعض وی لاگر اور دیگر افراد اختلافات کو ہوا دے رہے ہیں اور علیمہ خان کا بھی اسی میں کردار دکھائی دیتا ہے۔ ان کے مطابق حفیظ اللہ نیازی کے نام سے ایسی تحاریر یا مہم چلائی جا رہی ہیں جن میں علیمہ خان کو وزیراعظم یا پی ٹی آئی کا چیئرمین دکھانے کی کوشش کی جا رہی ہے۔ انہوں نے خدشہ ظاہر کیا کہ اس قسم کی منظم مہمیں پارٹی میں مایوسی پیدا کریں گی اور رہائی کے لیے کیے جانے والے عملی اقدامات کو نقصان پہنچائیں گی۔وزیراعلیٰ نے مزید کہا کہ ان پر مختلف الزامات لگائے گئے، جن میں سینیٹ انتخابات کے امیدواروں سے متعلق الزامات بھی شامل ہیں، حالانکہ نام عمران خان کی طرف سے دیے گئے تھے۔ ان کا کہنا تھا کہ حقیقی آزادی کی تحریک کو کمزور کرنے کی سازشیں ہورہی ہیں، اور اگر اختلافات بڑھائے گئے تو پارٹی کو مزید نقصان پہنچ سکتا ہے۔آخر میں انہوں نے کہا کہ بانی چیئرمین عمران خان کی فیملی قابلِ احترام ہے، لیکن پارٹی کی مضبوطی کے لیے ضروری ہے کہ ہر سازش اور غلط فہمی کو ختم کیا جائے۔علی امین گنڈاپور کا یہ بیان ایک طرف ان کے اسرائیل مخالف واضح مؤقف کو اجاگر کرتا ہے تو دوسری جانب پارٹی کے اندر بڑھتی ہوئی تقسیم اور اختلافات کی سنگین تصویر بھی سامنے لاتا ہے، جس کے اثرات آنے والے دنوں میں زیادہ نمایاں ہو سکتے ہیں۔

اسرائیل کو کبھی تسلیم نہیں کریں گے، صرف فلسطین ہماری ریاست ہے،وزیراعلیٰ خیبرپختونخوا

علیمہ خان کو پارٹی چیئرمین بنانے کی مہم چلائی جارہی ہے، جس سے پارٹی میں مایوسی پھیل رہی ہے، ویڈیو بیان

وفاقی حکومت نے ایک بارپھرعوام پر پیٹرول بم گرا دیا، حکومت نے پٹرولیم مصنوعات کی قیمتوں میں اضافہ کردیا جس کا نوٹیفکیشن بھی جاری کردیا گیا ہے۔ وزارت خزانہ کی جانب سے جاری نوٹیفکیشن کے مطابق پٹرول 4روپے 7 پیسے فی لٹر مہنگا کردیا گیا جس کے بعد پٹرول کی نئی قیمت 264 روپے 61 سے بڑھ کر 268 روپے 68 پیسے ہوگئی۔اِسی طرح ہائی اسپیڈ ڈیزل 4 روپے 4 پیسے کااضافہ کیا گیا ہے جس کے بعد ہائی اسپیڈ ڈیزل کی نئی قیمت 272 روپے 77 پیسے سے بڑھ کر 276 روپے 81 پیسےہو گئی ہے۔وزارتِ خزانہ نے بتایا کہ نئی قیمتیں یکم اکتوبر سے نافذالعمل ہوں گی اور اگلے پندرہ دن کے لیے برقرار رہیں گی۔واضح رہے کہ اس سے قبل 16 ستمبر کو حکومت نے ڈیزل کی قیمت میں 2 روپے 78 پیسے کااضافہ کیاتھا۔

حکومت نے ایک بارپھرعوام پر پیٹرول بم گرا دیا،پٹرولیم مصنوعات کی قیمتوں میں اضافہ

اضافے کے بعد پیٹرول کی قیمت 264 روپے 61 پیسے سے بڑھ کر 268 روپے 68 پیسے ہوگئی

انکم ٹیکس گوشوارے جمع کرانے کیلئے مزید 15دن کی مہلت مل گئی،فیڈرل بورڈ آف ریونیو (ایف بی آر) نے ٹیکس ریٹرن جمع کروانے کی تاریخ میں 15دن کی توسیع کردی۔ایف بی آر نے ٹیکس ریٹرن جمع کروانے کی تاریخ میں توسیع کا نوٹیفکیشن جاری کردیا۔ ایف بی آر نوٹیفکیشن کے مطابق ٹیکس ریٹرن 15اکتوبر تک جمع کروائے جاسکتے ہیں۔ایف بی آر نے بتایاکہ تاریخ میں توسیع تاجر تنظیموں، ٹیکس بار ایسو سی ایشنز اور عام لوگوں کی درخواست پر کی گئی۔ایف بی آر کی جانب سے جاری سرکلر میں بتایا گیا ہے کہ ایف بی آر نے مالی سال 2025 کے لیے انکم ٹیکس گوشوارے جمع کرانے کی آخری تاریخ 15 اکتوبر 2025 تک بڑھا دی ہے اور یہ فیصلہ انکم ٹیکس آرڈیننس 2001 کے سیکشن اے214کے تحت کیا گیا ہے۔میڈیارپورٹس کے مطابق اب تک 40 لاکھ سے زائد افراد نے ٹیکس ریٹرن فائل کردیے، گزشتہ سال 30 ستمبر تک 35 لاکھ 64 ہزار افراد نے ٹیکس گوشوارے جمع کروائے تھے۔خیال رہے اس سے قبل ایف بی آر کی جانب سے کہا گیا تھا کہ انکم ٹیکس گوشوارے جمع کرانے کی تاریخ میں کوئی توسیع نہیں کی جائےگی۔آخری تاریخ تک ریٹرن فائل نہ کرنے والے لیٹ فائلر ہوں گے،ریٹرن فائل نہ کرنے والوں کو قانون کے مطابق جرمانہ ہوگا۔

انکم ٹیکس گوشوارے جمع کرانے کی تاریخ میں 15 دن کی توسیع کردی گئی

آخری تاریخ میں توسیع تاجر تنظیموں، ٹیکس بار ایسو سی ایشنز اور عوام کی درخواست پر کی گئی،ایف بی آر

جمعیت علمائے اسلام پاکستان کے سربراہ مولانا فضل الرحمان نے کہا ہے کہ فلسطین کے مسئلے کا کوئی بھی حل فلسطینی عوام کی مرضی کے بغیر ممکن نہیں اور حماس کو نظرانداز کرکے کسی فارمولے پر عمل درآمد نہیں کیا جا سکتا کیونکہ حماس اصل فریق ہے۔لاہور میں پریس کانفرنس سے خطاب کرتے ہوئے مولانا فضل الرحمان نے کہا کہ اسرائیل ایک ناجائز ریاست ہے جسے کبھی قبول نہیں کیا جائے گا۔ مولانا فضل الرحمان کاکہناتھا کہ امریکا دنیا پر ڈنڈے کے زور پر سیاست مسلط کرنے کی روش ترک کرے، امریکا نے حماس کو نظرانداز کر رکھا ہے، حالانکہ مسئلہ فلسطین میں حماس اصل فریق ہے اور اس کے بغیر کوئی پائیدار حل ممکن نہیں۔مولانا فضل الرحمان نےمزید کہا کہ موجودہ دور کا سب سے اہم سوال فلسطین کا مسئلہ ہے۔ انہوں نے بانیٔ پاکستان کے موقف کو دہراتے ہوئے کہا کہ اسرائیل کے وجود کو قائداعظم نے عرب دنیا کی پیٹھ میں خنجر قرار دیا تھا، اس لیے اسرائیل کو ایک ناجائز ریاست کے طور پر کبھی تسلیم نہیں کیا جا سکتا۔ان کا کہنا تھا کہ امریکی صدر دنیا کے مسائل کو اپنی طاقت کے ذریعے حل کروانے کی کوشش کر رہے ہیں جو نہ اخلاقی ہے نہ ہی سیاسی۔ مولانا فضل الرحمان نے واضح کیا کہ جب تک فلسطینی عوام خود اپنے مستقبل کے بارے میں فیصلہ نہ کریں، کسی بھی زبردستی مسلط کردہ حل کو قبول نہیں کیا جا سکتا۔انہوں نے دو ریاستی حل کے تصور پر بات کرتے ہوئے کہا کہ فلسطینی اور اسرائیلی ایک دوسرے کو تسلیم کرنے کے لیے تیار نہیں، اس لیے یہ فارمولا کامیاب نہیں ہو سکتا۔مزید کہا کہ اگر چند واقعات کی بنیاد پر صدام حسین کو عالمی عدالت انصاف میں انسانی مجرم قرار دے کر پھانسی دی جا سکتی ہے تو لاکھوں فلسطینیوں کی شہادتوں پر بھی عالمی برادری کو جواب دینا چاہیے، جو بھوک، بیماریوں اور ادویات کی کمی کے باعث جاں بحق ہوئے۔جے یو آئی کے سربراہ نے اقوام متحدہ کے فورم پر صدام حسین کو مجرم قرار دینے پر افسوس کا اظہار کرتے ہوئے کہا کہ فلسطینی عوام کی قربانیاں عالمی ضمیر کے لیے کھلا چیلنج ہیں۔مولانا فضل الرحمان نے کہا کہ پاکستان کو اپنے تاریخی مؤقف پر ڈٹے رہنا ہوگا اور کسی صورت اسرائیل کو تسلیم کرنے کا تصور بھی نہیں کیا جا سکتا۔ انہوں نے ٹرمپ پر تنقید کرتے ہوئے کہا کہ انہیں نوبل انعام نہیں بلکہ جنگ کا انعام دیا جانا چاہیے کیونکہ لاکھوں فلسطینی شہید ہو چکے ہیں۔ان کا کہنا تھا کہ خطے کی سیاست میں طاقت کے بجائے مذاکرات کو اہمیت دینا ہوگی۔ حماس کو نظرانداز کرکے کوئی حل تلاش کرنا تاریخ اور حقیقت کو جھٹلانے کے مترادف ہوگا۔

اسرائیل ایک ناجائز ریاست ہے جسے کبھی قبول نہیں کیا جائے گا،مولانا فضل الرحمان

دو ریاستی حل تھوپا نہیں جا سکتا، لاکھوں فلسطینی شہادتیں عالمی ضمیر پر سوالیہ نشان ہیں، سربراہ جے یوآئی

پاکستان نے اپنی دفاعی صلاحیت میں ایک اور سنگِ میل عبور کرتے ہوئے’فتح 4‘کروز میزائل کا کامیاب تجربہ کر لیا۔ 750 کلومیٹر رینج رکھنے والا یہ میزائل جدید ایویانکس اور نیویگیشنل ٹیکنالوجی سے لیس ہے، جو نہ صرف دشمن کے میزائل ڈیفنس سسٹم کو چکمہ دینے کی صلاحیت رکھتا ہے بلکہ اہداف کو غیر معمولی درستگی کے ساتھ نشانہ بنانے کی قابلیت بھی رکھتا ہے۔آئی ایس پی آر کے مطابق فتح 4 میزائل ملکی سطح پر تیار کردہ ایک جدید کروز سسٹم ہے، جو زمینی سطح کے ساتھ پرواز کی صلاحیت رکھتا ہے۔ یہ ٹیکنالوجی دشمن کے ریڈار اور دفاعی نظام کو غیر مؤثر بنانے میں مددگار ہے اور کسی بھی ہدف کو انتہائی درستگی کے ساتھ نشانہ بنا سکتی ہے۔تجربے کے موقع پر چیف آف جنرل اسٹاف سمیت پاک فوج کے سینئر افسران، سائنسدانوں اور انجینئرز نے شرکت کی اور کامیاب لانچ کا مشاہدہ کیا۔ اس موقع پر شریک ماہرین نے کہا کہ یہ تجربہ پاکستان کے دفاعی نظام کو مزید مضبوط اور جدید بنانے کی ایک بڑی کامیابی ہے۔صدر مملکت، وزیر اعظم، چیئرمین جوائنٹ چیفس آف اسٹاف کمیٹی اور تینوں مسلح افواج کے سربراہان نے فتح 4 کے کامیاب تجربے پر سائنسدانوں، انجینئرز اور افواج کے افسران کو مبارکباد پیش کی۔ قیادت کا کہنا تھا کہ یہ کارنامہ پاکستان کے دفاعی حصار کو مزید ناقابلِ تسخیر بنانے میں اہم کردار ادا کرے گا اور وطنِ عزیز کے دفاع کو نئی طاقت بخشے گا۔

پاکستان نے جدید کروز میزائل ’فتح-4‘کا کامیاب تجربہ کر لیا

میزائل انتہائی درستگی کے ساتھ اپنے اہداف کو نشانہ بنانے کیلئے دشمن کے میزائل ڈیفنس سسٹم سے بچنے کی صلاحیت رکھتا ہے،آئی ایس پی آر

کراچی میں شدید گرمی کے بعد آخرکار موسم نے انگڑائی لی اور مختلف علاقوں میں ہلکی اور تیز بارش نے شہر کو بھگو دیا۔ کہیں رم جھم تو کہیں موسلا دھار بارش نے گرمی کا زور توڑ ڈالا اور شہریوں نے سکون کا سانس لیا۔گلستان جوہر، ملیر، ماڈل کالونی، آئی آئی چندریگر روڈ اور اطراف کے علاقوں میں موسلا دھار بارش ریکارڈ کی گئی جبکہ گرومندر، صدر، اولڈ سٹی ایریا، لیاقت آباد، ایف بی ایریا اور پرانی سبزی منڈی میں بھی بارش کا سلسلہ جاری رہا۔محکمہ موسمیات کے مطابق بھارتی گجرات پر ہوا کا کم دباؤ موجود ہے جسے بحیرہ عرب سے نمی مل رہی ہے، یہی سسٹم مزید طاقتور ہوکر ڈپریشن میں بدل سکتا ہے اور کل تک شمالی بحیرہ عرب میں داخل ہو سکتا ہے۔شہر کے دیگر حصوں میں بھی بادل برس پڑے، گلشن اقبال، حسن اسکوائر، شاہراہ قائدین اور کشمیر روڈ پر بارش نے موسم خوشگوار کر دیا۔ کھارادر، گارڈن، شیرشاہ اور بلدیہ ٹاؤن میں بھی بارش سے ٹمپریچر کم ہو گیا۔محکمہ موسمیات نے مزید ہلکی بارش کی پیشگوئی کی ہے، تاہم خدشہ ظاہر کیا جا رہا ہے کہ نشیبی علاقوں میں پانی جمع ہو سکتا ہے اور ٹریفک کی روانی متاثر ہو سکتی ہے۔محکمہ موسمیات کا کہنا ہے کہ اس سسٹم کے زیرِ اثر آج اور کل کراچی ڈویژن سمیت شہید بینظیر آباد، نوشہرو فیروز، حیدرآباد، جامشورو، ٹنڈو محمد خان، ٹنڈو الٰیار، عمرکوٹ، میرپور خاص، ٹھٹھہ، سجاول، مٹیاری، تھرپارکر اور بدین اضلاع میں گرج چمک کے ساتھ بارش کا امکان ہے۔

کراچی کے مختلف علاقوں میں ہلکی اور تیز بارش، گرمی کا زور ٹوٹ گیا

شہرِ قائد میں معتدل سے تیز بارش ہوئی ، بارشوں کا یہ سلسلہ کل تک جاری رہنے کا امکان ہے، محکمہ موسمیات

جنوبی افریقہ کے خلاف ٹیسٹ سیریز کیلئے قومی اسکواڈ کا اعلان کر دیا گیا جس مین تین نئے کھلاڑی بھی شامل ہیں۔شان مسعود پاکستانی کرکت ٹیم کی قیادت کریں گے جبکہ تین نئے کھلاڑی آصف آفریدی، فیصل اکرم اور روحیل نذیر اسکواڈ کا حصہ ہیں۔تفصیلات کے مطابق قومی سلیکشن کمیٹی نے آئی سی سی ورلڈ ٹیسٹ چیمپئن شپ 2025-27 کے حصے کے طور پر جنوبی افریقا کے خلاف شیڈول دو ٹیسٹ میچوں کی سیریز کے لیے 18 رکنی اسکواڈ کا اعلان کر دیا۔ سیریز کا آغاز 12 اکتوبر کو لاہور کے قذافی اسٹیڈیم سے ہوگا،جنوبی افریقہ، جو آئی سی سی ورلڈ ٹیسٹ چیمپئن شپ 2023-25 کا فاتح رہا ہے، پاکستان کے خلاف پہلا ٹیسٹ 12 سے 16 اکتوبر تک لاہور میں کھیلے گا۔ دوسرا ٹیسٹ 20 سے 24 اکتوبر کو راولپنڈی کرکٹ اسٹیڈیم میں شیڈول ہے۔ٹیسٹ سیریز کے بعد دونوں ٹیموں کے درمیان تین ٹی ٹوئنٹی اور تین ون ڈے میچز بھی کھیلے جائیں گے جو 28 اکتوبر سے 8 نومبر تک جاری رہیں گے۔ وائٹ بال اسکواڈ کا اعلان بعد میں کیا جائے گا۔ٹیسٹ سیریز کے لیے منتخب کھلاڑی آج سے نیشنل کرکٹ اکیڈمی میں ریڈ بال ہیڈ کوچ اظہر محمود اور دیگر کوچز کی نگرانی میں تربیتی کیمپ میں شریک ہوں گے۔ وہ کھلاڑی جو حال ہی میں اختتام پذیر ایشیا کپ میں شامل تھے، 4 اکتوبر کو اسکواڈ کو جوائن کریں گے۔پاکستان کے ٹیسٹ سیریز اسکواڈ میں شان مسعود (کپتان)، عامر جمال، عبداللہ شفیق، ابرار احمد، آصف آفریدی، بابر اعظم، فیصل اکرم، حسن علی، امام الحق، کامران غلام، خرم شہزاد، محمد رضوان (وکٹ کیپر)، نعمان علی، روحیل نذیر (وکٹ کیپر)، ساجد خان، سلمان علی آغا، سعود شکیل اور شاہین شاہ آفریدی شامل ہیں۔

پاکستان نے جنوبی افریقہ کے خلاف ٹیسٹ سیریز کے لیے 18 رکنی اسکواڈ کا اعلان کردیا

شان مسعود پاکستانی کرکت ٹیم کی قیادت کریں گے، تین نئے کھلاڑی آصف آفریدی، فیصل اکرم اور روحیل نذیر اسکواڈ کا حصہ

پاکستان، اردن، متحدہ عرب امارات، انڈونیشیا، ترکیہ، سعودی عرب، قطر اور مصر کے وزرائے خارجہ نے امریکی صدر ڈونلڈ ٹرمپ کی غزہ جنگ بندی کی کوششوں کی بھرپور حمایت کر دی۔مسلم ممالک کے جاری مشترکہ اعلامیے میں امریکی صدر ڈونلڈ ٹرمپ کی غزہ میں جنگ بندی اور امن کوششوں کی بھرپور حمایت کا اعلان کیا ہے۔اعلامیے میں کہا گیا کہ صدر ٹرمپ کا پیش کردہ منصوبہ قابلِ تحسین ہے، جس میں غزہ کی تعمیر نو، فلسطینی عوام کو جبری بے دخلی سے بچانا، مستقل جنگ بندی اور ایک جامع امن عمل کو آگے بڑھانے جیسے اقدامات شامل ہیں۔بیان میں مزید بتایا گیا کہ امریکی صدر نے یقین دہانی کرائی ہے کہ مغربی کنارے کے انضمام کی اجازت نہیں دی جائے گی۔ مسلم ممالک نے کہا کہ وہ امریکا اور دیگر شراکت داروں کے ساتھ مثبت اور تعمیری مذاکرات کے لیے تیار ہیں تاکہ معاہدے کو حتمی شکل دی جا سکے اور اس پر مؤثر عملدرآمد یقینی بنایا جا سکے، جس سے خطے میں امن، استحکام اور ترقی کی راہیں کھل سکیں۔مشترکہ اعلامیے میں اس بات پر بھی زور دیا گیا کہ امریکا کے ساتھ تعاون کے ذریعے غزہ میں جاری جنگ کو ختم کرنے کے لیے ایک ہمہ گیر معاہدہ تیار کیا جائے گا۔ اس منصوبے کے تحت انسانی امداد کی بلا تعطل فراہمی، یرغمالیوں کی رہائی، فلسطینیوں کی جبری بے دخلی کی روک تھام، اسرائیلی افواج کا مکمل انخلا، غزہ کی بحالی اور دو ریاستی حل کے تحت فلسطین کے قیام جیسے نکات شامل ہیں۔اعلامیے میں کہا گیا کہ یہ اقدامات عالمی قوانین اور قراردادوں کے عین مطابق ہیں اور خطے میں دیرپا امن و سلامتی کے قیام کے لیے بنیادی حیثیت رکھتے ہیں۔

مسلم ممالک کی ٹرمپ کے غزہ جنگ بندی کے مجوزہ منصوبے کی بھرپور حمایت

پاکستان سمیت خطے کے اہم ممالک کا مشترکہ اعلامیہ، جنگ بندی، انسانی امداد اور دو ریاستی حل پر اتفاق

ایشیائی ترقیاتی بینک نے پاکستان کی معیشت کے حوالے سے جائزہ رپورٹ جاری کر دی ہے۔اے ڈی بی نے اپنی تازہ رپورٹ میں پیش گوئی کی ہے کہ مالی سال 2025-26 کے دوران پاکستان کی معیشت 3 فیصد کی شرح سے نمو حاصل کرے گی۔رپورٹ کے مطابق گزشتہ مالی سال 2024-25 میں پاکستان کی جی ڈی پی میں بہتری دیکھنے میں آئی اور معاشی سرگرمیوں میں اضافہ ہوا۔ اے ڈی بی نے اس پیش رفت کو آئی ایم ایف پروگرام کے تحت کی جانے والی اصلاحات کا نتیجہ قرار دیا، تاہم ادارے کا کہنا ہے کہ پائیدار ترقی کے لیے مستقل اصلاحات اور پالیسیوں پر عمل درآمد ضروری ہے۔اے ڈی بی نے یہ بھی کہا کہ پاک،امریکا تجارتی معاہدے نے سرمایہ کاروں کا اعتماد بحال کیا ہے۔ رپورٹ کے مطابق حالیہ سیلاب نے بنیادی ڈھانچے اور زرعی اراضی کو متاثر کیا، تاہم تعمیراتی شعبے کے لیے آئندہ بجٹ میں دی جانے والی مراعات بحالی کے عمل کو تیز کرنے میں مددگار ثابت ہوں گی۔رپورٹ کے مطابق 2026 میں اوسطاً مہنگائی 6 فیصد تک بڑھنے کا امکان ہے، سیلاب سے سپلائی چین متاثر ہوگی جس سے خوراک کی قیمتوں میں اضافہ متوقع ہے، گیس ٹیرف بڑھنے سے بھی مہنگائی بڑھے گی،اے ڈی بی نے اپنی سفارشات میں کہا ہے کہ اسٹیٹ بینک کو مہنگائی کو قابو میں رکھنے کے لیے محتاط اور متوازن مالیاتی پالیسی اپنانی ہوگی۔

رواں سال پاکستان میں جی ڈی پی گروتھ 3 فیصد رہنے کا امکان ہے،ایشیائی ترقیاتی بینک

پاکستانی معیشت بہتر ہوئی ہے لیکن قدرتی آفات اور حالیہ سیلاب ترقی کیلئے خطرہ ہیں ، اے ڈی بی کی رپورٹ

Akeal Hosein will captain West Indies for the first time as five uncapped players join the squad to face Nepal in a three-match T20I series in Sharjah.

Hosein to Captain West Indies in Nepal T20I Series

The West Indies have gone bold. For their upcoming three-match series against Nepal, selectors named five uncapped players and handed the captaincy to Akeal Hosein. Few saw this coming.

Hosein, known more for his left-arm spin than leadership stints, will lead the side for the very first time. He has Fabian Allen, Jason Holder and Kyle Mayers for company, but much of the attention is on the new names. Ackeem Auguste, Navin Bidaisee, Zishan Motara, Ramon Simmonds and Amir Jangoo are all set to step onto the big stage. That one moment of debut always lingers, and Sharjah could well provide it.

Also in the squad is Karima Gore, who represented USA in eight T20Is before shining in the CPL. His recall gives the lineup a dash of experience in the middle order. The squad looks different, almost experimental, but it carries a sense of freshness.

Nepal has their own motivation. They beat West Indies A twice last year at home, and their supporters still remember that. Suddenly, the points table looks very different in their minds. Beating the full side, even a youthful version, would be historic.

Fans in Sharjah are set for a lively contest. For Hosein, it is a test of calmness and command. For the newcomers, it is about proving they belong. And for the crowd, it is about watching stories unfold under the floodlights.

West Indies Eye Nepal Test with Uncapped Players

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan