Cricket

Entertainment

Football

روس نے یوکرین پر جنگ کے آغاز سے اب تک کا سب سے بڑا فضائی حملہ کیا ہے، جس میں ایک ہی رات میں 728 ڈرونز اور 13 میزائل داغے گئے۔ بین الاقوامی میڈیا کے مطابق یہ حملہ ایک ایسے وقت میں کیا گیا جب امریکی صدر ڈونلڈ ٹرمپ نے روسی صدر ولادیمیر پیوٹن پر غیر معمولی سخت تنقید کی اور یوکرین کو مزید ہتھیار فراہم کرنے کا وعدہ کیا۔یوکرینی فضائیہ نے دعویٰ کیا ہے کہ زیادہ تر ڈرونز کو راستے میں ہی تباہ کر دیا گیا، تاہم چھ ہائپرسانک میزائلوں میں سے کچھ نے نقصان پہنچایا ہے، جس کی تفصیلات جاری نہیں کی گئیں۔ حملے میں مغربی یوکرین کا شہر لوٹسک سب سے زیادہ متاثر ہوا، جہاں ایک صنعتی گودام اور پارکنگ ایریاز میں آگ لگنے کی اطلاعات ہیں۔ علاقائی حکام کے مطابق لوٹسک، جو پولینڈ کی سرحد سے صرف 200 کلومیٹر کے فاصلے پر واقع ہے، اس سے قبل کبھی اتنے بڑے حملے کی زد میں نہیں آیا تھا۔ تاہم وہاں کوئی جانی نقصان رپورٹ نہیں ہوا۔ دوسری جانب، ڈونیسک ریجن میں ڈرون حملوں اور گائیڈڈ بموں کے نتیجے میں کم از کم آٹھ افراد کی ہلاکت کی تصدیق کی گئی ہے۔حملے کے بعد پولینڈ نے اپنے جنگی طیارے الرٹ پر رکھ دیے اور فضائی نگرانی بڑھا دی، کیونکہ حملوں کا کچھ حصہ نیٹو سرحدوں کے قریب بھی ہوا۔ پولینڈ کی افواج نے اسےاب تک کا سب سے بڑا خطرہ قرار دیا۔یاد رہےٹرمپ نےگزشتہ روز کہا تھا کہ ہمیں پیوٹن کی طرف سے بہت کچھ برداشت کرنا پڑتا ہے وہ ہمیشہ مسکراتا ہے مگر یہ سب بے معنی ہوتا ہے۔ میں اس سے خوش نہیں ہوں۔انہوں نے عندیہ دیا کہ وہ ایک ایسے بل کی حمایت کر سکتے ہیں جس کے تحت روسی تیل، گیس، یورینیم اور دیگر مصنوعات خریدنے والے ممالک پر 500 فیصد ٹیکس عائد کیا جائے گا۔

روس نے یوکرین پر سب سے بڑا فضائی حملہ کردیا، 728 ڈرونز اور 13 میزائل داغے گئے

یہ حملہ ٹرمپ کی جانب سے کیف کو مزید دفاعی ہتھیار فراہم کرنے کے وعدے اور روسی صدر پر تنقید کے بعد کیا گیا

صارفین کیلئے خوش خبری،ملک بھر کےلیے ماہانہ ایڈجسٹمنٹ کے تحت بجلی سستی کردی گئی جس کا نیپرا نے نوٹی فکیشن بھی جاری کردیا۔کراچی کے بجلی صارفین کے لیے 4 روپے3 پیسے فی یونٹ جبکہ کراچی کے سوا باقی ملک کے لیے بجلی 50 پیسے فی یونٹ سستی کی گئی ہے۔نیپرا کی جانب سے جاری کردہ اعلامیے کے مطابق ڈسکوز صارفین کے لیے بجلی کی قیمت میں 50پیسے فی یونٹ کمی کی گئی، ڈسکوز صارفین کیلئے بجلی کے نرخوں میں کمی مئی کی ماہانہ فیول کاسٹ ایڈجسٹمنٹ کی مد میں کی گئی۔نیپرا نے ماہانہ ایڈجسٹمنٹ میں بجلی کی قیمتوں میں کمی کے الگ الگ نوٹی فکیشنز جاری کر دیے، جس میں کہا گیا ہے کہ بجلی صارفین کو کمی کا ریلیف جولائی کے بلوں میں ملے گا۔نوٹی فکیشن میں کہا گیا ہے کہ کے-الیکٹرک کے لیے بجلی اپریل 2025 کی ماہانہ ایڈجسٹمنٹ میں سستی کی گئی اور باقی ملک کے لیے مئی 2025 کی ایڈجسٹمنٹ میں بجلی کی قیمت میں کمی کی گئی ہے۔نیپرا نے نوٹی فکیشن میں بتایا کہ کے-الیکٹرک نےاپریل کی ایڈجسٹمنٹ میں 4 روپے 69 پیسے فی یونٹ کمی کی درخواست کی تھی جبکہ سی پی پی اے نے مئی کی ایڈجسٹمنٹ میں 10 پیسے فی یونٹ کا اضافہ مانگا تھا جب کہ سرکاری ڈسکوز کے صارفین کیلئے فی یونٹ قیمت میں 50 پیسے کی کمی کی گئی ہے۔

کراچی سمیت ملک بھر کے صارفین کیلئے بجلی سستی کر دی گئی،نوٹیفکیشن جاری

کراچی کےکیلئے بجلی 4 روپے 3 پیسے فی یونٹ جبکہ باقی ملک کیلئے بجلی50پیسے فی یونٹ سستی کی گئی ہے

اوورسیز پاکستانیوں نے ڈالرز وطن بھیجنے کا نیا ریکارڈ قائم کر دیا۔بیرون ملک مقیم شہریوں نے ایک بار پھر ملک سے اپنی گہری وابستگی کا مظاہرہ کرتے ہوئے ترسیلات زر کا نیا ریکارڈ قائم کر دیا۔ اسٹیٹ بینک آف پاکستان کے مطابق ایک سال کے دوران اوورسیز پاکستانیوں نے مجموعی طور پر 38 ارب 30 کروڑ ڈالرز وطن منتقل کیے، جو پچھلے مالی سال کی نسبت 26اعشاریہ6فیصد زیادہ ہیں۔اعداد و شمار کے مطابق رواں مالی سال کے دوران پاکستانیوں نے 8 ارب ڈالرز اضافی بھیجے۔ صرف جون 2025 میں ترسیلات کی مالیت 3 ارب 40 کروڑ 60 لاکھ ڈالرز رہی، جو جون 2024 کے مقابلے میں 8 فیصد کا نمایاں اضافہ ہے۔ملکی سطح پر سب سے زیادہ ترسیلات سعودی عرب سے آئیں، جہاں مقیم پاکستانیوں نے 82 کروڑ 32 لاکھ ڈالر بھجوائے۔ متحدہ عرب امارات سے 71 کروڑ 72 لاکھ ڈالرز، برطانیہ سے 53 کروڑ 76 لاکھ ڈالرز، اور امریکا سے 28 کروڑ 12 لاکھ ڈالرز وطن منتقل کیے گئے۔معاشی ماہرین کے مطابق ترسیلات زر میں اضافے سے کرنٹ اکاؤنٹ سرپلس ہوا ہے، جو پاکستان کی معیشت کے لیے ایک خوش آئند اشارہ ہے۔دوسری جانب وزیراعظم شہباز شریف کا گزشتہ مالی سال میں تاریخ کی بلند ترین ترسیلات زر ریکارڈ ہونے پر اظہار تشکر کیا ہے۔شہباز شریف نے کہا ہےکہ ترسیلات زر میں26اعشاریہ6 فیصد اضافہ انتہائی خوش آئند ہے، ترسیلات زر میں ریکارڈ اضافہ بیرون ملک پاکستانیوں کی قابل قدر خدمات اور ان کے پاکستانی معیشت میں اعتماد کا مظہر ہے۔

اوورسیز پاکستانیوں نے مالی سال 2025 میں ڈالرز وطن بھیجنے کا نیا ریکارڈ قائم کر دیا

ایک سال کے دوران اوورسیز پاکستانیوں نے مجموعی طور پر 38 ارب 30 کروڑ ڈالرز وطن منتقل کیے،مرکزی بینک

راولپنڈی کے تھانہ روات کی حدود میں افسوسناک واقعہ پیش آیا، جہاں16 سالہ لڑکی کو ٹک ٹاک اکاؤنٹ ڈیلیٹ نہ کرنے پر غیرت کے نام پر باپ نے قتل کردیا مقدمہ پولیس مدعیت میں درج کرلیا گیا۔پولیس کے مطابق مقتولہ کے اہلِ خانہ نے ابتدا میں واقعے کو خودکشی قرار دینے کی کوشش کی، تاہم تفتیش کے دوران شواہد سے واضح ہوا کہ لڑکی کو گولی مار کر قتل کیا گیا ہے۔ابتدائی تحقیقات میں سامنے آیا ہے کہ ملزم والد نے بیٹی کو موبائل فون سے ٹک ٹاک اکاؤنٹ ختم کرنے کا کہا تھا، مگر انکار پر اس نے طیش میں آ کر بیٹی پر فائرنگ کر دی اور موقع سے فرار ہو گیا۔پولیس کا کہنا ہے کہ جائے وقوعہ سے شواہد اکٹھے کر لیے گئے ہیں اور مزید تفتیش جاری ہے۔ واقعے کا مقدمہ درج کر لیا گیا ہے، جبکہ ملزم کی گرفتاری کے لیے چھاپے مارے جا رہے ہیں۔

سوشل میڈیا کا جنون یا خاندانی غیرت؟ ایک باپ نے بیٹی کی زندگی چھین لی

ٹک ٹاک اکاؤنٹ ڈیلیٹ نہ کرنے پر سفاک باپ نے 16 سالہ لڑکی کو قتل کردیا

کراچی (این این آئی)بنگلہ دیش کے خلاف تین ٹی 20 میچوں کی سیریز کیلیے قومی ٹیم میں فاسٹ بولر شاہین شاہ آفریدی کو شامل نہ کرنے پر باسط علی بول پڑے۔سابق ٹیسٹ کرکٹر اور موجودہ تجزیہ کار باسط علی نے دورہ بنگلہ دیش کے لیے اعلان کردہ قومی ٹی 20 اسکواڈ کا پوسٹ مارٹم کر دیا اور شاہین شاہ آفریدی کو اسکواڈ کا حصہ نہ بنانے پر شدید ردعمل کا اظہار کیا ہے۔باسط علی نے کہا کہ بنگلہ دیش کے خلاف تین ٹی 20 میچوں کی سیریز کے لیے شاہین شاہ آفریدی کو شامل نہیں کیا بلکہ سلمان مرزا کو اسکواڈ کا حصہ بنایا۔ کیا شاہین شاہ پاکستانی نہیں؟ کیا اس نے اپنی ٹیم کو پی ایس ایل چیمپئن نہیں بنوایا؟ کیا ٹورنامنٹ میں خود پرفارمنس نہیں دی؟ تو پھر کیوں اس کو قومی اسکواڈ میں شامل نہیں کیا گیا اور کیوں اس کے ساتھ مسلسل زیادتی کی جا رہی ہے۔سابق کرکٹر نے کہا کہ مان لیا کہ بابر اور رضوان کے ساتھ ٹی 20 میں اسٹرائیک ریٹ کا مسئلہ ہے، لیکن شاہین شاہ کے ساتھ کیا مسئلہ ہے۔ کہا جاتا کہ رویے کا مسئلہ ہے اور جو یہ بات بولتا ہے اس کا مجھے معلوم ہے۔ کیونکہ جو بول رہے ہیں وہ سینئر کھلاڑیوں کو ٹیم میں نہیں چاہتے۔ان کا کہنا تھا کہ جس طرح ماضی میں رویے کا جواز بنا کر احمد شہزاد اور عمر اکمل کو ٹیم سے باہر کیا گیا۔ اب وہی رویہ شاہین شاہ کے ساتھ رکھا جا رہا ہے۔ میں کوچ اور کپتان کو مشورہ دوں گا کہ ایسا نہ کرو۔باسط علی نے کہا کہ ہمارے کرکٹ کے اداروں میں اتنے بڑے بڑے پروفیسرز آ گئے ہیں۔ ان کے فیصلوں پر تو ہم صرف سر پکڑتے ہیں کہ یہ کر کیا رہے ہیں۔ بنگلہ دیش ٹور کے لیے صرف دو فاسٹ بولرز شامل کیے گئے ہیں جب کہ آدھا تیتر اور آدھا بٹیر کے مترادف آل رائونڈرز پر زیادہ انحصار کیا گیا ہے۔ اللہ کرے ٹیم وہاں سے جیت کر آئیں، لیکن اگر انہوں نے تیز وکٹ بنا دی تو پھر پاکستان ٹیم کیا کرے گی۔ان کا کہنا تھا کہ کرکٹ سے بڑا کوئی نہیں، ویسٹ انڈیز کے ٹور کے بعد سب کے کھاتے کھل جائیں گے۔باسط علی نے دورہ بنگلہ دیش کے لیے دیگر کچھ کھلاڑیوں کی سلیکشن اور کچھ کو باہر کرنے پر بھی سوالات اٹھائے۔واضح رہے کہ گزشتہ روز بنگلہ دیش کیخلاف تین ٹی 20 میچوں کی سیریز کے لیے پاکستان ٹیم کا اعلان کیا گیاتھا۔ اسکواڈ میں سابق کپتان بابر اعظم، محمد رضوان، نسیم شاہ، حسن علی اور شاہین شاہ آفریدی جگہ بنانے میں ناکام رہے۔

باسط علی نے دورہ بنگلہ دیش کیلئے اعلان کردہ قومی ٹی 20 اسکواڈ کا پوسٹ مارٹم کر دیا

شاہین شاہ آفریدی کے ساتھ زیادتی کی جا رہی ہے، باسط علی

ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ ’’ریاستی سرپرستی میں ہونے والی دہشتگردی کو بھارت نے ایک پالیسی کے طور پر پاکستان کے خلاف اپنایا ہوا ہے۔الجزیرہ ٹی وی کو خصوصی انٹرویو دیتے ہوئے ڈی جی آئی ایس پی آر لیفٹیننٹ جنرل احمد شریف چوہدری کا کہنا تھا کہ بھارت کے یہ مذموم عزائم پاکستان کی سلامتی بالخصوص بلوچستان کو غیر مستحکم کرنے کی منظم سازش ہے، بھارت پاکستان میں دہشتگرد کارروائیوں کی حمایت اور مالی معاونت کر رہا ہے اور ریاستی سرپرستی میں دہشت گردی کوبھارت نے بطور پالیسی پاکستان کے خلاف اپنایا ہوا ہے۔الجزیرہ کے مطابق ڈی جی آئی ایس پی آر کا یہ ردعمل گزشتہ ماہ وزیرستان میں ہونے والے بم دھماکے کے تناظر میں سامنے آیا ہے، جس کی ذمہ داری کالعدم دہشت گرد تنظیم فتنہ الخوارج (ٹی ٹی پی) نے قبول کی تھی، دھماکے میں 16 فوجی جوان شہید جبکہ 20 سے زائد افراد زخمی ہوئے تھے۔ان واقعات کے حوالے سے پاکستان کا واضح مؤقف ہے کہ ان حملوں میں بھارت براہِ راست ملوث ہے اور پاکستان میں دہشتگردانہ کارروائیوں کی حمایت اور مالی معاونت کر رہا ہے۔لیفٹیننٹ جنرل احمد شریف چوہدری کاکہناتھا کہ خوارج کی اصطلاح ان مسلح گروہوں کے لیے استعمال کی جا رہی ہے جو ریاست اور افواج پاکستان پر حملے کرتے ہیں۔ موجودہ فتنہ الخوارج، اس گمراہ نظریے کا تسلسل ہیں جو اسلام کے نام پر مسلمانوں کا خون بہاتے ہیں۔انہوں نے وضاحت کی کہ اسلام میں جہاد یا قتال کا اختیار صرف ریاست کو حاصل ہے، اور کوئی فرد، تنظیم یا گروہ اس اختیار کا ناجائز استعمال نہیں کر سکتا۔ڈی جی آئی ایس پی آر نے ایک اور اصطلاح ’فتنہ الہندوستان‘ کا بھی حوالہ دیا، جو ان گروہوں کے لیے استعمال کی جا رہی ہے جنہیں بھارت کی سرپرستی حاصل ہے۔ ان کا کہنا تھا کہ فتنہ الہندوستان بلوچستان میں ملک کو عدم استحکام سے دوچار کرنے میں مصروف ہے۔ڈی جی آئی ایس پی آر نے نشاندہی کی کہ بھارت کی سیاسی قیادت خود متعدد مواقع پر پاکستان میں دہشتگردی کی پشت پناہی کا اعتراف کر چکی ہے، جبکہ بھارتی خفیہ نیٹ ورکس کا ماسٹر مائنڈ اجیت دوول ہے، جو ان کارروائیوں کا مرکزی منصوبہ ساز ہے۔انہوں نے یہ بھی کہا کہ امریکا، کینیڈا سمیت کئی مغربی ممالک بھارتی ریاستی دہشتگردی کا برملا اعتراف کر چکے ہیں، جو عالمی سطح پر بھارت کی پالیسیوں پر سوالیہ نشان ہے۔ایران اور اسرائیل کی حالیہ کشیدگی پر بات کرتے ہوئے، لیفٹیننٹ جنرل احمد شریف نے پاکستان کی جانب سے ایران کے لیے سیاسی اور سفارتی حمایت کے اعادے کا ذکر کیا اور کہا کہ پاکستان ہر جارحیت کو علاقائی استحکام کے لیے خطرہ تصور کرتا ہے۔جوہری پروگرام سے متعلق سوال کے جواب میں لیفٹیننٹ جنرل احمد شریف چوہدری نے واضح اور پرعزم موقف اپناتے ہوئے کہا کہ پاکستان کا ایٹمی پروگرام مکمل طور پر محفوظ ہے اور کوئی بھی ملک اسے نشانہ بنانے کی جرات نہیں کر سکتا۔  پاکستان ایک ذمہ دار اور ڈکلیئرڈ ایٹمی طاقت ہے۔ ہماری جوہری صلاحیت ناقابل تسخیر ہے اور یہ پاکستان کی دفاعی صلاحیتوں اور موجودہ علاقائی توازن پر اعتماد کی عکاسی کرتی ہے۔

بھارت کے مذموم عزائم پاکستان کو غیر مستحکم کرنے کی منظم سازش کا حصہ ہیں،ترجمان پاک فوج

بھارت نے ریاستی سرپرستی میں ہونے والی دہشت گردی کو پاکستان کے خلاف پالیسی کے طور پر اپنایا ہوا ہے، الجزیرہ کوانٹرویو

واشنگٹن(این این آئی)امریکی صدر ڈونلڈ ٹرمپ نے روس کے صدر ولادیمیر پیوٹن پر سخت تنقید کرتے ہوئے یوکرین کے لیے امریکی دفاعی ہتھیاروں کی نئی کھیپ کی منظوری دے دی ہے۔ٹرمپ نے عندیہ دیا ہے کہ وہ ماسکو کے خلاف مزید سخت اقتصادی پابندیوں پر بھی غور کر رہے ہیں۔وائٹ ہائوس میں کابینہ کے اجلاس کے دوران گفتگو کرتے ہوئے صدر ٹرمپ نے روس،یوکرین جنگ میں ہونے والے انسانی جانوں کے نقصان پر گہری تشویش کا اظہار کیا۔ان کا کہنا تھا کہ میں پیوٹن سے خوش نہیں ہوں کیونکہ روسی اور یوکرینی فوجی ہزاروں کی تعداد میں مارے جا رہے ہیں، اور روسی صدر کی جانب سے بہت خوش اخلاقی دکھائی جاتی ہے لیکن وہ صرف دکھاوے پر مبنی ہوتی ہیصدر ٹرمپ نے روس کے خلاف سینیٹ میں زیر غور ایک سخت پابندیوں کے بل کی حمایت کا اشارہ دیتے ہوئے کہا کہ میں اس بل پر سنجیدگی سے غور کر رہا ہوں۔یہ بل ریپبلکن سینیٹر لنزے گراہم (جنوبی کیرولائنا)اور ڈیموکریٹک سینیٹر رچرڈ بلومینتھل (کنیکٹی کٹ)نے پیش کیا ہے، جس کے تحت روس سے تیل، گیس، یورینیم اور دیگر مصنوعات خریدنے والے ممالک پر 500 فیصد اضافی محصولات (ٹیکس) عائد کیے جائیں گے۔

امریکی صدرٹرمپ کی پیوٹن پر سخت تنقید، روس پر مزید سخت پابندیوں کا عندیہ

پیوٹن سے خوش نہیں ہوں کیونکہ روسی اور یوکرینی فوجی ہزاروں کی تعداد میں مارے جا رہے ہیں، گفتگو

خاتون پولیس افسر کی 18 فٹ لمبے کوبرا کو پکڑنے کی ویڈیو سوشل میڈیا پر وائرل ہوگئی۔بھارتی ریاست کیرالا کے جنگلات میں اس وقت خوف اور حیرت کی لہر دوڑ گئی جب ایک مقامی چشمے کے پانی میں ایک دیوہیکل زہریلا سانپ نظر آیا۔ مقامی افراد نے فوراً محکمہ جنگلات سے رابطہ کیا، اور یوں ایک بہادر خاتون افسر کی دلیرانہ کارروائی کی ویڈیو دنیا بھر میں وائرل ہو گئی۔وائرل ہونے والی اس ویڈیو میں خاتون فاریسٹ افسر ڈاکٹر جی ایس روشنی کو ایک 18 فٹ لمبے خطرناک کنگ کوبرا کو مکمل اعتماد اور مہارت کے ساتھ قابو کرتے دیکھا جا سکتا ہے۔ واقعہ اس وقت پیش آیا جب محکمہ جنگلات کو چشمے میں ایک خطرناک سانپ کی موجودگی کی اطلاع دی گئی۔دیگر افسران کی مشاورت کے بعد ڈاکٹر روشنی کو موقع پر بھیجا گیا۔ انہوں نے جائے وقوع پر پہنچتے ہی اپنی پیشہ ورانہ تربیت اور تجربے کو بروئے کار لاتے ہوئے، ایک چھڑی کی مدد سے سانپ کو چند لمحوں میں قابو کر لیا۔مقامی افراد نے ان کی بہادری پر زور دار تالیاں بجائیں، جبکہ ویڈیو دیکھتے ہی دیکھتے سوشل میڈیا پر وائرل ہو گئی۔ صارفین نے ڈاکٹر روشنی کو ’’سپر وومن‘‘ قرار دیتے ہوئے مطالبہ کیا ہے کہ ان کی جرات کو سراہتے ہوئے خصوصی انعام دیا جائے۔

اٹھارہ فٹ کا زہریلا کوبرا اور ایک نڈر خاتون! ویڈیو نے سوشل میڈیا کو ہلا کر رکھ دیا

کیرالا کی جنگلوں میں سنسنی خیز لمحہ، فاریسٹ افسر ڈاکٹر روشنی نے تنہا سانپ کو قابو کر کے سب کو حیران کر دیا

پاک بھارت جنگ بندی میں امریکی کردار نہ ہونے کا بھارتی دعوی جھوٹا نکلا، امریکہ نے بھارتی دعوے کو جھوٹا اور گمراہ کن قرار دے دیا۔محکمہ خارجہ کی ترجمان ٹیمی بروس نے میڈیا بریفنگ میں کہا کہ بعض بیانات خود ہی اپنی حقیقت ظاہر کر دیتے ہیں، اور جدید دور میں سچ جاننے کے لیے کسی ایک تبصرے پر انحصار نہیں کیا جاتا۔ٹیمی بروس کا کہنا تھا کہ بعض آراء غلط ہوتی ہیں اور صدر ڈونلڈ ٹرمپ نے اس مسئلے کو کافی واضح کر دیا ہے۔ترجمان نے مزید بتایا کہ امریکی نائب صدر جے ڈی وینس بھی پاک بھارت مذاکرات میں شامل تھے اور ان کا کردار تسلیم کیا جانا چاہیے۔یہ بیان ایسے وقت میں سامنے آیا ہے جب بھارتی حکومت مسلسل یہ دعویٰ کر رہی ہے کہ پاکستان اور بھارت کے درمیان حالیہ جنگ بندی میں امریکا کا کوئی کردار نہیں تھا۔ یاد رہے کہ صدر ٹرمپ اس سے قبل کئی مواقع پر اس جنگ بندی میں کلیدی کردار ادا کرنے کا دعویٰ کر چکے ہیں، اور اسی وجہ سے ان کا نام نوبیل امن انعام کے لیے بھی سامنے آ چکا ہے۔

پاک بھارت جنگ بندی میںڈونلڈ ٹرمپ کا کردار نہ ہونے کا بھارتی دعویٰ جھوٹا ہے ، امریکا

نائب صدر جے ڈی وینس بھی پاک بھارت مذاکرات میں شریک تھے اورانہیں تسلیم کیا جائےگا،ٹیمی بروس

آج حج 2026 کے لئے لازمی رجسٹریشن کا آخری روز ہے۔ وزارت مذہبی امور کے مطابق اب تک ملک بھر سے دو لاکھ سے زائد شہری رجسٹریشن کا عمل مکمل کر چکے ہیں۔عازمین کو گھر بیٹھے آن لائن، اور وہ بھی بغیر کسی فیس کے، رجسٹریشن کی سہولت فراہم کی گئی ہے۔ حکام نے واضح کیا ہے کہ صرف وہ افراد جو بروقت رجسٹریشن مکمل کریں گے، حج کے لیے اہل قرار پائیں گے۔رجسٹریشن مکمل ہونے کے بعد، خواہشمند افراد کو سرکاری یا نجی حج اسکیم کا انتخاب کرنے کی اجازت دی جائے گی۔ وزارت کا کہنا ہے کہ حج کے اخراجات اور شرائط و ضوابط الگ سے جاری کیے جائیں گے، جو حج پالیسی کے تحت ہوں گے۔وزارت مذہبی امور کے مطابق یہ سارا عمل سعودی حکومت کی ہدایات کی روشنی میں انجام دیا جا رہا ہے۔ رجسٹریشن مکمل ہونے پر اعداد و شمار سعودی حکام کے ساتھ شیئر کیے جائیں گے تاکہ پاکستان کے لیے حج کوٹہ کا تعین کیا جا سکے۔

حج 2026 کیلئے رجسٹریشن کا آج آخری روز، دو لاکھ سے زائد عازمین نے اندراج کرا لیا

وزارت مذہبی امور کے مطابق آن لائن رجسٹریشن بغیر کسی فیس کے ممکن، صرف رجسٹرڈ افراد ہی حج کے اہل ہوں گے

بانی پی ٹی آئی عمران خان نے کہاہے کہ وہ احتجاجی تحریک کی قیادت خود کریں گے،میں جیل میں آزاد ہوں جبکہ باہر سب قید ہیں، آپ لوگوں کو اپنے لیے نکلنا ہے، رول آف لاء اور جمہوریت کیلئے نکلنا ہے اور 26 ویں ترمیم کے خلاف نکلنا ہے، جو تحریک کا وزن نہیں اٹھا سکتا وہ ابھی سے الگ ہو جائے۔ بانی پی ٹی آئی کی بہن علیمہ خان نےاپنی بہنوں کے ہمراہ عمران خان سے ملاقات کرنے کے بعد یہ بات اڈیالہ جیل کے باہر میڈیا سے گفتگو کرتے ہوئے کی۔علیمہ خان نے میڈیا سے گفتگو کرتے ہوئے کہا کہ عمران خان نے عوام کے لیے پیغام دیا ہےکہ سارے دروازے بند ہو گئے، اب صرف تحریک ہی راستہ ہے، جبکہ عمران خان کے بچے بھی پاکستان آکر تحریک میں حصہ لیں گے۔ایک سوال کے جواب میں انہوں نے کہا کہ پی ٹی آئی کی لیڈرشپ تحریک کی تاریخ دے گی، عمران خان نے صرف یہ ہدایت دی ہے کہ تحریک کا عروج 5 اگست کو ہوگا۔علیمہ خان نے کہا کہ عمران خان کے بیٹوں سلیمان اور قاسم نے کہا ہے کہ وہ پاکستان آئیں گے اور تحریک کا حصہ بنیں گے، پہلے وہ امریکا جارہے ہیں وہاں وہ انسانی حقوق کے اداروں کو بتائیں گے کہ ان کے والد کے ساتھ کیا ظلم ہو رہا ہے۔علیمہ خان نے کہا کہ بہنوں کی عمران خان سے الحمدللہ ملاقات ہوگئی، بانی پی ٹی آئی خیریت سے ہیں، بانی کے ساتھ وہ کچھ ہورہا ہے جو کسی قیدی کے ساتھ نہیں ہوتا، یہ ظلم کی انتہا ہے، ان کا ٹی وی اخبار ایک ہفتے سے بند کیا ہوا ہے، بانی کے پاس پڑھنے لکھنے کے لیے کچھ نہیں، بانی سے مل کر خوشی ہوتی ہے وہ ٹھیک ہیں۔انہوں نے کہا کہ بانی جیل میں بہترین کتاب لکھ سکتے لیکن ان کے پاس کچھ لکھنے کے لیے قلم کاغذ ہو تو لکھیں۔ علیمہ خان نے کہا کہ عمران خان جیل سے احتجاج کو لیڈ کریں گے، عمران خان نے کہا ہے وہ جیل میں آزاد ہیں اور ہم لوگ جو باہر ہیں وہ قید ہیں علیمہ خان  نے کہا کہ 5 اگست کو بانی پی ٹی آئی کو جیل میں دو سال مکمل ہو جائیں گے اور اسی دن تحریک اپنے عروج پر پہنچے گی۔علیمہ خان نے کہا کہ عمران خان نے پارٹی کو تحریک کے لیے مکمل پلان دے دیا ہے، وقت آنے پر عوام کو آگاہ کر دیا جائے گا، بانی پی ٹی آئی کے بیٹے سلیمان اور قاسم امریکا سے واپسی کے بعد تحریک کا حصہ بنیں گے اور پوری فیملی اس تحریک میں شامل ہوگی۔

میں جیل میں آزاد ہوں اور باہر موجود لوگ قید میں ہیں،عمران خان

بانی نے کہا ہے کہ سارے دروازے بند ہو گئے، اب صرف تحریک ہی راستہ ہے،علیمہ خان میڈیا سے گفتگو

کراچی کے علاقے ڈیفنس میں فلیٹ سے معروف اداکارہ و ماڈل حمیرا اصغر کی کئی روز پرانی لاش ملنے کے معاملے میں اہم پیشرفت ہوئی ہے۔پولیس کا کہنا ہے کہ خاتون کی شناخت حمیرا اصغر علی کے نام سے ہوئی ہے جو ماڈل اور اداکارہ تھیں۔پولیس کا کہنا ہے کہ اداکارہ 2018 سے فلیٹ میں کرائے پر اکیلی رہ رہی تھیں اور 2024 سے کرایہ ادا نہیں کیا تھا۔جس پر فلیٹ کے مالک نے خاتون کے خلاف کیس کیا ہوا تھا اور گزشتہ روزپولیس عدالتی حکم پر فلیٹ خالی کروانے پہنچی تھی، فلیٹ کا دروازہ نہ کھلنے پر دروازہ توڑا گیا تو خاتون کی لاش زمین پر پڑی تھی، فلیٹ سے شواہد اکٹھا کیے گئے۔ ابتدائی تحقیق میں موت کی وجہ کا تعین نہیں ہو سکا۔لاش کو قانونی کارروائی کے لیے جناح اسپتال منتقل کر دیا گیا۔ تاحال کوئی ورثا سامنے نہیں آئے۔پولیس کا کہنا ہے کہ واقعے کی تحقیقات جاری ہیں۔پولیس سرجن ڈاکٹر سمیعہ کے مطابق خاتون کی اسپتال لائی جانے والی لاش مسخ شدہ ہے، لاش سے نمونے اکٹھے کرلیے گئے ہیں، خاتون کی موت کی اصل وجہ پوسٹ مارٹم رپورٹ آنے بعد سامنے آئے گی۔اس حوالے سے علاقہ مکینوں نے بتایا کہ حمیرا اصغر علی ماڈلنگ کے ساتھ ساتھ اداکاری بھی کرتی تھیں اور اس فلیٹ میں کرائے پر رہتی تھیں۔وہ فٹنس ٹرینر بھی تھیں اور کئی مارننگ شوز میں ٹپس دیتی تھیں۔ ایک رئیلیٹی شو میں بھی کام کیا اور چند چھوٹے کردار بھی ادا کیے تھے۔اداکارہ حمیرا اصغر کے پڑوسی نےنجی ٹی وی سے گفتگو کرتے ہوئے بتایا کہ مالک مکان نے بتایا کہ حمیرا اصغر کرائے کی ادائیگی میں تاخیر کر رہی تھیں۔پڑوسی کا کہنا ہے کہ آج پولیس نے ان کے فلیٹ کا دروازہ توڑ کر لاش برآمد کی، حمیرا اصغر کا بلڈنگ کے دیگر افراد سے زیادہ ملنا جلنا نہیں تھا، ان کے پاس کوئی گاڑی بھی نہیں تھی۔یاد رہے کہ گزشتہ ماہ کراچی کے علاقے گلشن اقبال کے بلاک 7 میں فلیٹ سے ٹی وی کی سینئر اداکارہ عائشہ خان کی 7 دن پرانی لاش ملی تھی۔

کراچی ڈیفنس میں فلیٹ سے اداکارہ حمیرا اصغر کی کئی روز پرانی لاش برآمد

اداکارہ حمیرا اصغر فلیٹ میں 7 سال سے رہائش پذیر تھیں اور گھر میں اکیلی رہتی تھیں،پولیس حکام

وزیراعظم شہباز شریف نے قطری کوہ پیما اور شاہی خاندان کی رکن شیخہ اسماء الثانی کو پاکستان کے پہاڑوں اور سیاحت کی سفیر مقرر کر دیا۔سوشل میڈیا پلیٹ فارم ایکس پر وزیراعظم نے شیخہ اسماء کو اس کامیابی پر مبارکباد دی، انہوں نے لکھاکے مجھے خوشی ہے کہ میں شیخہ اسما ءکو ان کی بلند خدمات کے اعتراف میں پاکستان کے پہاڑوں اور سیاحت کی سفیر مقرر کر رہا ہوں، نانگا پربت سر کرنے پر میری دلی مبارکباد۔ یہ واقعی قابلِ ستائش اور متاثر کن کارنامہ ہے۔وزیراعظم نے کہا کہ شہزادی شیخہ اسماء الثانی کی یہ کامیابی ہمت، عزم اور حوصلے کا پیغام دیتی ہے اور پاکستان اور قطر کے درمیان مضبوط دوستی کی خوبصورت مثال بھی ہے۔یاد رہے کہ قطری شہزادی شیخہ اسماء نے حال ہی میں پاکستان کی پہاڑی چوٹی نانگا پربت سر کی ہے جس کے بعد وہ نانگا پربت سر کرنے والی پہلی قطری خاتون بن گئی ہیں۔شیخہ اسماء نے شدید سردی، تیز ہواؤں اور خطرناک راستوں کے باوجود 8 ہزار 126 میٹر بلند نانگا پربت کی چوٹی پر پہنچ کر قطر کا قومی پرچم لہرا یا۔نانگا پربت کو اس کی ہلاکت خیز چڑھائیوں اور جان لیوا برفانی تودوں کی وجہ سے دنیا بھر میں قاتل پہاڑ کے نام سے جانا جاتا ہے۔یہ کامیابی دنیا کی 14 بلند ترین چوٹیوں کو سر کرنے کے شیخہ اسماء کے مشن کا نواں مرحلہ ہے، ان کا مقصد صرف ذاتی کامیابی نہیں بلکہ دنیا بھر کی خواتین کو بااختیار بنانا اور حوصلہ دینا ہے۔شیخہ اسماء کے مطابق ہر چوٹی ایک ایسی عورت کی نمائندگی کرتی ہے جو ناممکن کو ممکن بنانے کا خواب دیکھتی ہے۔اس حوالے سے انسٹاگرام پر ایک پوسٹ میں شیخہ اسما نے چوٹی تک پہنچنے کے دوران پیش آنے والی مشکلات اور اس سفر کے جذباتی اثرات کو بیان کیا۔انہوں نے لکھا یہ میری نویں آٹھ ہزار میٹر سے بلند چوٹی اور اب تک کی سب سے مشکل چڑھائیوں میں سے ایک ہے، اس پہاڑ نے مجھے ایسے امتحان میں ڈالا جس کی مجھے توقع نہیں تھی، میرے قدموں کے نیچے کالا برفانی تودہ تھا اور ہر چند سیکنڈ بعد پتھر گرنے لگتے تھے، اس دوران زندگی کی نازکی کا مسلسل احساس ہوتا رہا۔کوہ پیمائی کے ماہرین نے شیخہ اسماء کے عزم، نظم و ضبط اور ذہنی طاقت کی تعریف کی ہے، نانگا پربت جیسی جان لیوا اور غیر یقینی حالات والی چوٹی کو سر کرنا ایک غیر معمولی کارنامہ ہے۔

نانگا پربت سر کرنے والی قطری شہزادی پاکستان کے پہاڑوں اور سیاحت کی سفیر مقرر

وزیراعظم نے قطری کوہ پیما اور شاہی خاندان کی رکن شیخہ اسماء الثانی کو پاکستان کے پہاڑوں اور سیاحت کی سفیر مقرر کر دیا

عالمی فوجداری عدالت نے افغانستان میں خواتین پر مظالم کے الزام میں طالبان کے سینئر رہنماؤں سپریم لیڈرہیبت اللہ اخوندزادہ اور چیف جسٹس عبدالحکیم حقانی کے وارنٹ گرفتاری جاری کر دیئے۔غیرملکی میڈیا کی رپورٹ کے مطابق بین الاقوامی فوجداری عدالت کے ججوں نے اپنے بیان میں کہا کہ ایسے معقول شواہد موجود ہیں جن کی بنیاد پر شبہ ہے کہ سپریم لیڈر ہیبت اللہ اخوندزادہ اور چیف جسٹس عبدالحکیم حقانی نے صنف کی بنیاد پر انسانیت کے خلاف جرم یعنی ظلم و ستم کا ارتکاب کیا ہے۔عدالت نے کہا کہ اگرچہ طالبان نے پوری آبادی پر کچھ قوانین اور پابندیاں عائد کیں لیکن انہوں نے خاص طور پر لڑکیوں اور خواتین کو ان کی جنس کی بنیاد پر نشانہ بنایا اور انہیں بنیادی حقوق اور آزادیوں سے محروم کیا۔بین الاقوامی فوجداری عدالت کے مطابق یہ مبینہ جرائم 15 اگست 2021 کو طالبان کے اقتدار سنبھالنے کے بعد سے شروع ہوئے اور کم از کم 20 جنوری 2025 تک جاری رہے۔عالمی عدالت کے ججوں نے کہا کہ طالبان نے لڑکیوں اور خواتین کو تعلیم، نجی زندگی اور خاندانی زندگی کے حقوق اور نقل و حرکت، اظہار رائے، سوچ، ضمیر اور مذہب کی آزادیوں سے سختی سے محروم کیا، اس کے علاوہ دیگر افراد کو بھی نشانہ بنایا گیا کیونکہ بعض جنسی رجحانات یا صنفی شناخت کے اظہار کو طالبان کی صنفی پالیسی کے منافی سمجھا گیا۔واضح رہے کہ جس کسی کے خلاف عالمی فوجداری نے وارنٹ گرفتاری جاری کیے ہو وہ کسی رکن ملک کا سفر نہیں کرسکتا کیونکہ وہاں اس کی گرفتاری کا خطرہ ہوتا ہے۔دوسری جانب  عالمی فوجداری عدالت کے طالبان رہنماؤں کے گرفتاری وارنٹ پرافغانستان کی حکومت اور طالبان ترجمان ذبیح اللّٰہ مجاہد نے اپنے ردعمل کا اظہار کیا ہےذبیح اللہ مجاہد نے عالمی فوجداری عدالت کے طالبان رہنماؤں کے گرفتاری وارنٹ پر رد عمل دیتے ہوئے کہا کہ ایسے احمقانہ اعلانات شرعی قوانین سے ہماری مضبوط وابستگی اورعزم پر اثرانداز نہیں ہوں گے۔انہوں نے گرفتاری وارنٹ کو مسترد کرتے ہوئے کہا کہ طالبان حکومت اس عدالت کو تسلیم نہیں کرتی۔

عالمی فوجداری عدالت نے طالبان کے سینئررہنماؤں کے وارنٹ گرفتاری جاری کردیے

وارنٹ گرفتاری مسترد، ایسے احمقانہ اعلانات شرعی قوانین سے ہماری وابستگی اورعزم پر اثرانداز نہیں ہونگے،ترجمان طالبان

پشاور (این این آئی)پشاور ہائیکورٹ نے خیبرپختونخوا اسمبلی میں خواتین اور اقلیتوں کی مخصوص نشستوں کی تقسیم سے متعلق الیکشن کمیشن کا اعلامیہ کالعدم قرار دیدیا۔مسلم لیگ (ن) کی جانب سے مخصوص نشستوں سے متعلق دائر درخواست پر پشاور ہائی کورٹ نے 2 صفحے پر مشتمل محفوظ فیصلہ جاری کر دیا۔فیصلے میں کہا گیا ہے کہ الیکشن کمیشن اقلیت اور خواتین سے متعلق دوبارہ سیٹوں کی ایلوکیشن کریں، الیکشن کمیشن 10 دن کے اندر تمام امیدواروں اور سیاسی جماعتوں کو سنے۔فیصلے میں کہا گیا کہ الیکشن کمیشن کے فیصلے تک مخصوص نشستوں پر حلف نہ لیا جائے۔واضح رہے کہ 2 جولائی کو الیکشن کمیشن آف پاکستان نے معطل شدہ 77 میں سے 74 ارکان کو بحال کر دیا تھا، جن میں 19 قومی اسمبلی، 27 پنجاب اسمبلی، 25 خیبر پختونخوا اسمبلی اور 3 سندھ اسمبلی کے ارکان شامل تھے۔خیبرپختونخوا اسمبلی میں مخصوص نشستوں پر 21 خواتین اور 4 اقلیتی امیدواروں کا اعلامیہ جاری کر دیا گیا تھا،جس کے بعد اپوزیشن کی تعداد 52 ہوگئی۔جمعیت علمائے اسلام (ف) 19 نشستوں کے ساتھ خیبرپختونخوا اسمبلی میں اپوزیشن کی سب سے بڑی جماعت بن گئی تھی، جے یو آئی (ف) کی 8 خواتین اور 2 اقلیتی نشستیں بحال ہوئی تھیں۔دوسری جانب، مسلم لیگ (ن) کی صوبائی اسمبلی میں 6 خواتین اور ایک اقلیتی نشست بحال ہونے کے بعد ایوان میں تعداد 16 ہوگئی تھی۔4 جولائی کو مسلم لیگ (ن) نے خیبر پختونخوا اسمبلی کی مخصوص نشستوں کی تقسیم کو پشاور ہائی کورٹ میں چیلنج کر دیا تھا۔علاوہ ازیں پاکستان پیپلزپارٹی کی 5 خواتین اور ایک اقلیتی نشست بحال ہونے کے بعد تعداد 11 ہوگئی تھی جبکہ عوامی نیشنل پارٹی (اے این پی) اور پاکستان تحریک انصاف پارلیمنٹیرین (پی ٹی آئی پی) کی ایک، ایک خواتین کی مخصوص نشست بحال ہوئی تھی۔یاد رہے کہ مارچ 2024 میں ای سی پی نے خواتین اور اقلیتوں کی مخصوص نشستوں کی الاٹمنٹ کا نوٹی فکیشن جاری کیا تھا، ان نشستوں پر پی ٹی آئی کی حمایت یافتہ سنی اتحاد کونسل (ایس آئی سی) نے دعویٰ کیا تھا لیکن الیکشن کمیشن نے ایس آئی سی کی اس بنیاد پر دائر درخواست مسترد کر دی تھی کہ انہوں نے پی ٹی آئی سے مخصوص نشستوں کے لیے ’انضمام‘ کیا ہے۔ای سی پی سے درخواست کی گئی تھی کہ پی ٹی آئی کے حمایت یافتہ امیدواروں کو پارٹی میں شامل کر کے مخصوص نشستیں دی جائیں، لیکن کمیشن نے یہ نشستیں دیگر سیاسی جماعتوں میں تقسیم کردی تھیں۔ای سی پی کا 77 میں سے 74 ارکان کو بحال کرنے کا فیصلہ سپریم کورٹ کے ایک اہم فیصلے کے بعد آیا تھا، جو 10 رکنی آئینی بینچ نے 3-7 کی اکثریتی رائے سے دیا تھا۔

پشاور ہائیکورٹ،خیبرپختونخوا اسمبلی میں مخصوص نشستوں کی تقسیم کا الیکشن کمیشن کا اعلامیہ کالعدم قرار

پشاور ہائیکورٹ نے دوبارہ سیٹوں کی تقسیم تک مخصوص نشستوں پر حلف برداری سے بھی روک دیا

اسلام آباد (این این آئی)ایف آئی اے نے اسلام آباد کی مقامی عدالت کی جانب سے 27 پاکستانی یوٹیوب چینلز بند کرنے کے احکامات کے بعد میڈیا پر چلنے پر خبروں پر وضاحت کرتے ہوئے کہا ہے کہ عدالت میں درخواست نیشنل سائبر کرائم انوسٹی گیشن ایجنسی (این سی سی آئی اے) نے دی ہے۔ترجمان ایف آئی اے کی جانب سے جاری وضاحتی بیان میں کہا گیا ہے کہ نیشنل سائبر کرائم انوسٹیگیشن ایجنسی باقاعدہ طور پر فعال ہو چکی ہے۔انہوں نے کہا کہ سائبر کرائم سے متعلق جرائم کی تفتیش اور قانونی کارروائی اب ایف آئی اے نہیں نیشنل سائبر کرائم انوسٹیگیشن ایجنسی کے دائرہ اختیار میں ہے۔ترجمان نے بتایا کہ ایف آئی اے میڈیا میں گردش کرنے والی خبر کی سختی سے تردید کرتا ہے، جس میں دعویٰ کیا گیا ہے کہ جوڈیشل مجسٹریٹ کی عدالت نے ایف آئی اے کو 27 پاکستانی یوٹیوب چینلز بند کرنے کا حکم دیا ہے، در حقیقت عدالت نے یہ احکامات نیشنل سائبر کرائم انوسٹیگیشن ایجنسی کی درخواست پر جاری کیے ہیں۔انہوں نے کہا کہ عدالتی احکامات پر کسی بھی جگہ ایف آئی اے کا ذکر نہیں کیا گیا، یہ وضاحت ضروری ہے کہ ایف آئی اے اور این سی سی آئی اے دو الگ اور خود مختار ادارے ہیں، سائبر کرائم کی تحقیقات اور قانونی کارروائی کا اختیار ایف آئی اے کے دائرہ اختیار میں شامل نہیں ہے۔ترجمان نے بتایا کہ عوام اور میڈیا نمائندگان کو تاکید کی جاتی ہے کہ وہ غیر مصدقہ خبروں کو نشر کرنے سے گریز کریں اور کسی بھی خبر کو نشر کرنے سے پہلے اس کی تصدیق متعلقہ سرکاری اداروں سے لازمی کریں۔

عدالت میں27 یوٹیوب چینلز بند کرنے کی درخواست این سی سی آئی اے نے دی، ایف آئی اے

میڈیا نمائندگان غیر مصدقہ خبریں نشر کرنے سے پہلے اس کی تصدیق متعلقہ سرکاری اداروں سے لازمی کریں، ترجمان

اسلام آباد کی مقامی عدالت نے ریاست مخالف مواد پھیلانے کے الزام میں 27 معروف یوٹیوب چینلز کو بند کرنے کا حکم جاری کر دیا۔جوڈیشل مجسٹریٹ عباس شاہ نے یوٹیوب چینل بلاک سے متعلق وفاقی تحقیقاتی ادارے (ایف آئی اے) کی درخواست پر سماعت کی۔ایف آئی اے نے عدالت کو بتایا کہ ان چینلز کے خلاف 2 جون سے باضابطہ انکوائری جاری ہے جس میں ریاستی اداروں کے خلاف منظم مہم کے شواہد ملے ہیں۔سماعت کے دوران ایف آئی اے کے نمائندے اور دیگر متعلقہ حکام عدالت میں پیش ہوئے اور دستیاب شواہد پر روشنی ڈالی۔ عدالت نے دلائل سننے کے بعد یوٹیوب کے مقامی انچارج کو ہدایت کی کہ ان 27 یوٹیوب چینلز کو فوری طور پر بلاک کیا جائے۔عدالتی حکم نامے میں کہا گیا کہ ایف آئی اے کی فراہم کردہ رپورٹ اور شواہد اطمینان بخش ہیں اور قانون کے مطابق کارروائی عمل میں لائی جا سکتی ہے۔عدالت کی جانب سے بلاک کیے جانے والوں یوٹیوب چینلز میں حیدر مہدی، صدیق جان، صبیح کاظمی، اوریا مقبول جان ،آرزو کاظمی، راعنا عزیر سپیکس بھی بلاک لسٹ میں شامل کی گئی ہیں۔اس کے علاوہ ساجد گوندل، حبیب اکرم، مطیع اللہ جان (ایم جے ٹی وی ) عمران خان ریاض، نیا پاکستان، صابر شاکر ،عمران خان، آفتاب اقبال انٹرٹینمنٹ ٹی وی  کے یو ٹیوب چینلز کو بھی بلاک کیا جائے۔ڈیلی قدرت، عبدالقادر، چار سدہ جرنلسٹ، نائلہ پاکستانی ری ایکشن، وجاہت سعید خان یوٹیوب، احمد نورانی، نظر چوہان یوٹیوب، معید پیرزادہ اور مخدوم شہاب الدین کے چینلز بھی فہرست کا حصہ ہیں۔

ریاست مخالف مواد کا الزام، عدالت کا 27 یوٹیوب چینلز فوری بند کرنے کا حکم

یوٹیوب چینلز میں حیدر مہدی، صدیق جان، صبیح کاظمی، اوریا مقبول جان،عمران خان ریاض، نیا پاکستان، صابر شاکر شامل ہیں

کراچی کے علاقے انچولی میں معروف سماجی تنظیم ”جے ڈی سی“ کے سربراہ ظفر عباس کی ملکیت میں رجسٹرڈ ویگو گاڑی کی موٹرسائیکل کو ٹکر مارنے کا واقعے میں نئی پیشرفت سامنے آئی ہے۔ حادثے کی سی سی ٹی وی فوٹیج منظر عام پر آ چکی ہے، جس نے ظفر عباس کے ابتدائی مؤقف کو غلط ثابت کر دیا۔نجی ٹی وی آج نیوزکے مطابق فوٹیج میں صاف دیکھا جا سکتا ہے کہ ویگو گاڑی رانگ وے پر آ رہی تھی، جبکہ ڈرائیور دوسری سڑک کی جانب جانے کی کوشش کر رہا تھا۔ اسی دوران سامنے سے آتی موٹر سائیکل سے ٹکر ہو گئی، جس پر سوار دو نوجوان زمین پر گر کر شدید زخمی ہو گئے۔ حادثے میں زخمی ہونے والوں کی شناخت 19 سالہ ابراہیم اور 17 سالہ عبدالاحد کے نام سے ہوئی ہے، جو اس وقت ایک نجی اسپتال میں زیرِ علاج ہیں۔واقعے کے فوراً بعد ظفر عباس اپنی ٹیم کے ہمراہ جائے حادثہ پر پہنچے، تاہم عینی شاہدین نے دعویٰ کیا کہ ان کی ٹیم نے موقع پر موجود کچھ افراد سے موبائل فون چھین لیے، جو حادثے کی ویڈیو ریکارڈ کر رہے تھے۔ پولیس نے بھی موقع پر پہنچ کر کارروائی کی اور گاڑی کے ڈرائیور کو حراست میں لے لیا۔ گاڑی ظفر عباس کے نام پر رجسٹرڈ ہے، اور ڈرائیور کی شناخت عرب رضا کے نام سے ہوئی ہے۔ظفر عباس نے ابتدائی طور پر یہ موقف اختیار کیا تھا کہ موٹر سائیکل سوار نوجوان بغیر ہیڈلائٹ کے سفر کر رہے تھے، لیکن فوٹیج سے واضح ہوا کہ موٹرسائیکل کی ہیڈلائٹ روشن تھی، جو ان کے بیان کو غلط ثابت کرتی ہے۔پولیس کا کہنا ہے کہ دونوں زخمیوں کے اہل خانہ کی جانب سے کسی قسم کی ایف آئی آر درج نہیں کرائی گئی۔ تاہم، ضابطے کے تحت بیانات قلمبند کر لیے گئے ہیں۔ ذرائع کے مطابق، فریقین کے درمیان باہمی رضامندی سے معاملہ طے پا گیا ہے۔واضح رہے گزشتہ روزسمن آباد تھانے کے علاقے شارع پاکستان انچولی کے قریب تیز رفتار سیاہ ریوو رجسٹریشن نمبرایل ایچ 0110 نے موٹر سائیکل سواروں کو ٹکرماری اور موقع  سے فرار ہوگئی۔حادثے کے باعث ویگو کی نمبر پلیٹ گر گئی جسے موقع پر موجود شہریوں نے اٹھالیا، حادثے کے نتیجے میں موٹر سائیکل پر سوار 2 نوجوان شدید زخمی ہوگئے جنہیں پہلے شارع فیصل پر واقعے نجی اسپتال اور بعدازاں اسٹیڈیم روڈ پرواقع نجی اسپتال منتقل کردیا گیا۔زخمی نوجوانوں کی شناخت عبدالاحد ولد محمد حنیف اور حنیف ولد ابراہیم کے ناموں سے کی گئی، زخمی نوجوانوں کی عمریں 18 سے19 سال کے درمیان ہیں، حادثے میں شدید زخمی ہونے والے نوجوان عبدالاحد کی حالت تشویشناک بتائی جا رہی ہے۔حادثے میں زخمی ہونے والے دونوں نوجوان آپس میں کزن اورعزیز آباد محمدی کالونی کے رہائشی ہیں۔

ظفر عباس کی ویگو سے حادثہ،سی سی ٹی وی فوٹیج نے بیانیہ غلط ثابت کردیا

جے ڈی سی کے سربراہ ظفر عباس کی ملکیت میں رجسٹرڈ ویگو گاڑی کی موٹرسائیکل کو ٹکر مارنے کا واقعے میں نئی پیشرفت سامنے آگئی

امریکی صدر ڈونلڈ ٹرمپ نے اسرائیلی وزیر اعظم بینجمن نیتن یاہو کے ساتھ وائٹ ہاؤس میں ہونے والی غیر رسمی عشائیہ ملاقات میں کہا ہےکہ ایران کے ساتھ مذاکرات کا وقت طے ہو گیا ہے،انہوں نے کہا کہ ہم ایران کو پرامن انداز میں ترقی کا موقع دینا چاہتے ہیں، اور مناسب وقت پر پابندیاں ہٹانے کا فیصلہ بھی کیا جائے گا۔ڈونلڈ ٹرمپ کاکہناتھا کہ حماس غزہ میں جنگ بندی کرنا چاہتی ہے۔رپورٹس کے مطابق امریکی صدر ٹرمپ سے اسرائیلی وزیراعظم نیتن یاہو نے وائٹ ہائوس میں عشائیے پر ملاقات کی۔دو ریاستی حل کے سوال پر ڈونلڈ ٹرمپ نے کہا کہ وہ اس بارے میں نہیں جانتے، نیتن یاہو سے پوچھیں۔فلسطینی شہریوں کی دوسرے ممالک منتقلی کے سوال پر ڈونلڈ ٹرمپ نے کہا  کہ اسرائیل کے پڑوسی ممالک سے بہت اچھا تعاون ملا ہے۔ڈونلڈ ٹرمپ نے ایک بار پھر پاکستان اور بھارت سمیت دنیا میں کئی جنگیں روکنے کا ذکر کیا۔انہوں نے کہا کہ ایران کے ساتھ مذاکرات کا شیڈول بنایا ہے، امید ہے اسرائیل ایران جنگ ختم ہوگئی ہے، ایران پر ایک اور حملے کی ضرورت نہیں پڑے گی۔ان کا مزید کہنا تھا کہ ایران کے ساتھ مذاکرات کا شیڈول بنایا ہے، درست وقت پر ایران سے پابندیاں ہٹائیں گے۔صدر ٹرمپ نے مزید کہا کہ ایران کی ایٹمی تنصیبات کو مکمل طور پر ناکارہ بنایا گیا ہے، تاہم امریکہ سفارتی حل کو ترجیح دے رہا ہے۔ اس موقع پر اسرائیلی وزیراعظم نیتن یاہو نے کہا کہ امریکا کے ساتھ ایسے ممالک کی تلاش پر کام کر رہے ہیں جو فلسطینیوں کو بہتر مستقبل دے سکیں۔امریکی صدر نے یوکرین کو مزید ہتھیار بھیجنے کا بھی اعلان کرتے ہوئے ڈونلڈ ٹرمپ نے کہا کہ بھارت کے ساتھ تجارتی معاہدہ کرنے کے قریب ہیں۔اس موقع پر اسرائیلی وزیرِ اعظم نیتن یاہو نے کہا کہ انہوں نے نوبیل انعام کمیٹی کو ایک خط بھیجا ہے جس میں انہوں نے صدر ڈونلڈ ٹرمپ کو نوبیل امن انعام کے لیے نامزد کرنے کی سفارش کی ہے۔واضح رہے کہ گزشتہ دنوں پاک بھارت بحران میں صدر ٹرمپ کے فیصلہ کن سفارتی مداخلت کے اعتراف میں حکومت پاکستان نے صدر ٹرمپ کو نوبیل امن انعام 2026 کے لیے نامزد کرنے کی سفارش کا فیصلہ کیا تھا۔

ایران سے مذاکرات طے کرلیے، مناسب وقت پر پابندیاں ہٹانے کااعلان کروں گا، ٹرمپ

حماس غزہ میں جنگ بندی کرنا چاہتی ہے،پاک بھارت جنگ روک کر تباہی کو پھیلنے سے روکا،امریکی صدر کی گفتگو

دورہ بنگلا دیش کے لیے پاکستان کے پندرہ رکنی اسکواڈ کا اعلان کردیا گیا۔سلمان علی آغا کو بنگلہ دیش کے خلاف ٹی ٹوئنٹی سیریز میں کپتان برقرار رکھا گیا ہے۔سیریز کے تینوں میچز 20، 22 اور 24 جولائی کو ڈھاکا میں کھیلے جائیں گے، اسکواڈ میں نوجوان اور تجربہ کار کھلاڑیوں کا امتزاج شامل کیا گیا ہے۔پاکستان کرکٹ بورڈ (پی سی بی) کے چیف آپریٹنگ آفیسر سمیر احمد سید اور چیئرمین کے مشیر عامر میر نے پریس کانفرنس کے دوران اسکواڈ کی تفصیلات پیش کیں، جبکہ سلمان علی آغا کو ٹیم کی قیادت برقرار رکھی گئی ہے۔اعلان کردہ اسکواڈ میں شامل کھلاڑیوں میں ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، عباس آفریدی، محمد حارث، محمد نواز، صاحبزادہ فرحان، صائم ایوب، سلمان مرزا اور صفیان مقیم شامل ہیں۔اس بار اسکواڈ میں چند اہم کھلاڑیوں کو آرام دیا گیا ہے یا وہ دستیاب نہیں ہیں۔ بابر اعظم، محمد رضوان، شاہین شاہ آفریدی اور نسیم شاہ کو سیریز کے لیے منتخب نہیں کیا گیا، جبکہ شاداب خان اور حارث رؤف انجری کے باعث ٹیم سے باہر ہیں۔ حسن علی کو بھی اس سیریز کے لیے اسکواڈ کا حصہ نہیں بنایا گیا۔دورہ بنگلا دیش اور ویسٹ انڈیز کے لیے پاکستان کرکٹ اسکواڈ کا تربیتی کیمپ بدھ سے شروع ہوگا،پاکستان اور بنگلہ دیش کے مابین یہ سیریز 20 سے 24 جولائی کے دوران ڈھاکا کے شیرِ بنگلہ نیشنل اسٹیڈیم میں کھیلی جائے گی۔

پاکستان نے بنگلادیش کیخلاف ٹی20سیریز کیلئے 15رکنی اسکواڈ کااعلان کردیا

پاکستان اور بنگلہ دیش کے درمیان سیریز 20 سے 24 جولائی تک ڈھاکا کے شیرِ بنگلہ نیشنل اسٹیڈیم میں کھیلی جائے گی

بانی پی ٹی آئی عمران خان اور بشریٰ بی بی نے 190 ملین پاؤنڈ کیس کی جلد سماعت کیلئے اسلام آباد ہائیکورٹ میں درخواستیں دائر کر دیں۔تفصیلات کے مطابق 190 ملین پاؤنڈ کے ریفرنس میں اہم پیش رفت سامنے آئی ہے۔ پاکستان تحریکِ انصاف کے بانی عمران خان اور ان کی اہلیہ بشریٰ بی بی نے اسلام آباد ہائیکورٹ میں سزا معطلی کی درخواستوں پر جلد سماعت کی استدعا کر دی ہے۔درخواستیں بیرسٹر سلمان صفدر کے توسط سے عدالت میں جمع کرائی گئیں، جن میں مؤقف اختیار کیا گیا ہے کہ سزا 17 جنوری کو سنائی گئی تھی جبکہ 27 جنوری کو اپیل دائر کی گئی۔ سزا معطلی کی درخواست پر پہلی بار سماعت 15 مئی کو ہوئی۔درخواست گزاروں کا کہنا ہے کہ نیب جان بوجھ کر کیس کو طول دینے کی کوشش کر رہا ہے اور ہر بار سماعت ملتوی کروانے کی درخواست کرتا رہا ہے۔ گزشتہ پیشی پر عدالت سے استدعا کی گئی تھی کہ کیس جلد مقرر کیا جائے، لیکن یقین دہانی کے باوجود معاملہ تاحال زیر التوا ہے۔درخواست میں عدالت سے گزارش کی گئی ہے کہ عمران خان اور بشریٰ بی بی کی سزا معطلی کی دونوں درخواستوں کو جلد سماعت کے لیے مقرر کیا جائے۔

عمران خان اور بشریٰ بی بی کی سزا معطلی کیس میں اہم  پیش رفت

عمران خان اوربشریٰ بی بی نے190ملین پائونڈ کیس میں جلد سماعت کیلئے درخواستیں دائر کردیں

The announcement comes with a surprise twist: left-arm spinner Sufiyan Muqeem may earn his maiden recall for the series starting in Dhaka on 20 July .

Pakistan to unveil T20 squad for Bangladesh series, with left-arm spinner as surprise pick

The Pakistan Cricket Board (PCB) is expected to confirm its 16-man squad later this week for the upcoming three-match T20I tour of Bangladesh. The announcement comes with a surprise twist: left-arm spinner Sufiyan Muqeem may earn his maiden recall for the series starting in Dhaka on 20 July .

<a href="https://a-sports.tv/pakistan-squad-for-bangladesh-t20i-surprise-inclusion">Sources suggest</a> no changes among Pakistan&rsquo;s core lineup, aside from the inclusion of Sufiyan Muqeem, who impressed during the recent New Zealand tour. The 25-year-old left-armer averaged 3.0 and took six wickets in two overs&mdash;making him a dark-horse contender for the spin-heavy conditions expected in Dhaka.

Despite being global fixtures, Babar Azam, Mohammad Rizwan, and Shaheen Afridi are once again expected to miss the series. All three were rested during the home T20 sweep of Bangladesh and are said to remain outside the selectors&rsquo; plans amidst Pakistan&#39;s strategic push to develop bench strength.

The squad is expected to be led by Salman Ali Agha, with Shadab Khan continuing as vice-captain. Reports indicate a youthful yet seasoned squad featuring the likes of Hasan Ali, Hasan Nawaz, Fakhar Zaman, Haris Rauf, and Saim Ayub &mdash; striking a blend between experience and emerging talent.

The PCB is expected to finalise and release the squad before July 7, when the team will convene at Karachi&rsquo;s National Bank Stadium. With Pakistan arriving in Dhaka on 16 July, attention will quickly shift to Sufiyan Muqeem&rsquo;s role in leveraging spin-friendly subcontinental tracks under pressure.

Pakistan to unveil T20 squad for Bangladesh series, with left-arm spinner as surprise pick

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan