قرآن اللہ کا سچا کلام ہے، آسٹریلوی پادری نے قرآن سے متاثر ہوکر اسلام قبول کرلیا

آسٹریلوی پادری گولڈ ڈیوڈ نے زندگی کے 45 سال چرچ میں وقف کرنے کے بعد قرآن سے متاثر ہوکر اسلام قبول کرلیا۔ خبر رساں ادارے کی رپورٹ کے مطابق آسٹریلوی پادری گولڈ ڈیوڈ نے قبول اسلام کے بعد اپنا اسلامی نام عبد الرحمن رکھا ہے۔ سابق پادری نے بتایا کہ وہ اپنے بہنوئی کے جنازے میں شرکت کے لیے پرتھ کے سفر کے دوران اسلام سے اس وقت متاثر ہوئے جب انہوں نے پرتھ کی مرکزی مسجد سے محض 150 میٹر کے فاصلے پر ایک ہوٹل کرائے پر حاصل کیا۔ پرتھ کی مرکزی مسجد کے قریب ہوٹل میں اچانک ان کا دل چاہا کہ وہ اس مسجد میں جائیں جہاں اذان ہورہی تھی۔ اس کے بعد وہ مسجد میں گئے اور وہاں کے امام سے ملاقات کی، جنہوں نے دنیا کا بہترین تحفہ کلام پاک دیا۔ عبدالرحمن نے کہا کہ کئی سالوں سے میرے پاس قرآن مجید موجود ہے، تاہم اسے پڑھنے کا اتفاق نہیں ہوا تھا۔ پرتھ میں مسجد سے جب واپس ہوٹل میں گیا تو گھٹنے ٹیک کر خدا سے دعا کی کہ مجھے مکمل سچائی دکھا۔ دعا کرنے کے بعد انہوں نے قرآن پاک کی تلاوت کی اور اسے پڑھتے ہوئے فکری، جذباتی اور روحانی طور پر احساس ہوا کہ یہ خدا کا سچا کلام ہے ۔