عمران خان کی پیرول پر رہائی کیلئے اسلام آباد ہائیکورٹ میں درخواست دائر

بانی پی ٹی آئی عمران خان کی پیرول پر رہائی کے لیے درخواست اسلام آباد ہائیکورٹ میں دائرکردی گئی،اسلام آباد ہائیکورٹ میں درخواست وزیراعلیٰ خیبرپختونخوا علی امین گنڈاپور نے دائر کی ہے۔تفصیلات کے مطابق وزیر اعلیٰ خیبرپختونخوا علی امین گنڈا پور اسلام آباد ہائی کورٹ پہنچ گئے، وزیراعلیٰ کے پی کے نے بانی پی ٹی آئی عمران خان کی پےرول پر رہائی کیلئے درخواست دائر کردی، علی امین گنڈاپور نے اسلام آباد ہائیکورٹ میں درخواست دائر کرنے کیلئے بائیومیٹرک تصدیق کروائی۔عدالت میں بائیومیٹرک تصدیق کا عمل بھی مکمل کر لیا گیا۔ عدالت میں پیشی کے موقع پر میڈیا سے گفتگو کرتے ہوئے علی امین گنڈا پور نے کہا کہ بانی پی ٹی آئی عمران خان نہ صرف پاکستان بلکہ امت مسلمہ کے لیڈر ہیں۔ ان کا کہنا تھا کہ ہمارے دورِ حکومت میں بھارت کے خلاف بانی نے ہمیشہ جرات مندانہ مؤقف اپنایا۔انہوں نے عدلیہ سے امید کا اظہار کرتے ہوئے کہا کہ ہمیں عدالتوں سے انصاف کی امید ہے، بانی پی ٹی آئی عمران خان کی پے رول پر رہائی چاہتے ہیں تاکہ وہ اہم قومی معاملات میں شرکت کر سکیں۔علی امین گنڈا پور نے شکایت کی کہ عدالتی احکامات کے باوجود عمران خان سے ملاقات نہیں کرائی جا رہی، جو انصاف کے اصولوں کے خلاف ہے۔ ملک میں انصاف کا نظام مفلوج ہے اور جو آئینی دروازے بتائے گئے، ہم نے سب کھٹکھٹائے۔وزیراعلیٰ خیبرپختونخوا نے واضح کیا کہ عمران خان سے ملاقات کے بعد قومی سطح پر اہم معاملات سے متعلق اجلاس میں شرکت یا مؤقف کا فیصلہ کیا جائے گا۔بانی سے ملاقات نہ کرانا کم ظرفی کی علامت ہے۔