بیلجیئم نے فلسطین کو ریاست تسلیم کرنے اور اسرائیل پر سخت پابندیاں لگانے کا اعلان کردیا

فلسطین کی عالمی سطح پر حمایت میں ایک اور بڑا قدم،فرانس، برطانیہ، آسٹریلیا اور کینیڈا کے بعد اب بیلجیئم نے بھی تاریخی قدم اٹھاتے ہوئے فلسطین کو باقاعدہ طور پر ایک ریاست تسلیم کرنے کا فیصلہ کر لیا ہے۔بیلجیئم کے وزیر خارجہ میکسم پریوٹ نے اپنے سوشل میڈیا پیغام میں اعلان کیا کہ وہ رواں ماہ اقوامِ متحدہ کی جنرل اسمبلی میں فلسطین کو ریاست کے طور پر تسلیم کرنے کا باضابطہ اعلان کریں گے۔ ان کا کہنا ہے کہ یہ اقدام غزہ میں جاری انسانی المیے اور اسرائیل کی جانب سے عالمی قوانین کی خلاف ورزیوں کے جواب میں اٹھایا جا رہا ہے۔بیلجیئم نے اسرائیل کے خلاف سخت پابندیوں کا بھی اعلان کیا ہے، جن میں غیر قانونی اسرائیلی آبادکاریوں سے مصنوعات کی درآمد پر پابندی، اسرائیلی کمپنیوں کے ساتھ سرکاری معاہدوں کا دوبارہ جائزہ اور اسرائیلی پروازوں و ٹرانزٹ پر پابندی شامل ہیں۔ وزیرِ خارجہ کے مطابق یہ اقدامات اسرائیلی عوام کے خلاف نہیں بلکہ ان کی حکومت پر دباؤ ڈالنے کے لیے ہیں تاکہ عالمی قوانین پر عملدرآمد کرایا جا سکے۔یہ فیصلہ دنیا کو یہ پیغام دے رہا ہے کہ اب فلسطین کو نظرانداز کرنا ممکن نہیں رہا، عالمی ضمیر جاگ رہا ہے اور اسرائیل پر دباؤ بڑھتا جا رہا ہے۔