انڈونیشیا ،گو جیک کے شریک بانی اور سابق وزیر تعلیم گرفتار، کرپشن اسکینڈل بے نقاب

انڈونیشیا میں کرپشن کے خلاف ایک بڑی کارروائی سامنے آئی ہے جس نے ملک کی سیاست اور کاروباری دنیا کو ہلا کر رکھ دیا ہے۔ رائیڈ ہیلنگ اور ڈیجیٹل ادائیگیوں کے پلیٹ فارم "گو جیک" کے شریک بانی اور سابق وزیرِ تعلیم نادیئم انور مکرِم کو بدعنوانی کے سنگین الزامات پر گرفتار کر لیا گیا ہے۔تحقیقات کے مطابق وزارتِ تعلیم میں ان کے دور کے دوران کروم بک لیپ ٹاپس کی خریداری کے معاہدے میں بڑے پیمانے پر بے ضابطگیاں ہوئیں۔ اس اسکیم میں ریاست کو 1.98 ٹریلین انڈونیشین روپیہ (تقریباً 122 ملین ڈالر) کا بھاری نقصان برداشت کرنا پڑا۔قومی انسدادِ بدعنوانی کمیشن (KPK) کے مطابق مکرِم نے مخصوص کمپنیوں کے ساتھ ساز باز کر کے صرف کروم بک لیپ ٹاپس کیلئے معیار طے کروائے، جس سے شفافیت بری طرح متاثر ہوئی۔ اس عمل کو ملکی قوانین اور خریداری کے قواعد کی کھلی خلاف ورزی قرار دیا جا رہا ہے۔تفتیشی رپورٹ میں مزید بتایا گیا ہے کہ مکرِم نے گوگل انڈونیشیا کے نمائندوں سے بھی متعدد ملاقاتیں کیں، تاہم گوگل نے صفائی پیش کرتے ہوئے کہا ہے کہ وہ براہِ راست حکومت کو مصنوعات نہیں دیتا بلکہ صرف مقامی ڈسٹری بیوٹرز کے ذریعے خدمات فراہم کرتا ہے۔یہ مقدمہ انڈونیشیا کی تاریخ کے بڑے کرپشن اسکینڈلز میں شمار ہو رہا ہے اور مبصرین کا کہنا ہے کہ اس گرفتاری کے بعد سیاسی حلقوں میں مزید ہلچل مچنے کا امکان ہے۔