ون ڈے ڈیبیو کے بعد مسلسل پانچ ففٹی، میتھیوبریٹزکے نے تاریخ رقم کردی

جنوبی افریقا کے نوجوان بیٹر میتھیو بریٹزکی نے ون ڈے کرکٹ میں ایک نیا عالمی ریکارڈ قائم کرکے تاریخ رقم کر دی ہے۔ صرف پانچ ون ڈے میچز کھیلنے والے اس باصلاحیت کھلاڑی نے اپنے ہر میچ میں نصف سنچری اسکور کر کے دنیا بھر کے کرکٹ شائقین کو حیران کر دیا ہے۔بریٹز نے گزشتہ روز انگلینڈ کے خلاف دوسرے ون ڈے میچ میں 85 رنز کی اننگز کھیلی، یہ ان کے کیریئر کی پانچویں لگاتار نصف سنچری تھی۔ اس کارکردگی کے ساتھ ہی وہ دنیا کے پہلے کرکٹر بن گئے ہیں جنہوں نے اپنے ون ڈے ڈیبیو کے بعد مسلسل پانچ میچز میں پچاس یا اس سے زائد رنز بنائے۔ اس سے قبل بھارت کے سابق کرکٹر نوجوت سنگھ سدھو نے 1987 میں مسلسل چار نصف سنچریاں اسکور کی تھیں لیکن بریٹزکی نے یہ ریکارڈ بھی پیچھے چھوڑ دیا۔بریٹزکی نے رواں سال فروری میں نیوزی لینڈ کے خلاف ون ڈے ڈیبیو کیا اور شاندار 150 رنز بنائے تھے۔اس کے بعد انہوں نے اپنے ون ڈے کیریئر کے دوسرے میچ میں پاکستان کے خلاف 83 رنز کی اننگز کھیلی، تیسرے ون ڈے میچ میں جنوبی افریقی بیٹر نے 57 اور چوتھے میچ میں 88 رنز بنائے، بریٹزکی اب تک اپنے ون ڈے کیریئر کے 5 میچز میں 463 رنز بنا چکے ہیں۔اس سے قبل بھارت کے سابق کرکٹر نوجوت سنگھ سدھو نے 1987 میں اپنے ون ڈے ڈیبیو کے بعد مسلسل 4 نصف سنچریاں سکور کی تھیں۔یاد رہے کہ ون ڈے کرکٹ میں سب زیادہ مسلسل نصف سنچری یا اس سے زائد اسکور بنانے کا ریکارڈ جاوید میانداد کے پاس ہے، انہوں نے 1987 میں 9 مسلسل اننگز میں 50 یا اس سے زائد رنز بنائے تھے۔