Cricket

Entertainment

News

Football

ایشیا کپ ٹی ٹوئنٹی کے سپر فور مرحلے کے دوسرے میچ میں بھارت نے پاکستان کو 6  وکٹوں سے شکست دے دی۔دبئی انٹرنیشنل اسٹیڈیم میں کھیلے گئے میچ میں بھارت نے پاکستان کے خلاف ٹاس جیت کر پہلے فیلڈنگ کا فیصلہ کیا۔پاکستان نے بھارت کو جیت کے لیے 172 رنز کا ہدف دیا  جو کہ بھارت نے 19 ویں اوور میں 4 وکٹوں کے نقصان پر پورا کرلیا۔ بھارتی بیٹر ابھیشیک شرما نے 39 گیندوں پر 74 رنز کی جارحانہ اننگ کھیلی، ان کی اننگ میں 5 چھکے اور 6 چوکے شامل تھے۔بھارت کے نائب کپتان شبمن گل نے 28 گیندوں پر8 چوکوں کی مدد سے 47 رنز سکور کیے جبکہ کپتان سوریا کمار یادو بغیر کھاتہ کھولے ہی حارث رؤف کی گیند پر ابرار احمد ہاتھوں کیچ آؤٹ ہو گئے۔بھارتی وکٹ کیپر بلے باز سنجو سمسن بھی حارث رؤف کا شکار بنے اور 17 گیندوں پر 13 رنز بنا کر پویلین لوٹ گئے جبکہ تلک ورما نے 30 اور ہاردک پانڈیا نے 7 رنز کی ناٹ آؤٹ اننگ کھیلی۔پاکستان کی جانب سے حارث رؤف نے 2 جبکہ فہیم اشرف اور ابرار احمد نے ایک ایک کھلاڑی کو آؤٹ کیا۔قبل ازیں دبئی انٹرنیشنل کرکٹ سٹیڈیم میں ہونیوالے ایونٹ کے سپر فور کے بڑے مقابلے میں بھارتی کرکٹ ٹیم کے کپتان سوریا کمار یادیو نے ٹاس جیت کر پاکستانی کپتان سلمان علی آغا کو بیٹنگ کی دعوت دی تھی۔پہلے بیٹنگ کرتے ہوئے پاکستان نے مقررہ 20 اوورز میں 5 وکٹوں کے نقصان پر 171 رنز بنائے، صاحبزادہ فرحان 58 رنز کیساتھ نمایاں رہے۔پاکستان کی جانب سے حارث رؤف نے 2، فہیم اشرف اور ابرار احمد نےایک ایک کھلاڑی کو آؤٹ کیا۔

ایشیا کپ سپر فور مرحلہ،بھارت نےباآسانی پاکستان کو 6 وکٹوں سے شکست دیدی

بھارت کی جانب سے شبمن گل نے 47 اور ابھشیک شرما نے 74 رنز کی شاندار اننگز کھیلی،حارث رؤف نے 2 وکٹیں حاصل کیں

برطانیہ، کینیڈا اور آسٹریلیانے باضابطہ طور پر فلسطین کو بطور ریاست تسلیم کرنے کا اعلان کر دیا۔مشرقِ وُسطیٰ کے تنازع پر عالمی سیاست نے نیا موڑ اختیار کرلیا ہے۔ برطانیہ، آسٹریلیا اور کینیڈا نے باضابطہ طور پر فلسطین کو ایک آزاد ریاست کے طور پر تسلیم کرتے ہوئے تاریخ رقم کردی ہے، جو نہ صرف فلسطینی عوام کے لیے امید کا پیغام ہے بلکہ اسرائیل کے لیے بھی ایک واضح پیغام سمجھا جا رہا ہے۔لندن، اوٹاوا اور کینبرا سے بیک وقت سامنے آنے والے بیانات میں تینوں ممالک نے فلسطین کو باضابطہ طور پر ایک آزاد ریاست کے طور پر تسلیم کرنے کا اعلان کیا۔ اس اقدام کو مشرقِ وُسطیٰ میں امن اور دو ریاستی حل کی بحالی کی سمت ایک بڑا قدم قرار دیا جا رہا ہے۔برطانوی وزیراعظم کیئر اسٹارمر نے اپنے ویڈیو پیغام میں کہا کہ "آج ہم فلسطین کو تسلیم کر کے امن کی امید کو زندہ کر رہے ہیں۔ مقصد یہ ہے کہ ایک محفوظ اسرائیل کے ساتھ ساتھ ایک قابلِ عمل فلسطینی ریاست وجود میں آئے، اور بدقسمتی سے فی الحال ہمارے پاس دونوں میں سے کوئی بھی نہیں ہے۔"کیئر اسٹارمر نے غزہ کی ابتر صورتحال پر شدید تشویش کا اظہار کرتے ہوئے کہا کہ انسانی بحران ناقابلِ برداشت حد تک بڑھ چکا ہے۔ انہوں نے اسرائیل سے مطالبہ کیا کہ وہ امدادی سامان پر عائد پابندیاں ختم کرے اور غزہ میں تباہ حال عوام کو ریلیف فراہم کرنے کے اقدامات کرے۔دوسری جانب آسٹریلوی وزیراعظم انتھونی البانیز اور وزیرِ خارجہ پینی وونگ نے مشترکہ بیان میں کہا کہ 21 ستمبر 2025 سے مؤثر، آسٹریلیا فلسطین کو ایک آزاد اور خودمختار ریاست کے طور پر تسلیم کرتا ہے۔ ان کے مطابق یہ فیصلہ نہ صرف فلسطینی عوام کی جائز خواہشات کی حمایت ہے بلکہ عالمی برادری کے امن کے عزم کی علامت بھی ہے۔کینیڈا نے بھی اس صف میں شامل ہوتے ہوئے فلسطین کو تسلیم کرنے والا پہلا جی 7 ملک ہونے کا اعزاز حاصل کیا۔ وزیرِ اعظم مارک کارنی نے ایک بیان میں کہا: "آج سے کینیڈا ریاستِ فلسطین کو تسلیم کرتا ہے اور ہم اسرائیل اور فلسطین دونوں کے لیے پُرامن مستقبل کی تعمیر میں اپنا کردار ادا کریں گے۔"مبصرین کے مطابق تینوں ممالک کا یہ مشترکہ فیصلہ نہ صرف اسرائیل پر دباؤ ڈالے گا بلکہ اقوام متحدہ سمیت دیگر عالمی پلیٹ فارمز پر بھی دو ریاستی حل کے حق میں نئی راہیں کھولے گا۔

برطانیہ، آسٹریلیا اور کینیڈا نے فلسطین کو باضابطہ طور پر تسلیم کرنے کا اعلان کردیا

فلسطینیوں اور اسرائیلیوں کے لیے امن کی امید کے ساتھ فلسطینی ریاست کو تسلیم کیا گیا، برطانوی وزیراعظم

امریکہ اور افغانستان کے تعلقات میں بگرام ایئربیس ایک بار پھر کشیدگی کی علامت بن گیا ہے، ٹرمپ کے تازہ بیان نے خطے میں تناؤ کو مزید بڑھا دیا ہے۔امریکی صدر ڈونلڈ ٹرمپ نے افغانستان کو سخت دھمکی دیتے ہوئے کہا ہے کہ اگر بگرام ایئربیس امریکا کو واپس نہ کیا گیا تو اس کے سنگین نتائج برآمد ہوں گے۔ ٹرمپ نے اپنے سوشل میڈیا پلیٹ فارم پر پیغام میں لکھا کہ بگرام ایئربیس امریکا نے تعمیر کیا تھا اور اگر یہ ہمیں واپس نہیں ملتا تو حالات خراب ہو سکتے ہیں۔صحافیوں سے گفتگو میں ٹرمپ نے یہ عندیہ بھی دیا کہ بگرام بیس کو دوبارہ حاصل کرنے کے لیے فوجی آپریشن کے امکان کو رد نہیں کیا جاسکتا۔ یاد رہے کہ 2021 میں غیر ملکی افواج کے انخلا کے دوران امریکا نے 20 سال بعد بگرام ایئربیس افغان حکام کے حوالے کیا تھا۔ٹرمپ نے اعلان کیا کہ افغانستان میں چھوڑا گیا اسلحہ اور بگرام ایئربیس دوبارہ حاصل کرنے کے لیے امریکا باضابطہ مذاکرات بھی شروع کرچکا ہے۔دوسری جانب طالبان حکومت نے واشنگٹن کی دھمکیوں کو مکمل طور پر مسترد کرتے ہوئے واضح کیا ہے کہ اگر امریکا نے دوبارہ افغان سرزمین پر قدم رکھنے کی کوشش کی تو اسے سخت مزاحمت کا سامنا ہوگا۔ افغان وزیر خارجہ امیر خان متقی نے دوٹوک کہا کہ "بگرام ایئربیس تو دور کی بات، ہم ایک انچ زمین بھی امریکا کو نہیں دیں گے۔تجزیاتی ماہرین کے مطابق بگرام ایئربیس پر نیا تنازع امریکا اور طالبان کے درمیان ایک اور طویل کشمکش کا آغاز ثابت ہوسکتا ہے۔

بگرام ایئربیس واپس کرو ورنہ نتائج سنگین ہوں گے،ٹرمپ کی افغانستان کووارننگ

امریکا کو ایک انچ زمین بھی نہیں دیں گے، نئی جنگ کے لیے بھی تیار ہیں،افغان حکومت کاردعمل

ڈیرہ اسماعیل خان /راولپنڈی(این این آئی)ڈیرہ اسمٰعیل خان کے علاقے کلاچی میں سیکیورٹی فورسز کے آپریشن میں فتنہ الخوارج کے 7 دہشتگرد ہلاک ہوگئے، ہلاک دہشتگردوں میں دو خودکش بمبار بھی شامل تھے۔پاک فوج کے ترجمان ادارے انٹرسروسز پبلک ریلیشنز ( آئی ایس پی آر ) کے مطابق 20 ستمبر کو سیکیورٹی فورسز نے ضلع ڈیرہ اسمٰعیل خان کے علاقے کلاچی میں بھارتی پراکسی فتنہ الخوارج سے تعلق رکھنے والے خوارج کی موجودگی کی اطلاع پر انٹیلی جنس کی بنیاد پر آپریشن کیا۔آپریشن کے دوران سیکیورٹی فورسز نے خوارج کے ٹھکانے کو مؤثر انداز میں نشانہ بنایا، جس کے نتیجے میں 7 بھارتی سرپرستی یافتہ خوارج، جن میں تین افغان نڑاد خوارج اور دو خودکش بمبار شامل تھے، ہلاک ہوگئے۔آئی ایس پی آر کے مطابق پاکستان کو توقع ہے کہ عبوری افغان حکومت اپنی ذمہ داریاں نبھائے گی اور اپنی سرزمین کو پاکستان کے خلاف دہشت گرد سرگرمیوں کے لیے استعمال نہیں ہونے دے گی۔پاک فوج کے ترجمان ادارے کے مطابق علاقے میں سرچ اور کلیئرنس آپریشن جاری ہے تاکہ کسی بھی بھارتی سرپرستی یافتہ خوارج کو ختم کیا جا سکے کیونکہ پاکستان کی سیکیورٹی فورسز ملک سے بھارتی سرپرستی یافتہ دہشت گردی کے ناسور کو ختم کرنے کے لیے پرعزم ہیں۔

ڈیرہ اسمٰعیل خان ، سیکیورٹی فورسز کے آپریشن میں فتنہ الخوارج کے 7 دہشت گرد ہلاک

سیکیورٹی فورسز نے خوارج کے ٹھکانے کو مؤثر انداز میں نشانہ بنایا،ہلاک دہشت گردوں میں دو خودکش بمبار بھی شامل تھے

ایشیا کپ ٹی ٹوئنٹی کے سپر فور مرحلے کے دوسرے میچ میں نے بھارت نے پاکستان کے خلاف ٹاس جیت کر پہلے فیلڈنگ کا فیصلہ کیا ہے۔ایشیا کپ ٹی 20 میں آج پاکستان اور بھارت کی ٹیمیں دبئی کے انٹرنیشنل اسٹیڈیم میں ایک بار پھر آمنے سامنے آئی ہیں، اس میچ میں اینڈی پائی کرافٹ ہی میچ ریفری ہیں۔میچ کا ٹاس بھارت کے کپتان سوریا کمار یادیو نے جیت کر پاکستان کو پہلے بیٹنگ کی دعوت دی ہے جب کہ ٹاس کے موقع پرپچھلے میچ کی طرح اس بار بھی بھارتی کپتان نے پاکستانی کپتان سے مصافحہ نہیں کیا۔ٹاس کے بعد گفتگو کرتے ہوئے بھارتی کپتان سوریا کمار یادیو نے کہا کہ پچ بیٹنگ کیلئے اچھی لگ رہی ہے، دوسری اننگز میں اوس پڑنے کا امکان ہے انہوں نے کہایہ صرف ہمارے لیے ایک میچ ہے، انجوائے کریں گے۔سوریا کمار نے کہا کہ ٹیم میں 2 تبدیلیاں کی گئی ہیں، جسپریت بمرا اور ورن چکروتی کی ٹیم میں واپسی ہوئی ہے۔اس موقع پرقومی کرکٹ ٹیم کے کپتان سلمان آغا نے کہا کہ پاکستان ٹیم میں دو تبدیلیاں کیں ہیں، فہیم اشرف اور حسین طلعت کو پلیئنگ الیون میں شامل کیا ہے۔قومی ٹیم صائم ایوب، صاحبزادہ فرحان، فخر زمان، حسین طلعت، فہیم اشرف، سلمان علی آغا، محمد نواز،  محمد حارث، شاہین شاہ آفریدی، حارث رؤف اور ابرار احمد پر مشتمل ہے۔یاد رہےکہ گروپ میچ میں پاکستان کو بھارت نے 7 وکٹ سے شکست دی تھی۔

ایشیاکپ،بھارت کا پاکستان کیخلاف ٹاس جیت کر پہلے بائولنگ کرنے کافیصلہ

قومی ٹیم میں 2 تبدیلیاں کی گئیں، حسن نواز اور صفیان مقیم کی جگہ حسین طلعت اور فہیم اشرف کو پلیئنگ الیون میں شامل کیاگیاہے

ایشیا کپ 2025 کے سپر فور مرحلے میں پاک۔بھارت میچ سے قبل قومی ٹیم کے سابق کپتان اور لیجنڈری فاسٹ باؤلر وسیم اکرم نے شاہین شاہ آفریدی کو قیمتی مشورے دیے ہیں۔وسیم اکرم نے کہا کہ بھارت کے اوپنر شبمن گل کو قابو کرنے کے لیے شاہین کو ہوشیاری اور منصوبہ بندی کے ساتھ باؤلنگ کرنی ہوگی۔ انہوں نے عمان کے خلاف حالیہ میچ کی مثال دی، جہاں عمانی پیسر شاہ فیصل نے گِل کو ایک لیٹ سوئنگ فل لینتھ گیند پر آؤٹ کیا تھا۔ ان کے مطابق یہی حکمت عملی شاہین کے لیے بھی کارآمد ثابت ہو سکتی ہے۔اکرم نے مزید کہا کہ اب دنیا جان چکی ہے کہ شاہین ابتدائی اوورز میں یارکرز کروانے کے ماہر ہیں، لیکن صرف اسی ہتھیار پر انحصار خطرناک ہو سکتا ہے۔ ان کے بقول ایک یا دو یارکرز مؤثر ہیں، لیکن بار بار انہیں آزمانا مسائل پیدا کر سکتا ہے، اس لیے شاہین کو "پلان بی" تیار رکھنا چاہیے۔ان کا کہنا تھا کہ شاہین کو ہر گیند پر وکٹ لینے کے بجائے دباؤ سے آزاد ہوکر لینتھ اور ورائٹی کا استعمال کرنا چاہیے۔ یہی طریقہ انہیں زیادہ مؤثر اور کامیاب باؤلر بنا سکتا ہے۔واضح رہے کہ بھارت کے گروپ میچ میں پاکستان کو 7 وکٹوں سے شکست دی تھی۔

شبمن گل کے خلاف اسمارٹ باؤلنگ کریں،وسیم اکرم کا شاہین آفریدی کو مشورہ

صرف یارکرز پر انحصار نقصان دہ ہو سکتا ہے، ورائٹی اور پلان بی اپنانا ضروری ہے،وسیم اکرم

ممبئی (این این آئی)بالی ووڈ کی سپر اسٹار جوڑی شاہ رخ خان اور دیپیکا پڈوکون جلد اپنی چھٹی فلم میں ایک ساتھ جلوہ گر ہوں گے۔ بالی وڈ اداکارہ دیپیکا پڈوکون نے اپنے مداحوں کو بڑی خوشخبری دی ہے۔ انہوں نے شاہ رخ خان کے ساتھ اپنی نئی فلم ’کنگ‘ کی شوٹنگ کا آغاز کر دیا ہے، جس کی جھلک انہوں نے انسٹاگرام پر شیئر کی۔بھارتی میڈیا کے مطابق شاہ رخ خان اور دیپیکا پڈوکون نے سوشل میڈیا پر اپنی نئی فلم کنگ کا اعلان کیا ہے۔ یہ خبر سن کر اس خوبصورت جوڑی کے مداحوں میں خوشی کی لہر دوڑ اٹھی ہے۔ دیپیکا کی جانب سے یہ اعلان فلم کالکی 2898 اے ڈی کے سیکوئل سے نکلنے کے بعد کیا گیا ہے۔ دیپیکا پڈوکون نے انسٹاگرام پر اپنی اور شاہ رخ کی ایک تصویر پوسٹ کرتے ہوئے پیغام لکھا کہ شاہ رخ نے 18 برس پہلے جب اوم شانتی اوم بنی تو مجھے ایک سبق سکھایا تھا۔اداکارہ نے کیپشن میں لکھا کہ انہیں شاہ رخ نے سکھایا کہ فلم کو آپ جن لوگوں کے ساتھ مل کر بناتے ہیں وہ فلم کی کامیابی سے زیادہ اہم ہوتے ہیں، اداکارہ نے کہا کہ میں اس بات پر اتفاق کرتی ہوں اور یہی وجہ ہے کہ ہم ایک ساتھ چھٹی فلم بنا رہے ہیں۔یاد رہے کہ دیپیکا پڈوکون نے 18 برس قبل شاہ رخ خان کیساتھ فرح خان کی ہدایتکار میں بننے والی فلم اوم شانتی اوم سے بالی ووڈ میں ڈیبیو کیا تھا۔ ان کی نئی فلم کنگ کب ریلیز ہوگی اس حوالے سے ابھی کوئی تفصیلات سامنے نہیں آئیں۔ مداحوں کا کہنا ہے کہ "کنگ" صرف ایک فلم نہیں بلکہ شاہ رخ اور دیپیکا کی کامیاب شراکت داری کا نیا باب ثابت ہوگی۔

شاہ رخ خان اور دیپیکا پڈوکون جلد اپنی چھٹی فلم میں ایک ساتھ جلوہ گر ہوں گے

دیپیکا پڈوکون نے 18 برس قبل شاہ رخ خان کیساتھ فلم اوم شانتی اوم سے بالی ووڈ میں ڈیبیو کیا تھا

پاکستانی اداکارہ و ماڈل عائشہ عمر نے اپنے آنے والے رئیلیٹی پروگرام ’لازوال عشق‘ پر شدید تنقید کے بعد بول پڑیں۔ایک انٹرویو میں عائشہ عمر نے اپنے آنے والے ریئلٹی شو’لازوال عشق‘ پر ہونے والی شدید تنقید اور افواہوں کا جواب دیتے ہوئے واضح کیا ہے کہ یہ پروگرام کسی طور بھی ڈیٹنگ شو نہیں ہے۔عائشہ عمر کا کہنا ہے کہ سوشل میڈیا پر شو کو مغربی فارمیٹ جیسا قرار دینا بے بنیاد ہے۔ ان کے مطابق’لازوال عشق‘ ایک سماجی تجربہ ہے جس کا مقصد نوجوانوں کو شادی جیسے سنجیدہ رشتے کے لیے گفتگو اور باہمی سمجھ بوجھ کا موقع فراہم کرنا ہے۔اداکارہ نے بتایا کہ شو ترکیہ میں ریکارڈ کیا گیا ہے لیکن یہ اردو زبان میں پاکستانی ناظرین کے لیے تیار کیا گیا ہے۔ فارمیٹ کے تحت شرکاء ایک ہی ولا میں رہیں گے، تاہم ان کے ذاتی کمروں اور فلورز کو الگ الگ رکھا گیا ہے، صرف لاؤنج، کچن اور پول سائیڈ مشترکہ ہوں گے۔انہوں نے زور دیتے ہوئے کہا کہ اس پروگرام میں کوئی جوڑا پہلے سے طے شدہ نہیں ہوگا اور تمام فیصلے شرکاء کی باہمی گفت و شنید اور تفہیم پر مبنی ہوں گے۔ ٹیزر میں دکھایا گیا تھا کہ چار مرد اور چار خواتین ایک لگژری بنگلے میں قیام کریں گے، جہاں ان کے درمیان ہونے والی بات چیت اور جذباتی لمحوں کو کیمرے میں ریکارڈ کیا جائے گا۔اداکارہ کے مطابق شو میں تفریح ضرور ہوگی لیکن بنیادی مقصد تعلقات کی سنجیدہ بنیاد پر گفتگو کو فروغ دینا ہے، اور ثقافتی اقدار کو بھی مکمل طور پر مد نظر رکھا گیا ہے۔یاد رہے کہ شو کے ٹیزر کے بعد سوشل میڈیا پر بعض حلقوں کی جانب سے تنقید اور بائیکاٹ کی مہم چلائی گئی تھی، حتیٰ کہ پیمرا سے اس پر پابندی لگانے کا مطالبہ بھی سامنے آیا۔ تاہم پیمرا نے وضاحت کی کہ چونکہ یہ شو صرف سوشل میڈیا پر نشر ہوگا، اس لیے اس پر ان کا اختیار لاگو نہیں ہوتا۔ شو کی حتمی ریلیز تاریخ تاحال سامنے نہیں آئی، تاہم یہ جلد ہی یوٹیوب پر پیش کیا جائے گا۔عائشہ عمر کی وضاحت کے بعد دیکھنا یہ ہے کہ "لازوال عشق" پاکستانی ناظرین کو قائل کر پاتا ہے یا تنقید کا سلسلہ مزید شدت اختیار کرے گا۔

اداکارہ عائشہ عمر نے ’لازوال عشق‘ کو ڈیٹنگ شو قرار دینے کی خبریں مسترد کردیں

’لازوال عشق‘ محض تفریح نہیں بلکہ ایک سنجیدہ سماجی تجربہ، عائشہ عمر نے تنقید کرنے والوں کو دو ٹوک جواب دیدیا

ایشیا کپ کے سپر فور مرحلے میں دبئی کے میدان پر نہ صرف بنگلادیش اور سری لنکا کے درمیان دلچسپ مقابلہ دیکھنے کو ملا بلکہ ایک اہم ریکارڈ بھی ٹوٹ گیا۔سری لنکن وکٹ کیپر کوشل مینڈس نے بنگلادیشی بلے باز مہدی حسن کا کیچ پکڑ کر ٹی ٹوئنٹی فارمیٹ میں سابق کپتان اور لیجنڈ وکٹ کیپر کمار سنگاکارا کا ریکارڈ توڑ دیا۔ اس کیچ کے بعد ان کے وکٹوں کے پیچھے شکاروں کی تعداد 46 ہوگئی، جبکہ سنگاکارا نے اپنے کیریئر میں 45 شکار کیے تھے۔ اس کامیابی کے ساتھ ہی کوشل مینڈس سری لنکا کی تاریخ میں ٹی ٹوئنٹی کرکٹ کے سب سے کامیاب وکٹ کیپر بن گئے ہیں۔واضح رہے کہ سپر فور کے اسی پہلے میچ میں بنگلادیش نے سنسنی خیز مقابلے کے بعد سری لنکا کو 4 وکٹوں سے شکست دی۔کوشل مینڈس کا یہ کارنامہ سری لنکن کرکٹ کے لیے ایک یادگار لمحہ ہے جو نوجوان کھلاڑیوں کے لیے مثال قائم کرے گا۔

سری لنکن وکٹ کیپرکوشل مینڈس نے سنگاکارا کو پیچھے چھوڑتے ہوئے ٹی ٹوئنٹی میں نیا ریکارڈ بنا دیا

کوشل مینڈس نے بنگلادیشی بلے باز مہدی حسن کا کیچ پکڑ کر ٹی ٹوئنٹی فارمیٹ میں ساکمار سنگاکارا کا ریکارڈ توڑ دیا

ایران نے اپنے جوہری پروگرام پر بڑھتے بین الاقوامی دباؤ کے جواب میں ایک بڑا قدم اٹھاتے ہوئے بین الاقوامی ایٹمی توانائی ایجنسی (IAEA) کے ساتھ تعاون معطل کرنے کا اعلان کردیا ہے۔میڈیارپورٹس کے مطابق ایران کی سپریم نیشنل سکیورٹی کونسل نے فیصلہ کیا ہے کہ یورپی ممالک کی جانب سے ایران پر دوبارہ پابندیاں عائد کرنے کی کوششوں کے بعد وہ آئی اے ای اے کے ساتھ نگرانی اور معائنہ کے معاملات میں مزید تعاون نہیں کرے گا۔ایران نے خبردار کیا ہے کہ اگر یورپی طاقتیں سلامتی کونسل میں snapbackمیکانزم کے تحت پرانی پابندیاں بحال کرنے کی کارروائی آگے بڑھاتی ہیں تو تہران اپنے تمام جوہری تنصیبات تک بین الاقوامی معائنہ کاروں کی رسائی محدود کر دے گا۔گزشتہ ماہ ایران اور آئی اے ای اے کے درمیان ایک معاہدہ طے پایا تھا جس کے تحت ایران اپنے جوہری پروگرام کے حوالے سے نگرانی اور رپورٹنگ میں تعاون جاری رکھے گا، تاہم یہ تعاون اس شرط سے مشروط تھا کہ مغربی ممالک ایران پر دوبارہ پابندیاں عائد کرنے کی کوشش نہیں کریں گے۔یاد رہے کہ گزشتہ روز اقوام متحدہ کی سلامتی کونسل میں ایران پر عائد پابندیوں کے خاتمے کی قرارداد منظور نہیں ہو سکی تھی ، سلامتی کونسل کے 9 رکن ممالک نے ایران پر پابندیاں ہٹانے کی قرارداد کی مخالفت میں ووٹ دیا۔قرارداد کی مخالفت کرنے والوں میں امریکا، برطانیہ، فرانس ،ڈنمارک، یونان، پاناما، سیرالیون، صومالیہ  اور سلواکیہ شامل ہیں جبکہ قرارداد کے حق میں 4 ممالک پاکستان ،الجیریا،چین اور روس  نےووٹ دیئے، دورکن ملکوں گھانا اور جمہوریہ کوریا ووٹنگ کے دوران غیرحاضر رہے۔اگرچہ ایران نے تعاون ختم کرنے کا باضابطہ وقت نہیں بتایا، تاہم ماہرین کے مطابق یہ فیصلہ خطے میں نئی کشیدگی کو جنم دے سکتا ہے۔

ایران نے بین الاقوامی ایٹمی توانائی ایجنسی سے تعاون معطل کرنے کا اعلان کردیا

اقوام متحدہ کی سلامتی کونسل میں ایران پر عائد پابندیوں کے خاتمے کی قرارداد منظور نہیں ہو سکی تھی

ایشیا کپ سپر فور کے اہم معرکے میں آج پاکستان اور بھارت ایک بار پھر دبئی انٹرنیشنل اسٹیڈیم میں آمنے سامنے ہوں گے۔ یہ وہی میدان اور وہی میچ ریفری (اینڈی پائی کرافٹ) ہیں جن کے گرد گذشتہ میچ کے بعد ہینڈ شیک تنازع کھڑا ہوا تھا۔ میچ پاکستانی وقت کے مطابق شام ساڑھے سات بجے شروع ہوگا۔گروپ اسٹیج میں بھارت تینوں میچ جیت کر 6 پوائنٹس کے ساتھ پہلی پوزیشن پر رہا جبکہ پاکستان نے دو فتوحات کے ساتھ 4 پوائنٹس حاصل کیے اور دوسرے نمبر پر رہا۔ ابتدائی مرحلے میں بھارت نے پاکستان کو 7 وکٹوں سے شکست دی تھی۔پاکستانی ٹیم اس بار آل راؤنڈر سلمان علی آغا کی قیادت میں میدان میں اترے گی، جب کہ بھارتی ٹیم کی قیادت سوریا کمار یادیو کریں گے۔ دونوں ٹیموں کے درمیان ایک دلچسپ اور سنسنی خیز مقابلے کی توقع کی جارہی ہے۔قومی ٹیم نے میچ سے ایک روز قبل آئی سی سی کرکٹ اکیڈمی میں تین گھنٹے کی بھرپور پریکٹس کی۔ اس موقع پر چیئرمین پی سی بی محسن نقوی نے کھلاڑیوں سے ملاقات کر کے ان کا حوصلہ بڑھایا اور امید ظاہر کی کہ ٹیم شاندار کھیل کا مظاہرہ کرے گی۔ذرائع کے مطابق پاکستان نے بھارت کے خلاف پلیئنگ الیون میں تبدیلیاں کی ہیں۔ آل راؤنڈر فہیم اشرف اور حسین طلعت کو ٹیم میں شامل کیا گیا ہے جبکہ حسن نواز کو ڈراپ کردیا گیا ہے۔ فاسٹ بولنگ کی ذمہ داری شاہین شاہ آفریدی اور حارث رؤف کے سپرد ہوگی جبکہ اسپن شعبے میں ابرار احمد کے ساتھ محمد نواز اور صائم ایوب ٹیم کو سہارا دیں گے۔اطلاعات کے مطابق بھارت کے خلاف پاکستان کی ممکنہ الیون یہ ہوگی:صائم ایوب، صاحبزادہ فرحان، فخر زمان، فہیم اشرف، سلمان علی آغا (کپتان)، محمد نواز، حسین طلعت، محمد حارث (وکٹ کیپر)، شاہین شاہ آفریدی، حارث رؤف اور ابرار احمد۔

ایشیا کپ سپر فور میں پاکستان اور بھارت آج پھردبئی میں ٹکرائیں گے، سنسنی خیز مقابلے کی توقع

روایتی حریفوں کا ہائی وولٹیج ٹاکرا شام ساڑھے7 بجے شروع ہوگا،سلمان علی آغا کی قیادت میں گرین شرٹس میدان میں اتریں گے

ایشیا کپ کے  سپر فور مرحلے کے پہلے میچ میں بنگلہ دیش نے سری لنکا کو سنسنی خیز مقابلے کے بعد 4 وکٹوں سے شکست دے دی ۔دبئی میں کھیلے گئے ایشیا کپ ٹی ٹوئنٹی ٹورنامنٹ  میں گروپ بی کے سپر فور مرحلےکے  پہلے میچ میں میچ میں بنگلہ دیش نے ٹاس جیت کر پہلے فیلڈنگ کا فیصلہ کیا۔ سری لنکن ٹیم نے  پہلے بیٹنگ کرتے ہوئےمقررہ 20 اوورز میں 7 وکٹوں پر 168 رنز بنائے۔ داسن شناکا 63 رنز کے ساتھ ناقابلِ شکست رہے، جبکہ کوشل مینڈس نے 34 اور نسانکا نے 22 رنز اسکور کیے۔ بنگلہ دیش کی جانب سے مستفیض الرحمٰن نے تین کھلاڑیوں کو پویلین بھیجا۔جوابی بیٹنگ میں بنگلہ دیش نے سری لنکا کا 169 رنز کا ہدف آخری اوور میں 6 وکٹوں کے نقصان پر حاصل کرلیا۔ سیف حسن نے 61 اور توحید ہردوئے نے 58 رنز کی شاندار اننگز کھیل کر کامیابی میں کلیدی کردار ادا کیا۔ کپتان لٹن داس نے 23 رنز جوڑے۔یاد رہے کہ گروپ اے سے پاکستان اور بھارت جبکہ گروپ بی سے سری لنکا اور بنگلہ دیش سپر فور میں پہنچے ہیں۔

ایشیا کپ سپر فور مرحلہ، بنگلہ دیش نے سری لنکا کوسنسنی خیزمقابلے کے بعد 4 وکٹوں سےہرادیا

بنگلہ دیش نے سری لنکا کادیا گیا169رنزکاہدف ایک گیند قبل 6 وکٹوں کے نقصان پر حاصل کرلیا

ایشیا کپ کے سپر فور مرحلے میں پاکستان اور بھارت کے درمیان دوسرا اہم میچ کل کھیلا جائے گا، اور اس مقابلے کے لیے بھی متنازع ریفری اینڈی پائیکرافٹ کو مقرر کر دیا گیا ہے۔اینڈی پائی کرافٹ کے ہاتھ ملانے کے تنازع کے بعد ایک بار پھر پاک بھارت ٹیمیں ایشیا کپ میں آمنے سامنے ہوں گی، وہی ٹیمیں، وہی میدان اور وہی میچ ریفری۔ کل دبئی میں سپر فور مرحلے کے اہم معرکے میں روایتی حریف ٹکرائیں گے۔کرک انفو کی رپورٹ کے مطابق 14 ستمبر کے گروپ میچ میں اینڈی پائی کرافٹ اس وقت تنازع کا حصہ بنے جب پاکستان کے کپتان سلمان آغا اور بھارتی کپتان کے درمیان ہاتھ نہ ملانے کا معاملہ سامنے آیا۔ بعد ازاں پاکستانی ٹیم مینجمنٹ نے انکشاف کیا کہ میچ ریفری نے خود کپتان کو ایسا کرنے کا مشورہ دیا تھا۔پاکستان کرکٹ بورڈ نے اس رویے پر شدید احتجاج کرتے ہوئے آئی سی سی سے اینڈی پائی کرافٹ کو مزید ذمہ داریاں نہ دینے کا مطالبہ کیا اور بائیکاٹ کی دھمکی تک دے دی۔ تاہم بعد میں ریفری نے پاکستانی کپتان سے معافی مانگی جس کے بعد معاملہ ختم ہوگیا اور وہ متحدہ عرب امارات کے خلاف میچ میں بھی فرائض سرانجام دیتے رہے۔اب ایک بار پھر پاکستان اور بھارت کے درمیان کل دبئی میں کھیلے جانے والے سپر فور کے بڑے میچ میں اینڈی پائی کرافٹ ہی ریفری ہوں گے، جس سے شائقین کرکٹ کی دلچسپی اور بڑھ گئی ہے۔کرکٹ شائقین کی نظریں کل دبئی کے اس بڑے ٹاکرے پر جمی ہیں جہاں دونوں ٹیمیں ایک بار پھر تاریخ دہرانے کو تیار ہیں۔

ایشیا کپ،متنازع ریفری اینڈی پائی کرافٹ پھر سے پاک بھارت میچ کے ریفری مقرر

پاکستان اور بھارت کے درمیان سپر فور مرحلے کا اہم میچ کل دبئی میں کھیلا جائے گا

امریکا میں روزگار حاصل کرنے کے خواہشمند افراد کے لیے ایک بری خبر سامنے آئی ہے۔ امریکی صدر ڈونلڈ ٹرمپ نے ایچ ون بی ورکر ویزا کی سالانہ فیس میں ریکارڈ اضافہ کرتے ہوئے اسے ایک لاکھ ڈالر مقرر کر دیا ہے۔ اس اقدام کو امیگریشن کو محدود کرنے کی نئی پالیسی کا حصہ قرار دیا جارہا ہے۔غیر ملکی میڈیا کے مطابق صدر ٹرمپ نے اس حکم نامے پر باضابطہ دستخط کر دیے ہیں جس کے بعد ویزا حاصل کرنے کے خواہش مند امیدواروں اور کمپنیوں کو بھاری رقم ادا کرنا ہوگی۔ حکام کا کہنا ہے کہ بعض کیسز میں کمپنیوں پر اس سے بھی زیادہ مالی بوجھ پڑ سکتا ہے۔ماہرین کا کہنا ہے کہ سب سے زیادہ نقصان امریکی ٹیکنالوجی انڈسٹری کو ہوگا، کیونکہ یہی کمپنیاں بڑی تعداد میں بھارت اور چین سے ماہرین بھرتی کرتی ہیں۔ ایچ ون بی ویزے کی نئی پالیسی 21 ستمبر 2025 سے نافذالعمل ہوگی، ویزا فیس میں اضافے سے بھارتی طلبااور ٹیک کمپنیاں بھی زیادہ متاثر ہوں گی۔رپورٹ میں بتایا گیا ہے کہ ماضی میں ایچ ون بی ویزا کی فیس صرف چند سو ڈالر سے شروع ہو کر مخصوص مراحل میں چند ہزار ڈالر تک جا سکتی تھی، لیکن اب مقررہ ایک لاکھ ڈالر کی فیس نے امیدواروں اور آجر دونوں کے لیے مشکلات کھڑی کر دی ہیں۔اس کے علاوہ صدر ٹرمپ نے امیر افراد کے لیے گولڈن ویزا پروگرام کا اعلان بھی کر دیا ہے۔ نئے ایگزیکٹو آرڈر کے تحت انفرادی طور پر گولڈن ویزا حاصل کرنے کے لیے دس لاکھ ڈالر ادا کرنا ہوں گے، جبکہ کسی کمپنی کی جانب سے درخواست دینے کی صورت میں یہ رقم بیس لاکھ ڈالر ہوگی۔ یہ فنڈز امریکی محکمہ تجارت کو عطیہ کیے جائیں گے، جو انہیں تجارتی مواقع کی بہتری پر خرچ کرے گا۔تجزیہ کاروں کے مطابق یہ اقدام نہ صرف ہنر مند افراد کے امریکا آنے کے خوابوں پر کاری ضرب ہے بلکہ امریکی آئی ٹی اور ٹیکنالوجی سیکٹر کے لیے بھی بڑا دھچکا ثابت ہوگا، کیونکہ مہنگی فیس کے باعث عالمی سطح پر بھرتیوں میں نمایاں کمی آسکتی ہے۔ماہرین کے بقول، یہ پالیسی طویل المدتی طور پر امریکا کی معیشت اور ٹیکنالوجی انڈسٹری کے لیے بھی نقصان دہ ثابت ہوسکتی ہے۔

امریکا میں ایچ ون بی ویزا فیس میں ریکارڈ اضافہ، امیدواروں اور کمپنیوں پر بھاری بوجھ

صدر ٹرمپ کے نئے حکم نامے کے تحت ویزا فیس ایک لاکھ ڈالر مقرر، ٹیکنالوجی سیکٹر سب سے زیادہ متاثر ہوگا

ایشیا کپ کے سب سے بڑے معرکے سے قبل ایک حیران کن فیصلہ سامنے آیا ہے، پاکستان کرکٹ ٹیم نے بھارت کے خلاف سپر فور مرحلے کے ہائی وولٹیج میچ سے پہلے اپنی طے شدہ پریس کانفرنس اچانک منسوخ کر دی، جس نے شائقین کو مزید تجسس میں ڈال دیا ہے۔میڈیارپورٹس کے مطابق دبئی انٹرنیشنل اسٹیڈیم میں اتوار، 21 ستمبر کو ہونے والے پاک بھارت سپر فور میچ سے قبل پاکستان کرکٹ ٹیم کی پری میچ پریس کانفرنس اچانک منسوخ کر دی گئی۔ یہ پریس کانفرنس پاکستانی وقت کے مطابق شام 7 بجے ہونا طے تھی لیکن آخری لمحات میں ٹیم مینجمنٹ نے اسے ملتوی کر دیا۔ایشین کرکٹ کونسل (اے سی سی) نے بھی اس فیصلے کی باضابطہ تصدیق کر دی ہے تاہم کانفرنس کی منسوخی کی کوئی وجہ بیان نہیں کی گئی۔ یہ دوسری بار ہے کہ ایشیا کپ 2025 کے دوران پاکستانی ٹیم نے پری میچ میڈیا بریفنگ سے گریز کیا ہے، اس سے قبل متحدہ عرب امارات کے خلاف میچ سے پہلے بھی پریس کانفرنس نہیں کی گئی تھی۔کرکٹ ماہرین اور حلقوں کے مطابق یہ فیصلہ غیر معمولی ہے کیونکہ پریس کانفرنس کو ہمیشہ ایک اہم موقع سمجھا جاتا ہے جہاں کھلاڑی اور کپتان میچ سے متعلق اپنے خیالات اور حکمت عملی سے آگاہ کرتے ہیں۔ خاص طور پر بھارت کے ساتھ گزشتہ میچ کے بعد سامنے آنے والے "ہینڈ شیک تنازع" کے تناظر میں اس فیصلے کو مزید اہمیت دی جا رہی ہے۔دوسری جانب پاکستان ٹیم مینجمنٹ کا کہنا ہے کہ کھلاڑی اپنی بھرپور تیاریوں میں مصروف ہیں۔ ٹیم کا مورال بلند رکھنے کے لیے ایک موٹیویشنل اسپیکر کی خدمات بھی حاصل کی گئی ہیں اور میچ سے قبل کھلاڑیوں کی کارکردگی بہتر بنانے پر مکمل توجہ دی جا رہی ہے۔

ایشیاکپ،پاک بھارت ٹاکرے سے قبل پاکستان ٹیم کی پری میچ پریس کانفرنس منسوخ

پاک بھارت مقابلےکا دباؤ کم کرنے کیلئے پی سی بی کا بڑا فیصلہ، ٹیم کیلئے موٹیویشنل اسپیکر کی خدمات حاصل کرلیں

فیڈرل بورڈ آف ریونیو (ایف بی آر) نے سوشل میڈیا پر اپنی دولت، پرتعیش گھروں، قیمتی گاڑیوں اور زیورات کی نمائش کرنے والوں کے خلاف کریک ڈاؤن کا فیصلہ کر لیا ہے۔ نجی ٹی وی کی رپورٹ کے مطابق ایف بی آر نے ایسے ایک لاکھ سے زائد امیر افراد کا ڈیٹا جمع کر لیا ہے جو سوشل میڈیا پر شاہانہ زندگی کا اظہار تو کرتے ہیں مگر ان کی آمدن اور اخراجات ٹیکس گوشواروں سے مطابقت نہیں رکھتے۔حکام کا کہنا ہے کہ شادیوں میں ہزاروں ڈالر کے سوٹ پہننے والے اور لاکھوں روپے کے اخراجات کرنے والے بھی کارروائی کی زد میں آئیں گے۔ ایف بی آر گزشتہ سال جمع کرائے گئے ٹیکس ریٹرنز کا اس سال سے موازنہ کرے گا اور کم از کم 80 فیصد ریٹرنز کا آڈٹ کیا جائے گا۔ذرائع کے مطابق ایسے افراد جو اپنی آمدن میں اضافہ ظاہر نہیں کرتے مگر شاہانہ طرزِ زندگی اختیار کیے ہوئے ہیں، ان کے خلاف سخت ایکشن ہوگا۔ ایف بی آر نے واضح کیا ہے کہ جو شہری فوری طور پر اپنے گوشوارے اپ ڈیٹ کر لیں گے اور مکمل معلومات فراہم کریں گے، ان کے خلاف کارروائی فی الحال مؤخر کر دی جائے گی، تاہم ہدایات کو نظر انداز کرنے والے افراد قانونی گرفت میں آئیں گے۔یہ اقدام نان فائلرز اور ٹیکس چوری کرنے والوں کے خلاف جاری مہم کا حصہ ہے تاکہ قومی خزانے کو بہتر کیا جا سکے اور ٹیکس کے دائرے کو مزید وسعت دی جا سکے۔

ایف بی آرنے سوشل میڈیا پر دولت کی نمائش کرنے والوں کیخلاف کارروائی کا فیصلہ کرلیا

ایف بی آر نے شاہانہ لائف اسٹائل رکھنے والےایک لاکھ امیر افراد کا ڈیٹا جمع کر لیا، آمدنی و اخراجات کا جائزہ لیا جا رہاہے

ایک اوریورپی ملک پرتگال نے بھی فلسطین کو بطورریاست تسلیم کرنے کااعلان کردیا۔غیر ملکی میڈیا رپورٹس کے مطابق پرتگالی وزارتِ خارجہ نے تصدیق کی ہے کہ بروز اتوار 21 ستمبر کو فلسطین کو ریاست تسلیم کرنے کا باضابطہ اعلان کیا جائے گا۔ اس اعلان سے قبل پرتگال کے وزیر خارجہ نے اپنے برطانیہ کے دورے کے دوران کہا تھا کہ ان کا ملک فلسطینی ریاست کو تسلیم کرنے پر سنجیدگی سے غور کر رہا ہے۔بین الاقوامی تجزیہ کاروں کا کہنا ہے کہ پرتگال کا یہ فیصلہ اس وقت سامنے آیا ہے جب دنیا کے کئی ممالک اقوامِ متحدہ کی جنرل اسمبلی کے اجلاس کے موقع پر فلسطین کی حمایت میں اپنے مؤقف کو مزید واضح کرنے کی تیاری کر رہے ہیں۔پرتگال سے پہلے فرانس، برطانیہ، آسٹریلیا اور کینیڈا سمیت کئی ممالک فلسطین کو ریاست تسلیم کر چکے ہیں۔ ماہرین کے مطابق پرتگال کا اقدام نہ صرف یورپ میں فلسطین کی حمایت کو مزید تقویت دے گا بلکہ اسرائیل-فلسطین تنازعے میں دو ریاستی حل کے بیانیے کو بھی عالمی سطح پر نئی توانائی ملے گی۔پرتگال کا یہ فیصلہ واضح کرتا ہے کہ دنیا اب فلسطینی ریاست کے وجود کو نظرانداز نہیں کر سکتی۔ اگر عالمی برادری متحد ہو کر دو ریاستی حل کی حمایت جاری رکھے تو مشرقِ وسطیٰ میں دیرپا امن کی ایک نئی راہ ہموار ہو سکتی ہے۔

پرتگال کا بڑا فیصلہ، فلسطین کو بطور ریاست تسلیم کرنے کا اعلان کردیا

کل بروزاتوار21 ستمبر کو فلسطین کو ریاست تسلیم کرنے کا باضابطہ اعلان کریں گے، وزارت خارجہ پرتگال

سکھر کے علاقے صالح پٹ میں انسانیت کو شرما دینے والا واقعہ پیش آیا جہاں ایک بااثر وڈیرے نے کھیت میں پانی پینے کے لیے گھسنے پر مزدور غلام مصطفیٰ کی اونٹنی کو بدترین تشدد کا نشانہ بنایا۔میڈیارپورٹس کے مطابق وڈیرے نے غصے میں آکر اونٹنی کو ٹریکٹر سے باندھ کر گھسیٹا، لاٹھیاں برسائیں اور اس کی ٹانگ توڑ ڈالی۔ زخمی جانور کو مقامی اسپتال پہنچایا گیا لیکن ڈاکٹروں نے علاج سے انکار کر دیا۔واقعے کی خبر سامنے آنے پر وزیراعلیٰ سندھ مراد علی شاہ نے نوٹس لیتے ہوئے میئر سکھر اور چیئرمین ڈسٹرکٹ کونسل سے فوری رپورٹ طلب کر لی۔ انہوں نے واضح کیا کہ جانور کے ساتھ ایسے وحشیانہ سلوک کو برداشت نہیں کیا جا سکتا۔ بعدازاں ابتدائی طبی امداد کے بعد زخمی اونٹنی کو مزید علاج کے لیے کراچی منتقل کر دیا گیا۔پولیس نے اونٹنی کے مالک کی شکایت پر مقدمہ درج کر لیا ہے۔ پولیس ترجمان کے مطابق تین ملزمان میں سے ایک کو گرفتار کر لیا گیا ہے جبکہ دیگر کی تلاش جاری ہے۔یاد رہے کہ گزشتہ سال بھی سانگھڑ میں ایک بااثر شخص نے زمین پر گھسنے والے اونٹ کی ٹانگ کاٹ دی تھی جس پر ملک بھر میں شدید غم و غصہ دیکھنے میں آیا تھا۔یہ واقعہ اس بات کا ثبوت ہے کہ جانوروں پر بڑھتے ہوئے مظالم معاشرتی بے حسی اور قانون کے کمزور نفاذ کی عکاسی کرتے ہیں۔ اگر سخت قانونی اقدامات نہ کیے گئے تو ایسے لرزہ خیز واقعات مستقبل میں بھی سامنے آتے رہیں گے۔

سکھر میں سفاکیت کی انتہا، بااثر وڈیرے نے اونٹنی کو بہیمانہ تشدد کا نشانہ بنا ڈالا

کھیت میں گھسنےپر اونٹنی کی ٹانگ توڑ دی گئی،وزیراعلیٰ سندھ کا سخت نوٹس،زخمی اونٹنی کو مزید علاج کیلئے کراچی منتقل کردیا گیا

افغانستان میں طالبان حکومت نے 8 ماہ سے قید معمر برطانوی جوڑے 80سالہ پیٹر رینالڈز اور ان کی اہلیہ76سالہ باربی رینالڈز کو رہا کر دیا،جوڑے کی رہائی قطر کی کامیاب ثالثی کے بعد عمل میں آئی، رہائی کے بعد جوڑے کو دوحہ منتقل کردیا گیا ہے۔ برطانوی میڈیا کے مطابق، دونوں کو رواں سال فروری میں بامیان میں بغیر اطلاع ایک طیارہ استعمال کرنے پر گرفتار کیا گیا تھا۔ دورانِ حراست انہیں چار بار عدالت میں بھی پیش کیا گیا اور ان کی صحت کے حوالے سے شدید تشویش پائی جاتی رہی۔کابل میں قطری سفارتخانے نے رینالڈز جوڑے کو طبی سہولیات، ادویات اور اہلِ خانہ سے رابطے کی سہولت فراہم کی۔ برطانوی حکومت نے اس رہائی کا خیرمقدم کرتے ہوئے قطر کی سفارتی کوششوں کو بھرپور سراہا ہے۔قطر روانگی سے قبل باربی رینالڈز نے میڈیا سے مختصرگفتگو کرتے ہوئے کہا کہ اگر ممکن ہوا تو ہم دوبارہ افغانستان واپس آئیں گے، کیونکہ ہم خود کو افغان سمجھتے ہیں۔ فی الحال سب سے بڑی خواہش اپنے بچوں اور خاندان سے ملنے کی ہے۔ باربی اور پیٹر رینالڈز گزشتہ 18 برس سے افغانستان میں مقیم تھے اور ایک فلاحی ادارہ چلا رہے تھے، جسے طالبان کے اقتدار سنبھالنے کے بعد باضابطہ طور پر کام کی اجازت دی گئی تھی۔افغان وزارتِ خارجہ نے تصدیق کی کہ جوڑے نے افغان قوانین کی خلاف ورزی کی تھی، تاہم مزید تفصیلات نہیں بتائیں۔یہ واقعہ اس حقیقت کی عکاسی کرتا ہے کہ سفارتکاری اور پسِ پردہ رابطے کس طرح سب سے پیچیدہ تنازعات اور انسانی بحرانوں کو حل کر سکتے ہیں۔ قطر نے ایک بار پھر ثابت کیا ہے کہ وہ خطے میں محض ثالث ہی نہیں بلکہ انسانیت کی امید کا ایک اہم ستون بن چکا ہے۔

قطر کی ثالثی کام کرگئی، افغان طالبان نے 8 ماہ بعد برطانوی معمر جوڑے کو رہا کر دیا

80 سالہ پیٹر اور 76 سالہ باربی رینالڈز کوفروری میں گرفتار کیا گیا تھا، رہائی کے بعد دوحہ منتقل

لندن فنڈریزنگ کنسرٹ’ٹوگیدر فار فلسطین‘لندن کے ویمبلے ایرینا میں منعقدہ بڑے فنڈریزنگ کنسرٹ’ٹوگیدر فار فلسطین‘ کے دوران برطانوی اداکار بینڈکٹ کمبربیچ نے معروف فلسطینی شاعر محمود درویش کی نظمOn This Land There Are Reasons to Liveپڑھ کر حاضرین کو اشکبار کردیا۔اس کنسرٹ میں شہریوں نے دل کھول کر عطیات دیے اور 2 ملین ڈالر جمع ہوئے جو فلسطینی امدادی اور فلاحی تنظیموں کو دیے جائیں گے۔تقریب میں 69 فنکاروں اور مقررین نے شرکت کی۔ عالمی شہرت یافتہ گلوکاروں کی پرفارمنسز کے ساتھ فلسطینی فنکار سما عبد الہادی، سینٹ لیوانٹ اور ایلیانا نے بھی دل جیت لیے۔تقریب کی تشہیر میں رِض احمد، بلی آئلش، کلین مرفی اور جاویئر بارڈم سمیت کئی عالمی ستاروں نے حصہ لیا۔ خطاب کرنے والوں میں فلورنس پیو، نکولا کاگلن، مہدی حسن، ایرک کانٹونا اور یو این ایلچی فرانچیسکا البانیز شامل تھے۔مقررین نے فلسطینی عوام کی تکالیف پر خاموش رہنے والی عالمی شخصیات کو تنقید کا نشانہ بنایا، جبکہ بلی آئلش، کلین مرفی اور واخین فینکس نے ویڈیو پیغامات کے ذریعے جنگ بندی کا مطالبہ کیا۔

برطانوی اداکار نے جذباتی انداز میں فلسطین کیلئے نظم پڑھ کر حاضرین کو اشکبار کردیا

کنسرٹ میں شہریوں نے دل کھول کر عطیات دیئے اور 2 ملین ڈالر اکٹھے ہوئے جو فلسطینی امدادی اور فلاحی تنظیموں کو دی جائیں گی

بالی ووڈ کے معروف گلوکار زوبین گارگ سنگاپور میں اسکوبا ڈائیونگ کرنے کے دوران چل بسے۔بھارتی میڈیا رپورٹس کے مطابق ان کی عمر 52 برس تھی۔زوبین گرگ کو بالی ووڈ فلم گینگسٹر کے مقبول گانے’یا علی‘ سے غیر معمولی شہرت ملی، یہ گانا آج بھی مداحوں کے دلوں میں زندہ ہے۔ ان کی اچانک موت نے شوبز انڈسٹری اور چاہنے والوں کو صدمے میں ڈال دیا ہے۔میڈیا رپورٹس کے مطابق زوبین گرگ سنگاپور میں منعقدہ نارتھ ایسٹ انڈیا فیسٹیول میں شرکت کے لیے موجود تھے، جہاں وہ 20 اور 21 ستمبر کو پرفارم کرنے والے تھے۔ اسی دوران اسکوبا ڈائیونگ کرتے وقت انہیں سانس لینے میں دشواری پیش آئی۔ریسکیو ٹیم نے فوری طور پر انہیں پانی سے نکالا اور سی پی آر دے کر اسپتال منتقل کیا، تاہم دوپہر ڈھائی بجے کے قریب وہ جانبر نہ ہو سکے۔زوبین گرگ نے ہندی، بنگالی اور آسام کی زبانوں میں بھی گانے گائے۔ بالی ووڈ میں ان کا سفر فلم گینگسٹر کے ہٹ گانے ’یا علی‘ سے شروع ہوا، جبکہ فلم کرش 3 کے گانے’دل تو ہی بتا‘ سمیت کئی سپر ہٹ نغمے بھی ان کے کریئر کا حصہ رہے۔

بالی ووڈ کے معروف گلوکار زوبین گرگ اسکوبا ڈائیونگ کے دوران چل بسے

’یا علی‘ سے شہرت پانے والے 52 سالہ گلوکار کی موت نے شوبز انڈسٹری اور مداحوں کو صدمے میں ڈال دیا

India has secured the top position in Group A. They have also qualified for the super four stage, whereas Oman has been knocked out of the tournament.

Asia Cup 2025: India Qualifies for Super Four Stage

India has won back-to-back matches in the ongoing ACC Men&rsquo;s Asia Cup 2025. This means that they have now qualified for the Super Four, where the competition will get tougher. Oman, on the other hand, has been knocked out. They lost to UAE by a big margin of 42 runs, courtesy of some great batting by Muhammad Waseem and Alishan Sharafu.

Batting first, UAE put on a commanding total of 172 against Oman at Abu Dhabi. This was a must-win game for Oman, as they were earlier thumped by Pakistan by a big margin of 93 runs. Unfortunately, their plans didn&rsquo;t work against a more organized UAE team. They played smartly, making sure to keep wickets in hand throughout their batting innings.

Once again, Muhammad Waseem was the star batter for the UAE. He assessed the conditions and changed gears during the game accordingly. His innings of 69 proved vital for the UAE, as other batters found the base provided by Waseem to launch in the end.

Coming out to chase the target, Oman had no answers. They kept losing wickets at regular intervals due to some tight bowling from the UAE bowlers. In the end, they fell short and lost the match by 42 runs. This confirmed their group stage elimination from the ACC Men&rsquo;s Asia Cup 2025.

On the other hand, UAE got a lifeline by beating Oman comprehensively. Being the host of the tournament, the onus was on the UAE to stay in the qualification hunt. Their batters understood the scenario and came up with goods on Monday. This win will surely give UAE a much-needed confidence.

With this win, UAE is now tied with Pakistan on the points table. Their net run-rate is obviously lower than Pakistan, who are currently sitting at the second position. Pakistan faced a comprehensive defeat against India on Sunday. They looked completely out of form in the Dubai clash, as none of their batting or bowling resources worked decisively against the rampant Indian team.

The green shirts are, however, still optimistic that they can turn the tide against India in the next matches, provided they qualify to the Super Four stage. Pakistan will now lock horns with the UAE in a must-win game on Wednesday. Both teams will be looking to win this match, as doing that will secure a confirmed spot for them in the Super Four stage.

Asia Cup 2025: India Secures Top Spot in Group A

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan