آل راؤنڈرشاداب خان کے ہاں پہلے بچے کی پیدائش، نانا ثقلین مشتاق بھی خوشی سے نہال

قومی کرکٹ ٹیم کے اسٹار آل راؤنڈر شاداب خان کے گھر ننھی پری کی آمد ہوئی ہے۔شاداب خان بیٹی کےباپ بن گئے ہیں اور یہ خوشخبری انہوں نے خود سوشل میڈیا پر مداحوں کے ساتھ شیئر کی۔سماجی رابطے کی ویب سائٹ ایکس پر جاری پیغام میں شاداب خان نے اپنے مداحوں کو بیٹی کی پیدائش کی اطلاع دی۔انہوں نے پوسٹ میں نومولود بیٹی کے ننھے پیروں کی تصویر شیئر کی ہے۔انہوں نے کیپشن میں لکھا کہ الحمدللہ، اللہ نے ہمیں ایک خوبصورت بیٹی کی صورت میں پہلی اولاد سے نوازا ہے۔ اس نعمت پر اللہ کا شکر گزار ہوں، ہمیں اس نئے سفر کے آغاز میں اپنی دعاؤں میں شامل رکھیں۔خیال رہے کہ شاداب خان قومی ٹیم کے سابق ہیڈ کوچ ثقلین مشتاق کے داماد ہیں۔ثقلین مشتاق نے بھی ایکس پر اپنی نواسی کو گود میں لیے ہوئے تصویر لگاکر خوشی کا اظہار کیا۔ تاہم تصویر میں نومولود کا چہرہ نظر نہیں آرہا۔قومی ٹیم کے آل راؤنڈر کا کہنا ہے کہ اس رحمت پر الفاظ سے بڑھ کر شکر گزار ہیں۔ براہِ کرم ہمیں اپنی دعاؤں میں یاد رکھیں کیونکہ ہم اس نئے سفر کا آغاز کر رہے ہیں۔سوشل میڈیا صارفین کی جانب سے شاداب اور ان کی اہلیہ کو مبارکباد دینے کا سلسلہ جاری ہے۔شاداب خان جنوری 2023 میں قومی ٹیم کے سابق کوچ اور مایہ ناز اسپنر ثقلین مشتاق کی بیٹی کے ساتھ رشتہ ازدواج میں منسلک ہوئے تھے۔